MALUHREINA 15 - Mara Bible RV (BSI)

Hlâna ryhpazy

¹ Abeipa ta Mawsi hnohta,

² “Izarei sawzy chho la, ama hnohta hetana heta reih teh: Nama pahrâ nawpa râh ei cha piepa ei tlô aw ei chi ta,

³ Abeipa châta ropahâhpa tao nawpa ta, Abeipa lâta mei ta hmohlâpa raopa hlâna tlyma, bietai patlô nawpa ta atheihna tlyma, lôhthai hmohlâpa tlyma, nama châta kyhchhi raopazy liata hmohlâpa tlyma nama hlâ tita, viahchao hri tawhta tlyma, mietaku zaw tawhta tlyma nama hlâ awpa a châ.

⁴ Abeipa lâta hmohlâpa a cheihpa maihta, niepa hlâna hlâ aw ta, cha cha viahdie dipa kachu su hrawh su kha nata sathaw chhiehraôh ôh kha pahlaopa a châ aw.

⁵ Raopa hlâta ta tlyma, atheihna châta tlyma hlâ awpa mietakutaw pô kha liata, dopa hlâna châta kresawhti ôh kha lymâ na hlâ awpa a châ.

⁶ Mietaku tôhpa pô kha hlâ awpa liata niepa hlâna châta na hlâ awpa cha, viahdie dipa kachu su hrawh su no nata sathaw chhiehraôh ôh kha nata khophie pahlaopa a châ aw.

⁷ Dopa hlâna châta kresawhti chhiehraôh ôh kha nata khophie na hlâ aw. Cha cha Abeipa châta ropahâhpa a châ.

⁸ Raopa hlâna châta tlyma, bietai patlô nawpa ta atheihna châta tlyma, aryhna hlâna châta tlyma, Abeipa lâta viahchao tôhpa na hlâ khiahta cha,

⁹ viahchao tôhpa na hlâ nona chata, viahdie dipa kachu su hrawh su thôh nata sathaw ôh no pahlaopa niepa hlâna na hlâ pâ aw.

¹⁰ Dopa hlâna châta kresawhti chhiehraôh ôh no na hlâ aw. Cha cha mei ta hmohlâpa châ ta, Abeipa châta ropahâhpa a châ.

¹¹ “Cha hawhna chata viahchao tôhpa, mietaku tôhpa, mietakutaw nata mietaw zy hlâna maihta tao awpa a châ.

¹² Sahroh nama hlâ awpa nata aziepa reipatipa ta, nama hlâ awpa ta â chakaihpa niepa hlâna nata dopa hlânazy nama hlâ khai aw.

¹³ Izarei râh liata a pihpa zydua ta, cha hawhna chata mei ta hmohlâpa ama hlâ awpa a châ. Cha cha Abeipa châta ropahâhpa a châ.

¹⁴ Chihropa chyhsa nama hnohta a pahrâpa tlyma, chhâ hluhpi nama hnohta a ypazy tlyma ta, Abeipa châta ropahâhpa, mei ta hmohlâpa a hlâ khoh khiahta cha, nâmo taozie hawhta a tao hra awpa a châ.

¹⁵ Nâmo nata nama hnohta chihropa a pahrâpazy ta bieraopa miakha a hly aw ei chi ta, cha cha chhâ vaw y lymâ awpa châta chhâzaw bieraopa a châ aw. Abeipa hmiakô liata cha, nâmo nata chihropazy namâ lyu khai aw.

¹⁶ Nâmo nata nama hnohta chihropa a pahrâpazy ta ryhpa miakha nata bieraopa miakha namâ hly aw,” tah ta.

¹⁷ Abeipa ta Mawsi hnohta,

¹⁸ “Izarei sawzy chho la, ama hnohta hetana heta reih teh: Ei cha siekheina râh kei tlô aw ei chi ta,

¹⁹ cha râh viahchhâ nama nie tita, Abeipa tovyuh tao aw ei chi ta nama hlâ aw.

²⁰ Viahchhâ nama nyh tua chaipa tawhta tlâ kha panano aw ei chi ta, chaluahpa hlâna ta nama hlâ aw. Sawhri liatapa chaluahpa hlâna ta nama hlâ tyhpa hawhta nama hlâ aw.

²¹ Nama chhâ zydua liata, viahchhâ nama nyh tua chaipa tawhta Abeipa tovyuh nama pie lymâ awpa a châ.

Tao pathleipa moleinazy ryhpa

²² “Châhrasala molei pathleina vâta, Abeipa ta Mawsi hnohta a reipa biepiepazy zyh leipa ta,

²³ Mawsi hmâpa ta Abeipa ta bie a cha piepazy ei cha, bie a cha pie noh tawh ei ta nama chhâ vaw y lymâ awpa zydua liata,

²⁴ tao pathleipa châ sala, zawpi pahno leipa a châ khiahta cha, viahchao hri hry tawhta viahchao tôh dawpa pô kha raopa hlâna châta zawpi ta ama hlâ aw. Cha cha Abeipa châta ropahâhpa a châ. Â chakaihpa niepa hlâna nata dopa hlâna chhao taozietyhpa hawhta hlâ aw ei ta, moleina hlâna châta mie tôhpa pô kha ama hlâ aw.

²⁵ Chatawhcha theihthaipa ta Izarei zawpi zydua châta chatlaina tao aw ta, tao pathleipa châ ta, ama tao pathleipa châta Abeipa lâta mei ta hmohlâpa hlâ ei ta, Abeipa hmiakô liata moleina hlâna ama hlâ hapa vâta, a ngiahthaipa ama châ aw.

²⁶ Izarei zawpi zydua nata ama hry liata chihropa a pahrâpazy chhao, zawpi tao pathleina liata amâ hlao khaipa vâta, ngiahthaipa ama châ aw.

²⁷ “Chyhsa ta pahno leipa ta hmo a parao khiahta cha, moleina hlâna châta mie chanôpa kô khapa pô kha a hlâ aw.

²⁸ Pahno leina vâta a molei pathleipa châna chata, theihthaipa ta Abeipa hmiakô liata chatlaina taopa aw ta, a ngiahthaipa a châ aw.

²⁹ Pahno leina vâta moleina kyh liata, a râh chyhsa Izarei sawzy nata chihropa ama hry liata a pahrâpazy châta ryhpa miakha a hly awpa a châ.

³⁰ Moleina a châ tahpa pahno thlâh hana chôta a molei raruahpa deikua cha, a râh chyhsa a châpa chhao ta, chihropa a châpa chhao ta, Abeipa a reipachhiepa châ ta, cha chyhsa cha a phopi tawhta chhawh pathlahpa a châ aw.

³¹ Abeipa bie khâpasaw ta reih leipa ta, a biepiepa a paraopa vâta, cha chyhsa cha chhawh pathlahpa châ aw ta, a paraona maoh a phaoh aw,” tah ta.

Pahânoh paraotuhpa thiepa a châ

³² Izarei sawzy râhchawhpa liata ama y nota, chyhsa pakha cha Pahânoh ta tho a pakhypa hmô ei ta.

³³ Tho a pakhypa a hmôtuhpazy ta ano cha Mawsi nata Arawna nata zawpizy lâ a vaw chhi ei ta.

³⁴ A chô liata kheihta tao awpa ma tahpa pachiapa a châ mâh leipa vâta patâhna o liata khô chy ei ta.

³⁵ Abeipa ta Mawsi hnohta, “Cha chyhsa cha thie awpa a châ. Zawpi zydua ta riehmo khôtho liata alô ta ama vawhsao awpa a châ,” tah ta.

³⁶ Abeipa ta Mawsi bie a piepa hawhta, zawpi zydua ta ano cha riehmo khôtho lâ a chhi ei ta, alô ta ama vawhsao haw.

Chysia pai taozie awpa

³⁷ Abeipa ta Mawsi hnohta,

³⁸ “Izarei sawzy chho la, ama hnohta hetana heta reih teh: Ama chhâ vaw y lymâ awpa zydua liata, ama chysia paizy pangiasana ama tao awpa châ ta, chysia pai ki to liata pala ri nohpa ama pataoh khai awpa a châ.

³⁹ Chysia pai pangiasana cha moh tyh aw ei chi ta, Abeipa biepiepa zydua a theipa ta nama zyh lymâ nawpa châta châ aw ta, chatanachata nama palôh nata nama mo ta a khopa lâ sie leipa aw ei chi ta, nama sihryh tyhna lâ tlei leipa ta nama y thei aw.

⁴⁰ Ei biepiepa zydua a theipa ta zyh aw ei chi ta, nama Khazohpa châta pathaihpa nama châ aw.

⁴¹ Kei he Abeipa nama Khazohpa, nama Khazohpa châ awpa ta Izi râh tawhta châ chhi papuatuhpa ei châ. Kei he Abeipa nama Khazohpa ei châ,” tah ta.