MALUHREINA 11 - Mara Bible RV (BSI)

Zawpi paphôhna

¹ Zawpi ta rairuna amâ tyhpazy vâta Abeipa theina liata paphôh ei ta. Cha cha Abeipa ta a thei nahta, a hiehâh ta. Chatanachata Abeipa mei ama hry liata vaw pua ta, ama riehmo chaki liata su thokhazy vaw kâ ta.

² Zawpi ta Mawsi awsao ei ta, Mawsi ta Abeipa lâ thlahchhâ ta, chatanachata mei cha dia ha ta.

³ Abeipa mei ama hry liata a vaw puapa vâta, cha su moh cha Tâberâ bipa a châ.

Vâ tawhta mamo

⁴ Ama hnohta a sie hrapa chihropazy ta sa nie khona thata vaw hnei ei ta. Izarei mo chhao cha sa vâpa ta cha ei ta, “Sa eima nie byuh rimâ cha!

⁵ Izi râh liata ngasa a mâ leipa ta eima nie tyhpazy, atheizy, bokaihzy, khâchhao hrohpazy, khâchhao saihpa nata khâchhao râhpazy eima vâ rimâ cha!

⁶ Tahmâ cha eima tha chhao a chhâ khai ha hih. He mânâ dei leipa heta eima hmô hropa y tlôh va,” tah ei ta.

⁷ Mânâ cha sysadi chi hawhta y ta, â lânazie cha kre thei chawhpa a lyu.

⁸ Cha cha zawpi ta a huah ei ta, charona liata charopa ta, sôkhaoh liata daih ei ta, cha khai tawhta beih liata chhoh ei ta, viahchhâ ta ama tao. A pahânazie cha viahdie sathaw pahlaopa ta taopa viahchhâ hawhta a châ.

⁹ Riehmo liata zâ ta diati a za tla nahta, mânâ chhao diati chô liata a za tla tyh hra.

¹⁰ Zawpizy a chhôh chhôh ta ama poh o chhikao chyu liata ama chapa Mawsi ta pahno ta. Abeipa cha thata a hiehâh ta, chavâta Mawsi cha a nôpo ngaita ta.

¹¹ Mawsi ta Abeipa hnohta, “Khazia châ chakaotuhpa chô liata hmo pha leipa na tao? Kheihawhpa liata ma na mody leipa ta y na ta, he zawpi zydua phaohri he ei chô liata na pahnieh tly?

¹² He zawpi zydua he ei phaopa ma ama châ? Ei sapazy ma ama châ? Khazia nawh apyhpa ta sâhpi a bâhpa hawsaih â pyhpa hawhta, âmo cha ei kalachhôh liata a pyh laih ta, ama pathlatuhpazy hnohta bie nâ taihpa râh lâ siekhei awpa ta eina chho chi?

¹³ He zawpi zydua pie awpa heta khataih liata sa ma ei hnei aw? ‘Eima nie awpa sa miah pie teh,’ tahpa ta cha ei ta, eina patypamâ ngâ thlâh ha ei hih.

¹⁴ He zawpi zydua he kei dei ta phaoh thei veih ei na. Ei phao awpa he â hri tu haw.

¹⁵ He hawhta eina tao awpa chi khiahta cha, na ngiachhie la, â ryh na tah khiahta cha, na thie lâlao thlâh ha la, nôpo pachârôhna a tyh awpa na pakhôkhâhsa mah y,” tah ta.

¹⁶ Abeipa ta Mawsi hnohta, “Izarei machâzy hry tawhta machâ nata chhituhpa ta na pahnopa sysari na awpakhypa la, âmo cha ahmaohna poh o lâ a vaw chhi la, cha liata na hnohta a duah mawh ei sy.

¹⁷ Za chô aw na ta, cha liata bie ei châ vaw chho aw. Nâ liata thlahpa a ypa kha la aw na ta, ama chô liata ei soh aw. Chatanachata zawpi phaohri cha, cha phaokhei aw ei ta, nâ dei ta phaoh khao aw va chi.

¹⁸ Zawpi hnohta, ‘Mylâ châta a pathai teh u, sa cha nama nie aw. Abeipa theina liata, “Sa nie awpa ahy ma miah a pie aw? Izi râh liana kha eima phasa viapa tlai,” tahpa ta cha ei chi ta. Chavâta Abeipa ta sa cha pie aw ei ta, nama nie aw.

¹⁹ Noh kha tlyma, noh no tlyma, noh pangawh tlyma, noh hrawh tlyma, noh kih tlyma dei nie aw veih ei chi.

²⁰ Nama hry liata a ypa Abeipa dythapa ta, chana chôta Abeipa hmiakô liata paphôh ei chi ta, “Khazia ma Izi râh tawhta eima kaw pua tly?” nama tahpa vâta, thla kha chhôh tlai, aina taih nata apalithluna taihta nama nie aw,’ tahpa ta na chho aw ei,” tah ta.

²¹ Mawsi ta a chhy ta, “Ei sielâhpa zawpi phei ta sie theipazy he chyhsa 600,000 châ ei ta, ‘Thla kha chhôh nie awpa sa ei pie aw ei’ tah chi ta.

²² Mietaku zaw nata sahroh zawzy thie khaipa chhao ta, ama châta â daih aw ma? Tilaipi nga zydua patu khaipa hmah châ sala, ama châta â daih aw ma?” tah ta.

²³ Abeipa ta Mawsi hnohta, “Abeipa cha a ku a chyuta ma? Ei bie hawhta na chô liata a vaw tlô nata tlô lei na pahno aw,” tah ta.

Machâzy hrohsona bie

²⁴ Chatawhcha Mawsi cha pua ta, Abeipa bie cha zawpizy chho ta. Zawpi chhituhpa machâ sysarizy cha aw ta, poh o chadôpa ta paduasa ta.

²⁵ Abeipa cha meihdo hry liata a zu ta, Mawsi cha bie a chho ta, ano liata thlahpa cha la ta, machâ sysarizy chô liata soh ta. Thlahpa ama chô liata a ypa nahta, machâzy cha hrohsona bie phuah ei ta. Châhrasala cha hawhta tao pazao ngâ thlâh ha veih ei.

²⁶ Riehmo liata machâ pano a ngua ei ta, pakhapa moh cha Eldâ châ ta, a hropa moh cha Medâ a châ. Thlahpa cha âmo chô liata chhao y ta. Âmo cha machâ sysari atlyhpazy hry liata a hlao ei ta, châhrasala ahmaohna poh o lâ vawh leipa ta, riehmo liata hrohsona bie tlao phuah ei ta.

²⁷ Satlia pakha a kei râ ta, Mawsi hnohta, “Eldâ nata Medâ ta riehmo liata hrohsona bie ama phuah,” tah ta.

²⁸ Nunâ sawchapawpa Zawsua, a thyutlia daihti tawhta Mawsi chakaotuhpa ta, “Ei zibeipa Mawsi, âmo cha pakhâ mah y,” tah ta.

²⁹ Châhrasala Mawsi ta a hnohta, “Ei chhâh a châpa ta hiatliapa ma na châ tly? Kei la Abeipa chyhsa zydua hrohsopa châ khai ei sala, Abeipa ta a Thlahpa ama chô liata soh khai sala tahpa tlao ei khoh,” tah ta.

³⁰ Cha khai tawhta Mawsi nata Izarei machâzy cha riehmo lâ a di ha ei ta.

Mamo nata potlana

³¹ Chatawhcha Abeipa tawhta thlih vaw pathli ta, tilaipi tawhta mamozy vaw phaoh ta, riehmo chheipâh liata vaw patlasa ta, riehmo hiakha lâ noh kha sie nata hiakha lâ noh kha sie zydua cha mamozy ta dy no chhapa ta bie ei ta.

³² Zawpizy cha pua ei ta, noh y nata zâkhihdei mamozy cha a huah ei ta, a mylâ chhao noh y ta a huah ei ta. A huah chyh chaipa hmahta kaichhieh mia hrawh tlai a huah ta, riehmo chheipâh liata pachawh chyu ei ta.

³³ Sa cha nie ei ta, châhrasala sa cha ama palâ hlâta, ama hâh nata hâh likawh liata a y thlâh ha chy nota, Abeipa hiehâhna zawpi chô liata vaw tlô ta, Abeipa ta potlana rarôh y ngaitapa ta chyhsa hluhpi a thie ha ei.

³⁴ Chavâta cha su moh cha Kibarôhâtavâ bipa a châ, chyhsa zohpazy cha liata pabupa ama châpa vâta.

³⁵ Kibarôhâtavâ tawhta zawpizy cha Hazerô pangaipa ta sie ei ta, Hazerô liata y chy ei ta.