MALUHREINA 16 - Mara Bible RV (BSI)

Kôrâ nata a sahlaozy hriena

¹ Kôrâ, Dâthâ, Abirâ nata Ôni zy ta py tao ei ta. Kôrâ cha Izah sawchapawpa châ ta, Izah cha Kôhâ sawchapawpa châ ta, Kôhâ cha Livai sawchapawpa a châ. Dâthâ nata Abirâ cha Rubena pathla hry liata Eliabâ sawchapawzy châ ei ta, Ôni chhao Rubena pathla hry liata Pele sawchapawpa a châ.

² Âmo chata Mawsi a dyuh ei ta. Ama py liata Izarei sawzy hry liata zawpi chhituhpa nata ryureituhpa châta a tlyhpa chyhsa moh phapa 250 amâ hlao.

³ Mawsi nata Arawna chakhia awpa ta a awpakhy ei ta, ama hnohta, “Nama tah tu ha bâ! Zawpi pôhpakhypa sahlao he pathaih ei ta, ama zydua ta ama pathaih khai. Abeipa chhao ama hry liata a y. Khazia Abeipa chyhsa pôhpakhypa hlâta chônô viapa ta namâ tao?” tah ei ta.

⁴ Cha cha Mawsi ta a thei nahta, â khu lâta pao ta,

⁵ Kôrâ nata a sahlaozy hnohta, “Mylâ my ta Abeipa ta ahy ma ano eih a châ tahpa a pasia aw. Ahy ma a pathaih tahpa pasia aw ta, a pathaihpa ta ano a hnia thei aw ta, Abeipa ta â tlyhpa tlai chata Abeipa cha â hnia thei aw.

⁶ Hetana nama tao aw: Nâmo, Kôrâ nata a sahlao zydua ta ropahâhpa raona biebuh a chei aw ei chi ta,

⁷ cha liata mylâ Abeipa hmiakô liata mei soh aw ei chi ta, mei chô liata ropahâhpa nama soh aw. Abeipa ta â tlyhpa cha pathaihpa a châ aw. Nâmo, Livai pathlazy saih u, nama tah tu ha bâ!” tah ta.

⁸ Mawsi ta Kôrâ hnohta, “Nâmo, Livai pathlazy saih u, nathlie teh u:

⁹ Izarei Khazohpa ta nâmo cha Izarei zawpi hry tawhta cha panano ei ta, ano a hnia awpa ta a cha rao ei. Abeipa achhyna byureih liata chakao ta, zawpi hmiakô liata a duah ta zawpi chakao awpa ta a châ tlyhpa ei he, hmo chyhpa ta ma nama pachâ?

¹⁰ Nâ nata na unawh Livai pathla zydua cha ano kiapâh liata y awpa ta a cha rao ei. Khazia theihthaipa châ awpa taihta namâ chhuhrao?

¹¹ Nâ nata na sahlao zydua Abeipa a dyuh awpa ta namâ hmaohpakhypa a châ hih. Arawna cha khâpa hmo ma tao ta, a chô liata nama paphôh?” tah ta.

¹² Chatawhcha Mawsi ta Eliabâ sawchapawpa Dâthâ nata Abirâ cha paawsa ta, âmo ta, “A khy aw ma pi.

¹³ Râhchawhpa liata miah thie awpa ta, sâhpiti nata kheihti lona râh tawhta miah na kaw puakheipa he hmo chyhpa ma a châ? Tahmâ eima chô liata bei ta nâ tao heih.

¹⁴ Cha dei châ vei, sâhpiti nata kheihti lona râh lâ miah tlôkhei leipa chi ta, lyuzy nata kre sadôzy eima ryuto châta miah pie hra va chi. He chyhsazy he ama mo taihta thaoh awpa ma nâ chhuah? A khy aw ma pi,” tah ei ta.

¹⁵ Mawsi cha a hiehâh ngaita ta, Abeipa hnohta, “Ama hmohlâpa a pyh khah y. Âmo tawhta alâ pô kha hmah la leipa na ta, ama hry liata pakha hmah pasasa beih va na,” tah ta.

¹⁶ Mawsi ta Kôrâ hnohta, “Mylâ nâ nata na sahlao zydua, nâ chhao, âmo chhao, Arawna chhao, Abeipa hmiakô liata namâ luah awpa a châ.

¹⁷ Ama ropahâhpa raona biebuh chaba chyu ei sala, a chhôh liata ropahâhpa soh ei sala, Abeipa hmiakô liata vaw cheih mawh ei sy. Ropahâhpa raona biebuh cha a zydua ta 250 châ aw ta, nâ chhao, Arawna chhao, chyhsa to ama ropahâhpa raona biebuh amâ chei chyu aw,” tah ta.

¹⁸ Chatanachata chyhsa to ama ropahâhpa raona biebuh a chei chyu ei ta, a chhôh liata mei soh ei ta, mei chô liata ropahâhpa soh ei ta, Mawsi nata Arawna hnohta ahmaohna poh o chhikao liata a kei duah ei ta.

¹⁹ Kôrâ ta zawpi zydua cha Mawsi nata Arawna chakhia awpa ta ahmaohna poh o chhikao liata pahmaoh ta. Zawpi zydua hnohta Abeipa rônahna a vaw luah ta.

²⁰ Abeipa ta Mawsi nata Arawna hnohta,

²¹ “Kha zawpi hry tawhna khata a panano teh u, âmo kha thlai ei pahleipadia aw ei,” tah ta.

²² Mawsi nata Arawna cha â khu lâta pao ei ta, “Hy Khazohpa, sapa zydua thlahpa Khazohpa y, chyhsa pakha moleipa vâta zawpi zydua chô liata na pathi a ia aw mâ?” tah ei ta.

²³ Abeipa ta Mawsi hnohta,

²⁴ “Zawpizy kha Kôrâ, Dâthâ nata Abirâ zy riehmo a hneisai khai ha awpa ta chho teh,” tah ta.

²⁵ Mawsi cha thyu ta, Dâthâ nata Abirâ yna lâ vawh ta, Izarei machâzy ta ano cha zi ei ta.

²⁶ Zawpi hnohta, “He chyhsa moleipazy poh o tawhna heta pua teh u. Ama hneipa chhao khâpa hmah hria khuh vy. Chataleipatala ama moleina zydua vâta pahleipadiapa nama châ pathlei aw,” tah ta.

²⁷ Chatanachata Kôrâ, Dâthâ nata Abirâ zy pahrâna su tawhta pua ei ta. Dâthâ nata Abirâ cha kaw pua ei ta, ama lapinôzy, ama sawchapawzy, ama hawtizy chhaota ama poh o chhikao liata a duah ei ta.

²⁸ Mawsi ta, “He liana heta Abeipa ta he raizy he hria awpa ta eina tuah tahpa pahno aw ei chi ta, keima kho ta ei taopa a châ leizie nama pahno aw.

²⁹ He chyhsazy he pihthi ta thi ei sala, chyhsa to chô liata a tlô tyhpa hawhta ama chô liata a vaw tlô khiahta cha, kei he Khazohpa ta eina tuah leipa a châ aw.

³⁰ Abeipa ta hmo thiehpa taopa ta, alei ta a pakah âpa ta, âmo nata ama hneipa zydua palâ khaipa ta, a hrohpa ta Athihkhih lâ amâ ngia khiahta deikua cha, he chyhsazy heta Abeipa ama mohnao tahpa nama pahno aw,” tah ta.

³¹ Cha bie zydua cha Mawsi ta a rei khaipata nahta, ama ry liata chhaohlei a vaw patlaw ta.

³² Alei ta a pakah vaw â ta, ama ozy nata Kôrâ chyhsa zydua nata ama hneipa zydua a palâ khai haw.

³³ Âmo nata ama hneipa zydua ahrohpa ta Athihkhih lâ a ngia ei ta, alei ta âmo cha a pabieh khâh ta, zawpi hry tawhta ama leidia haw.

³⁴ Ama awhsâhpa pyu vâta, ama chheipâh liata Izarei saw zydua cha, “Alei ta miah a palâ pathlei aw,” tah ei ta, amâ râpai khai haw.

³⁵ Chatawhcha Abeipa tawhta mei vaw pua ta, ropahâhpa a hlâ haipa chyhsa 250 cha a kâsao khai ha ei.

³⁶ Abeipa ta Mawsi hnohta,

³⁷ “Ropahâhpa raona biebuhzy kha mei a kâ haipa tawhta la awpa ta, theihthaipa Arawna sawchapawpa Eliaza kha chho teh. Hmo pathaihpa vaw châ ha ei ta, chavâta a meiheizy kha hiezâh khai ha mah y.

³⁸ Ama hrona pahleina taihta a moleipa chyhsazy ropahâhpa raona biebuh châ ta, maisâh khuna châta a phiapa ta daihpa châ mawh sy. Abeipa hmiakô liata hlâ hapa a châpa vâta, pathaihpa ama vaw châ haw. Cha cha Izarei sawzy châta ngiana a châ aw,” tah ta.

³⁹ Mei ta a kâsaopa sahlaozy ta ama vaw cheipa, ropahâhpa raona dawh biebuhzy cha Theihthaipa Eliaza ta la ta, maisâh khuna châta a phiapa ta padaisa ta.

⁴⁰ Abeipa ta Mawsi hmâpa ta Eliaza hnohta a reipa hawhta, cha cha Izarei sawzy zikyurâna châta taopa a châ. Arawna pathla a châ leipa chyhsa ahy hmahta Abeipa hmiakô liata ropahâhpa rao awpa ta amâ hnia awpa châ vei. A tao raruahpa cha, Kôrâ nata a sahlaozy hawhta ama châ aw.

⁴¹ A mylâ ta, Izarei zawpi zydua ta Mawsi nata Arawna chô liata, “Abeipa phopi chyhsazy nama thie” tahpa ta paphôh ei ta.

⁴² Mawsi nata Arawna chakhiapa ta zawpi amâ hmaoh hai nota, ahmaohna poh o lâ a kei heih ei ta, meihdo ta ahmaohna poh o cha vaw khu ta, Abeipa rônahna a vaw luah ta.

⁴³ Mawsi nata Arawna cha ahmaohna poh o hmia lâ vawh ei ta.

⁴⁴ Abeipa ta Mawsi hnohta,

⁴⁵ “Zawpizy he thlai ei pahleipadia aw ei. Chavâta ama hry tawhta a hnei teh u,” tah ta. Chatawhcha Mawsi nata Arawna cha â khu lâta pao ei ta.

⁴⁶ Mawsi ta Arawna hnohta, “Ropahâhpa raona na biebuh kha la la, a chô liata maisâh liata mei kha soh la, ropahâhpa mia la, zawpi lâ a râkhei para la, âmo châta chatlaina tao teh. Abeipa tawhta hiehâhna pua ha ta, potlana â thao haw,” tah ta.

⁴⁷ Arawna ta Mawsi reipa hawhta, ropahâhpa raona biebuh cha la ta, ahmaohpakhypa sahlao lâ a râ ta, potlana cha zawpi hry liata vaw tlô hmâ ha ta. Ropahâhpa rao ta, zawpi châta chatlaina tao ta.

⁴⁸ Athihpa nata ahrohpa likawh liata a kei duah ta, chatanachata potlana cha pai ha ta.

⁴⁹ Kôrâ vâta athipazy hleikhô ta, potlana vâta a thipa zydua cha 14,700 ama châ.

⁵⁰ Potlana a pai tawhta, Arawna cha ahmaohna poh o chhikao liata Mawsi lâta kua heih ta.