MALUHREINA 1 - Mara Bible RV (BSI)

Sinai tlâh liata maluh reina

¹ Izi râh ama puasai tawhta kô nona, thla nona, noh khana noh ta, Sinai râhchawhpa liata ahmaohna poh o liata Abeipa ta Mawsi bie a chho ta, a hnohta,

² “Izarei sawzy maluhpi reih la, a pho pho ta nata a chhôh chhôh ta chapaw maluh zydua paki teh.

³ Kô kih tawhta chô lâ Izarei saw adyuhna lâ sie thei awpa zydua cha, nâ nata Arawna ta a hlao hlao ta ama maluh nama reih khai awpa a châ.

⁴ Chi kha tawhta pakha lymâ ta, chi hyutuhpazy ta ama cha bao aw.

⁵ Hezy he châ bao awpa mohzy a châ: Rubena chi tawhta Seidia sawchapawpa Elizu;

⁶ Simeôna chi tawhta Zurisadai sawchapawpa Selumie;

⁷ Zudâh chi tawhta Aminadâ sawchapawpa Nâsaw;

⁸ Iskâra chi tawhta Zuâ sawchapawpa Nethane;

⁹ Zebulawna chi tawhta Helô sawchapawpa Eliabâ;

¹⁰ Zawsi pathla Epharai chi tawhta Amihu sawchapawpa Elisâmâ, Manase chi tawhta Pedazu sawchapawpa Kâmalia;

¹¹ Benzami chi tawhta Kidiôni sawchapawpa Abidanâ;

¹² Dânâ chi tawhta Amisadai sawchapawpa Ahieze;

¹³ Asera chi tawhta Okarâ sawchapawpa Pâkie;

¹⁴ Kâdâ chi tawhta Due sawchapawpa Eliasaphâ;

¹⁵ Nâthalai chi tawhta Enâ sawchapawpa Ahirâ.

¹⁶ “Âmo cha zawpizy hry tawhta atlypazy châ ei ta, âmo pathlatuhpa chi liata hyutuhpa, Izarei pho luhpazy ama châ,” tah ta.

¹⁷ Mawsi nata Arawna ta ama moh reipa sahlaozy cha a chhi ei ta,

¹⁸ thla nona noh khana noh ta zawpi zydua awpakhy khai ei ta, a pho pho ta nata a chhôh chhôh ta ama pathlatuhpazy moh reih lymâ ei ta, ama moh hluhna zie ta, kô kih tawhta chô lâ zydua ama maluh reih khaipa a châ.

¹⁹ Abeipa biepiepa hawhta, Mawsi ta Izarei sawzy maluh cha Sinai râhchawhpa liata reih ta.

²⁰ Izarei sawchapaw uhtheipa Rubena pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

²¹ Rubena pathla tawhta 46,500 ama châ.

²² Simeôna pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

²³ Simeôna pathla tawhta 59,300 ama châ.

²⁴ Kâdâ pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

²⁵ Kâdâ pathla tawhta 45,650 ama châ.

²⁶ Zudâh pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

²⁷ Zudâh pathla tawhta 74,600 ama châ.

²⁸ Iskâra pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

²⁹ Iskâra pathla tawhta 54,400 ama châ.

³⁰ Zebulawna pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

³¹ Zebulawna pathla tawhta 57,400 ama châ.

³² Zawsi pathla tawhta Epharai pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

³³ Epharai pathla tawhta 40,500 ama châ.

³⁴ Manase pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

³⁵ Manase pathla tawhta 32,200 ama châ.

³⁶ Benzami pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

³⁷ Benzami pathla tawhta 35,400 ama châ.

³⁸ Dânâ pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

³⁹ Dânâ pathla tawhta 62,700 ama châ.

⁴⁰ Asera pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

⁴¹ Asera pathla tawhta 41,500 ama châ.

⁴² Nâthalai pathlazy ama chhâ yzie hawhta, a pho pho ta nata a chhôh chhôh ta moh pakipa châ ta, kô kih tawhta chô lâ adyuhna lâ sie thei awpa zydua cha,

⁴³ Nâthalai pathla tawhta 53,400 ama châ.

⁴⁴ Chazy cha ama maluh rei theipa, Mawsi nata Arawna ta Izarei chi hrawh hleinozy vyuhpa ta atlypa hyutuhpazy chhaota ama reipa maluh a châ.

⁴⁵ Chatanachata Izarei saw kô kih tawhta chô lâ, Izarei pheisaih châpa ta adyuhna lâ sie thei awpa zydua maluh cha reih ei ta,

⁴⁶ ama zydua ta 603,550 ama châ.

Livai chizy

⁴⁷ Livai chi deikua cha, âmo chi eih ta Izarei saw hry liata rei hrapa châ veih ei.

⁴⁸ A chhâpa cha Abeipa ta Mawsi hnohta,

⁴⁹ “Livai chi deikua cha ama maluh reih leipa aw chi ta, Izarei sawzy hry liata ama maluh na pahlao awpa châ vei.

⁵⁰ Livai pathlazy cha Biehrai byureih mohôhtuhpa nata a hmobaoh zydua nata cha liata hmo a ypa zydua a mohôhtuhpa ta na rao awpa ei a châ. Achhyna byureih nata a hmobaoh zydua a sy tyh aw ei ta, mohôh aw ei ta, achhyna byureih kiapâh liata a rie aw ei ta, ama ypâ tyh aw.

⁵¹ Achhyna byureih pasie awpa a châ khiahta cha, Livai pathlazy ta phie aw ei ta, achhyna byureih parai awpa a châ tita chhao, Livai pathlazy ta ama parai tyh aw. Chyhsa zawrâpa ta achhyna byureih â hnia khiahta cha thie awpa a châ.

⁵² Izarei sawzy cha a py py ta, âmo riehmo chyu liata nata âmo pheisaih py su chyu liata ama poh o ama rai aw.

⁵³ Livai pathlazy deikua cha, Izarei zawpi chô liata hiehâhna a vaw tlô lei nawpa ta, Biehrai byureih chheipâh liata ama poh o ama rai aw. Livai pathlazy cha Biehrai byureih mohôhtuhpa ama châ aw,” tahpa ta a rei hapa vâta a châ.

⁵⁴ Cha hawhna chata Izarei sawzy ta tao ei ta, Abeipa ta Mawsi bie a piepa hawhta a zydua ta tao ei ta.