MALUHREINA 12 - Mara Bible RV (BSI)

Miria nata Arawna ta Mawsi ama chakhia

¹ Miria nata Arawna ta Mawsi cha Kusi zuah lapinô ta a hneipa vâta reipachhie ei ta.

² “Mawsi hnoh dei ta ma Abeipa ta bie a reih? Keimo hnohta chhao reih hra vei mâ?” tah ei ta. Cha cha Abeipa ta thei ta.

³ Mawsi cha chyhsa nônai ngaitapa châ ta, alei chô liata chyhsa zydua hry liata nônai chaipa a châ.

⁴ Abeipa ta Mawsi nata Arawna nata Miria zy cha bie thlai a chho ta, ama hnohta, “Nama pathôh ta vaw pua u la, ahmaohna poh o lâ a vy teh u,” tah ta. Ama pathôh ta vaw pua ei ta.

⁵ Abeipa cha ameih tôh liata za chô ta, poh o chhikao liata a vaw duah ta, Arawna nata Miria cha aw ta, ama pano ta hmia lâ vaw pua ei ta.

⁶ Abeipa ta, “Ei bie nathlie teh u: Nama hry liata hrohsopa a y khiahta cha, kei, Abeipa ta aluahna ta a hnohta a pahnosa na ta, mâ lâta bie ei chho tyh.

⁷ Nâ chakaotuhpa Mawsi deikua cha, cha hawhta châ vei. Ano cha ei o liata ngâchhihpa a châ.

⁸ Ano cha pakah ta bie a chho na ta, bie nyupa y leipa ta, a siapa ta bie ei chho tyh. Abeipa pizie chhao a hmô. Cha hawhta a châ tlôh khiahta cha, khazia nâ chakaotuhpa Mawsi reipachhiepa cha nama chi vei?” tah ta.

⁹ Chavâta Abeipa cha ama chô liata a pathi ia ta, a sie haw.

¹⁰ Poh o chô tawhta meihdo â pasie nahta, pachâ tua u, Miria cha vaw phawh ta, dâhaw hawhta a vaw râh haw. Arawna ta Miria cha moh ta, phawhpa vaw châ thlâh ha ta.

¹¹ Arawna ta Mawsi hnohta, “Hy ei zibeipa, eima moleina vâta rie miah hrie khah y, hru ngaitapa ta tao pi ta, eima vaw molei haw.

¹² Miria he thiruapa ta a pihpa hawsaih, a nô chhi tawhta a vaw pua nota a sapa khophie a y khao leipa hawhta rie châ khah sy,” tah ta.

¹³ Mawsi ta Abeipa awsao ta, “Hy Khazohpa, Miria he ngiachhiepa ta patlâh mah y, ngiachhiepa ta,” tah ta.

¹⁴ Abeipa ta Mawsi hnohta, “A paw ta a hmia liata a pachih pachhao sala, noh sari chhôh nozapa ta y aw vei ma? Riehmo khôtho lâ noh sari chhôh ânano ta khawhlôhpa ta y sala, cha khai tawhta a vaw ngiakhei heihpa châ mawh sy,” tah ta.

¹⁵ Chatanachata Miria cha noh sari chhôh khôtho liata khawhlôhpa châ ta, Miria a vaw ngiakhei heihpa a châ hlâlei cha, zawpi chhao a pasie veih ei.

¹⁶ Cha khai tawhta zawpizy cha Hazerô tawhta pua ei ta, Pârâ râhchawhpa liata riehmo paryh ei ta.