MALUHREINA 18 - Mara Bible RV (BSI)

Theihthaipazy nata Livai chizy chakaona

¹ Abeipa ta Arawna hnohta, “Nâ nata na sawchapawzy nata na paw chhôhkhazy ta supathaihpa liata paraona maoh phaoh aw ei chi ta, nâ nata na sawchapawzy ta nama theihthaina raihria kyh liata paraona maoh nama phaoh aw.

² Nama hnohta chakao awpa ta Livai chi, na paw chipathla nama unawhzy a vaw chhi aw ei chi ta, Biehrai Byh poh o hmiakô liata nama chakao nota ama cha bao tyh aw.

³ Na raihria cha bao aw ei ta, poh o liata rai zydua ama hria aw. Supathaihpa hmobaoh nata maisâh deikua amâ hnia awpa châ vei. Chataleipatala âmo chhao, nâmo chhao, nama thi pathlei aw.

⁴ Chakaona rai na hriana liata a hlao hra aw ei ta, ahmaohna poh o mohôhna rai ama hria aw. Poh o rai zydua âmo hria awpa châ ta, chihropazy ta ama châ hnia awpa châ vei.

⁵ Izarei sawzy chô liata hiehâhna a y khao lei nawpa ta, nâmo ta supathaihpa nata maisâh liata maophaohna zydua cha nama chaba khai aw.

⁶ Pachâ teh u, kei tlai ta nama unawhpa Livai pathlazy cha Izarei sawzy hry tawhta a tlyh ei na ta, ahmaohna poh o liata chakaona rai hria awpa ta, âmo cha Khazohpa lâta hmosaipiepa châta nama hnohta ei cha pie ei.

⁷ Nâ nata na hnohta a ypa na sawchapawzy ta maisâh nata pohraipa chhôh liata theihthaina rai hria awpa zydua hria thei aw ei chi ta, nama chakao aw. Theihthaipa chakaona raihria cha, hmosaipiepa ta nama hnohta cha pie ei na ta, chihropa a vaw hniapa maih cha thie awpa ama châ,” tah ta.

Theihthaipazy nata Livai pathlazy tovyuh

⁸ Abeipa ta Arawna hnohta, “Moh teh, Izarei sawzy ta chalopa hlâna ta kei lâta hmohlâpa pathaihpa ama hlâpa zydua nâ nata na sawchapawzy châta chhâzaw tovyuh ta ei cha pie ei.

⁹ Mei ta rao leipa hmohlâpa pathaihpazy cha na tovyuh a châ aw. Ama hmohlâpa to na tovyuh châ aw ta, ama niepa hlânazy, ama moleina hlânazy nata ama thaileichâna hlânazy cha nâ nata na sawzy châta nama tovyuh hmo pathaihpa a châ aw.

¹⁰ Su pathaih chaipa liata nie aw chi ta, chapaw zydua ta ama nie thei aw. Na châta hmo pathaihpa a châ.

¹¹ “Hezy chhao na tovyuh a châ: Ama chalopa hlâna hmopiepa nata Izarei sawzy chaluahpa hlâna zydua cha, nâ nata na hnohta a ypa na sawchapawzy nata na sawchanôzy hnohta chhâzaw ta nama tovyuh châta ei cha pie ei. Na o liata chyhsa pathaihpa maihta ama nie thei aw.

¹² Abeipa lâta ama hlâpa sathaw pha chaipa, kresawhti pha chaipa, sâh pha chaipa nata thei hmiatua chaipazy ei cha pie.

¹³ Ama râh liata a ypa zydua hry liata theilâpa a hmoh tua chaipa, Abeipa châta ama vaw cheipa cha, nâ eih châ aw ta, na o liata chyhsa pathaihpa zydua ta ama nie thei aw.

¹⁴ Izarei râh liata hmohlâpa zydua nâ eih a châ aw.

¹⁵ Chhi a pahypa, chyhsapa chhao, sahroh chhao, Abeipa lâta ama hlâpa maih nâ eih a châ aw. Chyhsapa sawchapaw uhtheipa deikua chatlai aw chi ta, sahroh pathaih leipa a pataw tua chaipa chhao na chatlai aw.

¹⁶ Chatlai awpazy cha thla kha a châ nahta, supathaihpa sekel reizie ta reipa ta, sekel tlaw pangawh ta na chatlai aw ei. Sekel tlaw kha cha kerâ miakih a châ.

¹⁷ Viahchao a pataw tuapa, mietaku a pataw tuapa nata mie a pataw tuapazy deikua cha, pathaihpa ama châpa vâta na chatlai awpa châ vei. Ama thisaih maisâh liata thia aw chi ta, mei ta hmohlâpa châta ama thawzy mei ta na rao aw. Cha cha Abeipa châta ropahâhpa a châ aw.

¹⁸ Chaluahpa hlâna palôh nata phei chachâh lâ cha na tovyuh a châpa hawhta, sa pathaihpa a pataw tuapa atheihna sazy chhao na tovyuh a châ aw.

¹⁹ Izarei sawzy ta chalopa hlâna ta Abeipa lâta ama hlâpa hmo pathaihpa zydua cha, nâ nata na sawchapawzy nata na sawchanôzy hnohta chhâzaw ta nama tovyuh châta ei cha pie ei. Cha cha nâ nata na hnohta a ypa na sawchapawzy nata na sawchanôzy châta, Abeipa hmiakô liata chhâzaw alôh biehrai a châ aw,” tah ta.

²⁰ Abeipa ta Arawna hnohta, “Ama râh liata ryuto hnei leipa aw chi ta, ama hry liata tovyuh hnei hra aw va chi. Izarei sawzy hry ta na tovyuh nata na ryuto cha kei he ei châ.

²¹ Ahmaohna poh o liata chakaona rai ama hriana lymâ châta, Izarei râh liata su hrawh su kha zydua Livai chizy hnohta ama ryuto châta ei pie ei.

²² Tahmâ tawhta cha, Izarei sawzy ta ahmaohna poh o amâ hnia awpa châ khao vei. Chataleipatala ama moleina ty phaohpa ta ama thi pathlei aw.

²³ Ahmaohna poh o chakaona rai cha, Livai pathlazy ta hria aw ei ta, ama paraona maoh âmo ta ama phaoh aw. He he nama chhâ zydua châta bieraopa a châ aw: Livai pathlazy cha Izarei sawzy hry liata ryuto hnei aw veih ei.

²⁴ Izarei sawzy ta su hrawh su kha Abeipa lâta chalopa hlâna ta ama hlâpa cha, Livai pathlazy hnohta ama ryuto châta ei pie. Chavâta ama hnohta ‘Izarei sawzy hry liata ryuto hnei aw veih ei’ ei tahpa a châ,” tah ta.

²⁵ Abeipa ta Mawsi chho ta,

²⁶ “Cha dei châ leipa ta, Livai pathlazy chho la, ama hnohta, ‘Nama ryuto châta Izarei sawzy su hrawh su kha ei cha piepa ei âmo tawhta nama dao tita, cha su hrawh su khapa tawhta su hrawh su kha Abeipa lâ nama hlâ pachhuah heih awpa a châ.

²⁷ Cha hmohlâpa cha, sawhri liata sâh nata kresawhti saohna tawhta kresawhti a puapa hawhta nama châta pachâpa a châ aw.

²⁸ Cha hawhna chata Izarei sawzy tawhta su hrawh su kha nama topa zydua tawhta Abeipa lâta nama pie pachhuah awpa châ ta, cha su hrawh su kha tawhta Abeipa tovyuh nama pananopa cha theihthaipa Arawna nama pie aw.

²⁹ Nama hnohta hmopiepa zydua tawhta a pha chaipa nata a pathaih chaipazy cha Abeipa tovyuh châta nama hlâ lymâ aw.

³⁰ Chavâta Livai pathlazy hnohta hetana heta na tah aw: “Nama daopa tawhta a pha chaipa nama hlâ tita, cha cha Livai pathlazy châta sawhri liata kôvei phana ta pachâpa châ aw ta, kresawhti saohna liata kôvei phana ta pachâpa a châ aw.

³¹ Cha cha ahmaohna poh o liata nama hriana lymâ châ ta, nâmo nata nama chhôhkhazy ta khataih su lia rai ta nama nie thei aw.

³² A pha chaipa nama hlâ khiahta cha, su hrawh su kha kyh liata moleina maoh phaoh leipa aw ei chi ta, Izarei sawzy hmohlâpa pathaihpa papuapalei hra leipa aw ei chi ta, thi aw veih ei chi,” tah mah y,’” tah ta.