MALUHREINA 13 - Mara Bible RV (BSI)

Kâna râh mohparutuhpazy

¹ Abeipa ta Mawsi hnohta,

² “Izarei sawzy ei piepa Kâna râh mohparu awpa ta chyhsa tuah teh. Ama pathlatuhpa chizy tawhta chyhsa pakha chyu, ama hry liata chhituhpa pakha lymâ ta na tuah aw ei,” tah ta.

³ Mawsi ta, Abeipa bie piepa hawhta, âmo cha Pârâ râhchawhpa tawhta pasiesa ta. Ama zydua ta Izarei pathla chhituhpa ama châ.

⁴ Hezy he ama moh a châ: Rubena chi tawhta Zaku sawchapawpa Samua;

⁵ Simeôna chi tawhta Hôri sawchapawpa Saphâta;

⁶ Zudâh chi tawhta Zephune sawchapawpa Kâlebâ,

⁷ Iskâra chi tawhta Zawsi sawchapawpa Ikâ;

⁸ Epharai chi tawhta Nunâ sawchapawpa Hôsia;

⁹ Benzami chi tawhta Râphu sawchapawpa Pâti;

¹⁰ Zebulawna chi tawhta Sôdi sawchapawpa Kâdie;

¹¹ Zawsi pathla Manase chi tawhta Susi sawchapawpa Kâdi;

¹² Dânâ chi tawhta Kemâli sawchapawpa Amie;

¹³ Asera chi tawhta Mikaila sawchapawpa Sethu;

¹⁴ Nâthalai chi tawhta Vôphasi sawchapawpa Nâbi;

¹⁵ Kâdâ chi tawhta Mâkhi sawchapawpa Keu.

¹⁶ Âmo cha râh mohparu awpa ta Mawsi ta a tuapazy ama châ. Nunâ sawchapawpa Hôsia cha Mawsi ta Zawsua tahpa ta a moh a bi.

¹⁷ Âmo sahlao cha Mawsi ta Kâna râh mohparu awpa ta tuah ta, ama hnohta, “Chho lâ râh Neke lâta siepa ta, tlâh râh lâta kiah aw ei chi ta,

¹⁸ râh cha kheihawhpa ma a châ tahpa zy, cha liata a pahrâpa chyhsazy cha thatlôpa ma, thatlô leipa ma ama châ tahpa zy, ama chyh ma ama hluh ma tahpa zy;

¹⁹ ama yna râh cha a pha ma, a chhie ma tahpa zy; kheihawhpa khihzy liata ma ama pahrâ, poh o khihzy ma, thokhy hneipa khihzy ma tahpa zy;

²⁰ râh cha kôvei a pha ma, pha vei ma tahpa zy, a râh chhôh liata thozy a y ma, y vei ma tahpa zy nama kaw moh aw. Riahphapa ta y u la, cha râh liata theilâpazy za phaoh muh vy,” tah ta. Cha daihti cha Kre thei hmiatuapa hmoh daihti châ ta.

²¹ Chatanachata pua ei ta, râh cha Zini râhchawhpa tawhta Lebô-hâmâ kiapâh ta Rehô taihta moh khai ei ta.

²² Neke lâta khy ei ta, Hebraw tlô ei ta, cha liata Anâki pathla Ahimâ mo, Sesai mo nata Tâmai mozy y ei ta. Hebraw cha Izi râh liata Zawâ â dua hlâta kô sari liata padua hapa a châ.

²³ Chatawhcha Eskaw Saikao tlô ei ta, cha liata kre thei sao kha, a chiah duata chhawh ei ta, chyhsa pano ta alâ ta zâ sy ei ta. Pawmikarânâ nata theiku chhao za phaoh ei ta.

²⁴ Izarei sawzy ta cha liata kre sao ama chhawhpa vâta, cha su cha Eskaw Saikao bipa a châ.

²⁵ Râh cha noh sypalih ama mohparu khai tawhta a zâ lie ei ta.

²⁶ Pârâ râhchawhpa Kâdesâ liata Mawsi nata Arawna nata Izarei zawpi zydua yna vaw tlô ei ta. Mawsi nata Arawna nata zawpi zydua hnohta bie vaw phaoh ei ta, a râh theilâpazy chhao pahmô ei ta.

²⁷ Mawsi hnohta, “Miah na tuana râh cha tlô pi ta, sâhpiti nata kheihti lona râh a vaw châ tlai. He he a râh liata theilâpa a châ.

²⁸ Râh liata phopi a pahrâpazy deikua cha, phopi thatlô ngaitapa châ ei ta, khihpizy chhao thokhy a hneipa, khih lai ngaitapazy a châ. Anâki pathlazy chhao, cha liata eima hmô.

²⁹ Amale mo chho lâ râh liata pahrâ ei ta, Hiti mo, Zebu mo nata Amawri mozy cha tlâh râh liata pahrâ ei ta, Kâna mo cha tilaipi kiah nata Zawdâh kao zy liata ama pahrâ,” tah ei ta.

³⁰ Kâlebâ ta zawpi cha Mawsi hmiakô liata chalihsa ta, “Khy para sih la, râh cha kaw la ei suh u, eima pahnie aw,” tah ta.

³¹ Châhrasala a sielâhpazy ta “Cha phopi cha, keimo hlâta ama thatlô via ta, chavâta a kaw dyuh thei awpa châ ma pi,” tah ei ta.

³² Izarei sawzy hnohta râh ama kaw mohparupa kyh thâtih chhiepa za tlôkhei ei ta, zawpi hnohta, “Râh eima kaw mohparupa cha a chhôh liata a pahrâpazy a palâ khai hapa châ ta, a râh liata pahrâpa eima hmôpazy cha mo pahreihpazy ama châ.

³³ Cha liata Nephili mo pahreihpazy hmô pi ta, Anâki pathlazy cha Nephili tawhta a puapazy ama châ. Keimo cha khawsu hawh dei ta a hmô pi ta, âmo chhao ta khawsu hawh dei ta miah ama hmô hra,” tah ei ta.