MALUHREINA 14 - Mara Bible RV (BSI)

Zawpizy amâ ty

¹ Cha zâ cha ahmaohpakhypa zydua ta ao paro ngaitapa ta awh ei ta, zawpizy cha aoh tlili ta ama cha.

² Izarei saw zydua ta Mawsi nata Arawna chô liata paphôh ei ta, ama hnohta, “Izi râh liana kha vaw thi ha sih la a pha via awpa tlai, cha leipa chhao ta, he râhchawhpa liana heta thi sih la tlao a pha via aw!

³ Khazia ma zaozi ta thi awpa ta Abeipa ta he râh lâ he miah â chhi tly? Eima lapi sawzy he patupa ta y aw ei ta, Izi râh lâ kua awpa eima châta pha via vei ma?” tah ei ta.

⁴ Chatanachata a chhohia ei ta, “Chhituhpa rao sih la, Izi râh lâ kua ha ei suh u,” tah ei ta.

⁵ Mawsi nata Arawna cha Izarei zawpi pôhpakhypa zydua hmiakô liana cha â khu lâta pao ei ta.

⁶ Chatawhcha râh mohparutuhpazy hry liata a hlao hrapa Nunâ sawchapawpa Zawsua nata Zephune sawchapawpa Kâlebâ cha ama chysia hrie ei ta,

⁷ Izarei zawpi zydua hnohta, “Mohparu awpa ta eima chahryhpa râh cha râh pha ngaitapa a châ.

⁸ Eima chô liata Abeipa â ly khiahta cha, cha râh lâ cha miah a chhi aw ta, miah a pie aw, sâhpiti nata kheihti lona râh cha.

⁹ Abeipa chô liata a ty leipa u la, cha râh liata chyhsazy cha chi hra khah u, âmo cha eima châta viahchhâ hawh deita ama châ; amâ bohna cha âmo tawhta la hapa châ ta, Abeipa eima hnohta a y mâh tâh, âmo cha chi khah u,” tah ei ta.

¹⁰ Châhrasala zawpi pôhpakhypazy chata Zawsua nata Kâlebâ cha alô ta vaw awpa ta pahrua ei ta. Abeipa rônahna cha Izarei saw zydua hnohta ahmaohna poh o liata a zâ luah ta.

¹¹ Abeipa ta Mawsi hnohta, “He chyhsazy heta khachâ ma eina mohnao aw ei? Ama hry liata ngiana hmonoâhpazy ei taona chôta khachâ ma na ngâ leipa ta ama y aw?

¹² Hri ta hrie aw ei na ta, ei pamua aw ei; chatanachata nâma liana heta âmo hlâta rônah viapa nata thatlô viapa phopi ei padua aw,” tah ta.

¹³ Châhrasala Mawsi ta Abeipa hnohta, “Cha kyh cha Izi mo ta ama pahno pathlei aw, he zawpizy he ama hry tawhta na hmotaotheina ta nâ chhi papuapazy châ tlôh ei ta.

¹⁴ Izi mo ta he râh liata a pahrâpazy he chho aw ei ta, pha aw vei. He râh liata a pahrâpazy heta nâ Abeipa cha Izarei sawzy hry liata na y tahpa pahno tlôh ei ta. Nâ, Abeipa cha hmiachhypa ta cha hmô ha ei ta, na meihdo cha Izarei sawzy chô liata a duah ta, nohchhô ta meihdo tôh ta, zâ ta mei tôh ta ama hmia lâta na sie tyhpa chhao ama pahno.

¹⁵ Chavâta he zawpizy he chyhsa pakha thiepa hawhta na thie khai thlâh ha khiahta cha, na moh pathâhpa a theipa phopizy ta,

¹⁶ ‘Abeipa ta he zawpizy he ama hnohta pie awpa ta bie â taihpa râh lâ a tlôkhei thei leipa vâ ei ta, râhchawhpa liata a thie ha ei,’ ama tah pathlei aw.

¹⁷ Chavâta tahmâ he Abeipa hmotaotheina cha rônahpa ta y mawh sy, nâma tlai ta,

¹⁸ ‘Abeipa cha hiehâhna kyh liata nainôsôpa châ ta, kyhpachâna hnei hluh ngaita ta, moleina nata hmoparaonazy a ngiahthai theipa a châ. Thailei a châpazy deikua cha, hrie leipa ta y beih vei. Pawzy hmoparaona ty sawzy chô liata patlôsa ta, chhâ thôhna nata chhâ palihna taihta a patlôsapa a châ,’ tahpa ta vaw reih ha chi ta.

¹⁹ Na kyhpachâna rônah ngaitapa vâta, he chyhsazy hmoparaona he ngiachhiepa ta a ngiahthai la, Izi râh tawhta tahmâ taihta nâ ngiahthai lymâpa hawhta, he chyhsazy hmoparaona he a ngiahthai mah y,” tah ta.

Khazohpa ta Izarei sawzy a hrie

²⁰ Abeipa ta, “Na bie hawhta ei ngiahthai ei.

²¹ Châhrasala ei hrona reipa ta ei reih; leilô zydua he Abeipa rônahna ta a bie aw.

²² Izi râh nata râhchawhpa liata ei rônahna nata ei hmonoâhpa taopazy hmô ha ei ta, chatana chôta ei bie a zyh leipa chyhsa zydua heta, ei hrawh tlai na pasia ei ta, ei ao nathlie veih ei.

²³ Âmo pathlatuhpazy hnohta bie ei taihpa râh cha hmô aw veih ei; nâ mohnaopazy chhao hmô hra aw veih ei.

²⁴ Nâ chakaotuhpa Kâlebâ deikua he cha palôh nanopa phaoh ta, tlokhuh ta eina pazipa vâta, ano he cha a pangaipa râh tlôkhei aw na ta, a pathlazy ta râh cha ama hnei aw.

²⁵ Amale mo nata Kâna mozy saikao byzy liata pahrâ tlôh ei ta, chavâta nâmo cha mylâ a lie u la, Tilaipi Saihpa lâpi lâ tawhta râhchawhpa lâ a ngia teh u,” tah ta.

²⁶ Abeipa ta Mawsi nata Arawna hnohta,

²⁷ “He zawpi moleipa, ei chô liata a paphôh ngâ thlâh hapazy he, khachâ ma ei chhyh thai aw ei? Izarei sawzy paphôhna, ei chô liata ama paphôhnazy he ei thei haw.

²⁸ Chavâta ama hnohta, ‘Ei hrona reipa ta ei reih, ei nah theina liata nama reipa hawh tlai ta, kei chhao ta nama chô liata ei tao hra aw:

²⁹ he râhchawhpa liana he nama rizy pao aw ta, maluhpi nama reina liata kô kih tawhta chô lâ chyhsa, ei chô liata a paphôhpa zydua nama pao khai aw.

³⁰ Bâh pazawhpa tlai ta nama pahrâ nawpa tao awpa ta bie ei châ taihpa ei râh cha, Zephune sawchapawpa Kâlebâ nata Nunâ sawchapawpa Zawsua tah leipa ta cha ahy hmah a ngia aw veih ei chi.

³¹ Anodeikuacha patupa ta ama y aw nama tahpa nama sawzy he a chhi aw ei na ta, âmo heta nama dythapa râh cha ama pahrâ aw.

³² Nâmo deikua cha he râhchawhpa liana heta nama rizy a pao aw.

³³ Nama sawzy cha kô sypalih râhchawhpa liata viavi aw ei ta, nâmo ngâchhih leina vâta pasa ama tao aw, râhchawhpa liata nama rizy a pao khaina taih ta.

³⁴ Râh nama mohparuna noh ziepa noh sypalih kha, noh kha vyuhpa ta kô kha lymâ ta, nama paraona vâta kô sypalih pasa nama tao aw; chatanachata ei ly leizie nama pahno aw.

³⁵ Kei Abeipa heta ei reih: he zawpi moleipa, keima nâ dyuh awpa ta a hmaohpakhypazy chô liana heta, he hmo he tao tlai aw na ta, he râhchawhpa liana heta leidia aw ei ta, he liata ama thi aw,’ tahpa ta chho teh u,” tah ta.

Mohparutuhpa moleipa pahrawh thina

³⁶ Chatanachata râh mohparu awpa ta Mawsi ta a tuapazy a zâ lie ei ta, râh thâtih a chhiena lâta a reihpa, Mawsi chô liata Zawpi a paphôhsatuhpa,

³⁷ râh thâtih a chhiena lâta a vaw tlôkheituhpazy chô liata potlana tlô ta, Abeipa hmiakô liata thi khai ha ei ta.

³⁸ Râh mohparu awpa ta a siepazy hry liata Nunâ sawchapawpa Zawsua nata Zephune sawchapawpa Kâlebâ deikua cha pahlôhpa ama châ.

Hômâ liata Izarei pahniepa ta a y

³⁹ Mawsi ta cha biezy cha Izarei saw zydua chho ta, zawpizy cha pachârôhpa ta mâchhiesa ei ta.

⁴⁰ Chatanachata mydi ta thyu ei ta, tlâh laki lâ khy ei ta, Mawsi hnohta, “Moh teh, eimâ khy hih, Abeipa ta bie miah â taihpa su lâ cha eima khy aw, eima vaw molei haw,” tah ei ta.

⁴¹ Mawsi ta, “Khazia Abeipa biepiepa nama parao, nama hlaotloh khao aw vei.

⁴² Khy hlei khah u, nama hry liata Abeipa y khao tlôh leipa ta, nama chariahzy ta ama cha thie khai pathlei aw.

⁴³ Nama hmia liata Amale mo nata Kâna mozy y ei ta, zaozi ta nama pao aw; Abeipa nama tleisai hapa vâta, nama hnohta Abeipa y khao aw vei,” tah ta.

⁴⁴ Châhrasala Abeipa Biehrai Byh nata Mawsi cha riehmo tawhta ama pua leipa chhao ta, tlâh râh lâ cha khy raruah a chhuah ei ta.

⁴⁵ Chatanachata tlâh râh liata a pahrâpa Amale mo nata Kâna mozy cha a zu ei ta, âmo cha thie ei ta, Hômâ tlâh taihta a chadai ei ta.