MALUHREINA 19 - Mara Bible RV (BSI)

Pathaisana ryhpa

¹ Abeipa ta Mawsi nata Arawna hnohta,

² “He he Abeipa biepiepa ryhpa bieraopazy a châ: Izarei sawzy hnohta viahchao zeinô saihpa, pihpasina hnei leipa, seina hnei leipa nata raopaky a kyh beih leipa nâ lâ a vaw chhi awpa ta chho teh.

³ Viahchao zeinô cha theihthaipa Eliaza pie aw chi ta, riehmo khôtho lâ a chhipa châ aw ta, theihthaipa hmiakô liata thie awpa a châ.

⁴ Theihthaipa Eliaza ta a kudy ta a thisaih la aw ta, ahmaohna poh o hmia lâta ei sari a thia aw.

⁵ Cha khai tawhta viahchao zeinô cha a mohmô liata rao awpa châ ta, a vo, a sapa, a thisaih nata a ie zy rao khai ha awpa a châ.

⁶ Theihthaipa ta sidy tho, hisaw nata pala nohsaihpa la aw ta, viahchao zeinô raona mei liata a phôh aw.

⁷ Theihthaipa cha a chysiazy pasu aw ta, ti liata a ngai a si aw ta, cha khai tawhta riehmo lâ â di aw. Châhrasala theihthaipa cha zâlâ taih pathaih leipa a châ aw.

⁸ A raotuhpa chhao ti ta a chysiazy pasu aw ta, ti liata a ngai a si aw ta, zâlâ taih pathaih leipa a châ hra aw.

⁹ Chyhsa pathaihpa pakha ta viahchao zeinô raona paoh cha la aw ta, riehmo khôtho liata su sithaipa liata a soh aw. Cha cha Izarei zawpizy châta apathaina ti ta hmâ awpa ta paso awpa châ ta, moleina tawhta pathaisana châta a châ aw.

¹⁰ Viahchao zeinô raona paoh a pakhytuhpa chhao a chysiazy pasu aw ta, zâlâ taih pathaih leipa a châ aw. Cha cha Izarei sawzy nata chihropa ama hnohta a pahrâpazy châta chhâzaw bieraopa a châ aw.

¹¹ “Athihpa ri a hriapa maih noh sari chhôh pathaih leipa a châ aw.

¹² Noh thôhna noh nata noh sarina noh liata apathaina ti ta a pathai aw ta, chatanachata a pathaih aw. Noh thôhna noh nata a noh sarina noh liata â pathai vei khiahta deikua cha, pathaih aw vei.

¹³ Athihpa ri a hriapa maih, kheihawhpa chyhsa ri rai châ sala, â pathai vei khiahta cha, Abeipa achhyna byureih a papuapaleipa châ ta, cha chyhsa cha Izarei tawhta chhawh pathlahpa a châ aw. Apathaina ti a chô liata thiapa a châ leipa vâta, pathaih leipa châ ta, a pathaih leina a chô liata a y thlâh ha chypa a châ.

¹⁴ “He he poh o liata athipa ama y tita ryhpa awpa a châ: Poh o liata a ngiapa nata poh o chhôh liata a ypa maih noh sari chhôh pathaih leipa ama châ aw.

¹⁵ Hmobaoh a pahypa, a chhiehru ta chhiehruh leipa maih pathaih leipa a châ hra.

¹⁶ Ahy rai lyurâhpa liata zaozi ta thiepa tlyma, pihthi ta a thipa tlyma, chyhsa rupa tlyma, thlâ tlyma a hriapa maih cha, noh sari chhôh pathaih leipa a châ aw.

¹⁷ Pathaih leipa châna chata raopa hlâna meipaoh la aw ei ta, beih liata soh aw ei ta, chavah ti pathaihpa ama bao aw.

¹⁸ Chyhsa pathaihpa ta hisaw la aw ta, ti liata ny aw ta, poh o nata hmobaoh zydua chô liata nata a chhôh liata a ypa chyhsazy chô liata a thia aw. Rupa tlyma, thiepa ri tlyma, athihpa ri tlyma, thlâ tlyma a hriapazy chô liata a thia hra aw.

¹⁹ Chyhsa pathaihpa ta chyhsa pathaih leipa chô liata, apathaina ti cha noh thôhna noh nata noh sarina nohzy liata thia aw ta, noh sarina noh ta a pathaisa aw. A chysiazy pasu aw ta, ti liata a ngai a si aw ta, zâlâ ta a vaw pathaih ha aw.

²⁰ “Chyhsa pathaih leipa cha â pathai leipa khiahta cha, cha chyhsa cha Abeipa supathaihpa a papuapaleipa a châpa vâta, zawpi tawhta chhawh pathlahpa a châ aw. Apathaina ti ta thiapa a châ leipa vâta pathaih leipa a châ.

²¹ He he ama châta chhâzaw bieraopa a châ aw: Apathaina ti a thiatuhpa maih a chysiazy pasu aw ta, apathaina ti a hriapa cha zâlâ taih pathaih leipa a châ aw.

²² Chyhsa pathaih leipa ta hmo a hriapa maih pathaih leipa châ aw ta, cha hmo pathaih leipa a hriapa cha zâlâ taih pathaih leipa a châ aw,” tah ta.