MALAKHAI 3 - Mara Bible RV (BSI)

Abeipa lyuhchâpa

¹ “Moh teh u, ei hmia lâta lâpi a chhuahdy awpa ta, ei lyuhchâpa ei vaw tuah aw. Nama tluapa Abeipa cha ano Achhyna o lâ eikhapi ta â vy aw. Moh teh u, nama tlaichhaipa biehrai lyuhchâpa cha â vy hai,” Pheisaihzy Abeipa ta a tah.

² Châhrasala ahy ma â vyna noh liata pachyu thei aw ta, â vaw luah tita a duah thei aw? Ano cha patina mei hawhta châ ta, chysia pasutuhpa sâhbaw hawhta a châ.

³ Tâkâ pathaituhpa nata a thlipasohtuhpa hawhta a tyuh aw ta, Livai pathlazy cha pathaisa aw ta, ngôh nata tâkâ a thlipasohpa hawhta âmo cha a thlipasoh aw ta, siana ta Abeipa lâta hmohlâpazy ama hlâ aw.

⁴ Chatanachata Zudâh nata Zerusale hmohlâpazy cha, hlâno nohzy nata hlâno kôzy hawhna khata Abeipa châta palôhtlâh chhihpa hmo a châ heih aw.

⁵ “Pachia awpa ta châ vaw hnia aw ei na ta, dyuthaipazy, apheipazy, haipa ta bie â taihpazy, ama raihriatuhpazy hlao â dopa ta a pie leipazy, nôhmei nata hara a tlybaipazy, chihropa nama hry liata a ypazy chô liata adoleipa ta hmo a taopazy nata nâ chi leipazy châta, a chatliepa ta âmo a leihtuhpa ei châ aw,” Pheisaihzy Abeipa ta a tah.

Khazohpa hmo parupa

⁶ “Kei he Abeipa châ na ta, anano beih va na. Chavâta, Hy nâmo, Zakaw pathlazy saih u, pahleipadia khaipa ta nama y leipa a châ hih!

⁷ Châ pathlatuhpazy daihti tawhna khata, ei biepiepazy tleisai tyh ei chi ta, zyh veih ei chi. Kei lâ vaw kua u la, nâmo lâ ei vaw kua aw,” Pheisaihzy Abeipa ta a tah. “Châhrasala nâmo ta, ‘Kheihta ma eima vaw kua aw?’ nama tah.

⁸ Chyhsapa ta Khazohpa a hrao aw ma? Nâmo deikua ta cha eina hrao tyh ei chi. Châhrasala nâmo ta, ‘Kheih ta ma eima cha hrao tyh?’ nama tah. Su hrawh su kha nata thyunazy liata eina hrao tyh ei chi.

⁹ Eina hrao ngâ thlâh hapa vâ ei chi ta, nama râh dua ta chhiesana ry liata nama y.

¹⁰ Ei o liata nie awpa a y thei nawpa ta, su hrawh su kha zydua cha thyupakhyna o liata vaw cheih teh u. Cha hawhta nama tao khiahta cha, nama châta vârâh opyzy pahypa ta, nama so nawpa a y khao leina taihta byhnâzy ei cha vaohei ei ma, vaohei veih ei ma, na pasia teh u,” Pheisaihzy Abeipa ta a tah.

¹¹ “Arievazy ta nama chhaohlei theizy ama nie lei nawpa ta pakhâ aw ei na ta, nama sadô liata kre zôhzy pathei leipa ta y aw vei,” Pheisaihzy Abeipa ta a tah.

¹² “Chatanachata râh zydua ta nohlaopa cha tah aw ei ta, râh khochhih ngaitapa nama châ aw,” Pheisaihzy Abeipa ta a tah.

¹³ “Eina chakhiana ei chi biezy a pasa ngaita,” Abeipa ta a tah. “Châhrasala nâmo ta, ‘Kheihta ma nâma chakhiana biezy cha eima reih?’ nama tah.

¹⁴ ‘Khazohpa chakaopa he hraoleipa dei a châ. A biepiepazy eima zyhpa nata mâchhiesapazy hawhta Pheisaihzy Abeipa hmiakô liata eima y tyhpa heta khâpa phahnaina ma a hnei tly?

¹⁵ Tahmâ cha apalaipazy nohlaopa tah pi ta, moleipazy hra ta ama hneirôhpa dei châ leipa ta, Khazohpa pasia ei ta amâ boh thlâh haw,’ nama tah.”

Atheithlâhna Châbu

¹⁶ Chatawhcha Khazohpa a chipazy cha a chhohia raihrie ei ta, Abeipa ta ama biereipazy nathliepa ta thei ta. Chatanachata Abeipa a chipa nata a moh a pasâhsapazy atheithlâhna châbu cha a mohmô liata ropa a châ.

¹⁷ “Ei ryu sôhpazy ei paki ti ei ta, kei eih châ aw ei ta, paw ta ano palôh a hmôpa a sawchapawpa a hrôbiehpa hawhta âmo cha ei hrôbieh aw ei,” Pheisaihzy Abeipa ta a tah.

¹⁸ Chatanachata mosiapa nata moleipa likah ananona nata Khazohpa a chakaopa nata a chakao leipa likah ananonazy nama hmô heih aw.