MALUHREINA 10 - Mara Bible RV (BSI)

Tâkâ chiahmiezy

¹ Abeipa ta hetana heta Mawsi chho ta.

² “Tâkâ chiahmie miano tao teh. Daipa ta tao aw chi ta, zawpi awpakhyna châta nata pasiesana châta na hmâh aw.

³ Chiahmie cha a miano ta tôpa a châ tita, zawpi zydua cha ahmaohna poh o chhikao kiapâh liata na hmiakô liata amâ vaw pakhy khai awpa a châ.

⁴ Chiahmie miakha deita tôpa a châ khiahta cha, chhituhpazy, Izarei chizy hyutuhpazy deita na hmiakô liata amâ vaw hmaoh aw.

⁵ Zikyurâna chiahmie a chyuta ta tôpa a châ khiahta cha, nochhi lâta poh o a raipazy ama pua aw.

⁶ Zikyurâna chiahmie a einona tôpa a châ khiahta cha, chho lâta poh o a raipazy ama pua aw. Sie awpa daihti maihta zikyurâna chiahmie tô tyh awpa a châ.

⁷ Zawpi apakhy nawpa châta tôpa a châ khiahta cha, chiahmie cha a pasi pi ta tô awpa châ ta, zikyurâna chiahmie hawhta a chyuta ta tô awpa châ vei.

⁸ “Arawna sawchapawpa theihthaipazy ta chiahmie cha ama tô awpa a châ. He he nama chhâ zydua châta ryhpa ta nama hnei lymâ awpa a châ.

⁹ Nama râh liata khakhaipa châ tlybaipazy a dyuh awpa ta nama sie tita, zikyurâna chiahmiezy nama tô awpa a châ. Chatanachata Abeipa nama Khazohpa hmiakô liata a thei thlâh hapa ta y aw ei chi ta, nama khakhaipazy tawhta pachhapa nama châ aw.

¹⁰ Nama thaphana noh liata zy, nama kyhchhi daihti raopa liata zy, nama thla thiehpa liata zy, nama raopa hlâna nata nama aryhna hlâna atheihna liata zy chiahmie nama tô awpa a châ. Hezy he nâmo châta nama Khazohpa hmiakô liata atheithlâhna châta a châ aw: Kei he Abeipa nama Khazohpa ei châ.”

Izarei sawzy Sinai tawhta ama sie

¹¹ Kô nona, thla nona, cha thla noh kih noh ta meihdo cha pahnokheina byureih chô tawhta a pasâh ha ta.

¹² Izarei sawzy cha Sinai râhchawhpa tawhta a py py ta sie ei ta, meihdo cha Pârâ râhchawhpa liata a duah ta.

¹³ Mawsi hmâpa ta Abeipa biepiepa hawhta a ei khana châta amâ pasiena a châ.

¹⁴ A hmiatua chaipa ta Zudâh py liata a ypazy a py py ta pua ei ta, ama hyutuhpa cha Aminadâ sawchapawpa Nasô a châ.

¹⁵ Iskâra chi hyutuhpa cha Zuâ sawchapawpa Nethane a châ.

¹⁶ Zebulawna chi hyutuhpa cha Helô sawchapawpa Eliabâ a châ.

¹⁷ Cha khai tawhta achhyna byureih phie ei ta, Kesao sawchapawzy nata Merâri sawchapawzy ta achhyna byureih cha a sy ei ta, ama sie.

¹⁸ Chatawhcha Rubena py liata a ypazy a py py ta pua ei ta, ama hyutuhpa cha Seidia sawchapawpa Elizu a châ.

¹⁹ Simeôna chi hyutuhpa cha Zurisadai sawchapawpa Selumie a châ.

²⁰ Kâdâ chi hyutuhpa cha Due sawchapawpa Eliasaphâ a châ.

²¹ Chatawhcha Kôhâ pathlazy ta hmobaoh pathaihpazy a sypa ta pua ei ta, zawpi ama tlô hlâta achhyna byureih cha padua khaipa a châ.

²² Cha khai tawhta Epharai py liata a ypazy a py py ta pua ei ta, ama hyutuhpa cha Amihu sawchapawpa Elisâmâ a châ.

²³ Manase chi hyutuhpa cha Pedazu sawchapawpa Kâmalia a châ.

²⁴ Benzami chi hyutuhpa cha Kidiôni sawchapawpa Abidanâ a châ.

²⁵ A hnôh chaipa ta Dânâ py liata a ypazy a py py ta pua ei ta, ama hyutuhpa cha Amisadai sawchapawpa Ahieze a châ.

²⁶ Asera chi hyutuhpa cha Ôkarâ sawchapawpa Pâkie a châ.

²⁷ Nâthalai chi hyutuhpa cha Enâ sawchapawpa Ahirâ a châ.

²⁸ Cha hawhna chata Izarei sawzy cha a py py ta pua ei ta, ama sie lymâ.

²⁹ Mawsi puhpa Midia chyhsa Rue sawchapawpa Hôbâ hnohta Mawsi ta, “Abeipa ta, ‘Ei cha pie aw ei,’ a tahpa su lâ eima pangai hai. Abeipa ta Izarei sawzy châta hmo phapa bie a taih ha ta, chavâta eima hnohta vaw sie hra teh, a pha ngaitapa ta na chô liata eima tao aw,” tah ta.

³⁰ Hôbâ ta Mawsi hnohta, “Vaw sie aw va na, ei râh nata ei chiheihzy lâ tlao ei lie aw,” tah ta.

³¹ Mawsi ta, “Rie miah siesai khah y. Râhchawhpa liata riehmo eima tao nawpa su a pahnopa châ chi ta, eima châta mokhaoh na châ aw.

³² Eima hnohta na sie hra khiahta cha, Abeipa ta eima chô liata hmopha a taopa hawhta na chô liata eima tao hra aw,” tah ta.

³³ Chatanachata Abeipa tlâh tawhta pua ei ta, noh thôh lâsie taih sie ei ta. Amâ pahâ nawpa su tlua awpa ta, Abeipa Biehrai Byh cha noh thôh chhôh ama hmia lâta sie ta.

³⁴ Ama riehmo tawhta ama pua nahta, Abeipa meihdo cha nohchhô ta ama chô liata y ta.

³⁵ Byh a puana maihta Mawsi ta, “Hy Abeipa, vaw thyu mah y; Na chariahpazy papaipa ta y ei sala, Châ haotuhpazy na hmiakô tawhta a râpai mawh ei sy,” tah ta.

³⁶ Byh â pahâna maihta, “Hy Abeipa, vaw kua la, Izarei saw thysâh hluhpi lâ vaw kua heih mah y,” a tah tyh.