MALAKHAI 1 - Mara Bible RV (BSI)

¹ He he Malakhai hmâpa ta Izarei hnohta Abeipa bie a vaw tlôpa biephuah a châ.

Abeipa ta Izarei kyh a pachâ

² “Kyh ei cha pachâ ei” Abeipa ta a tah. Châhrasala nâmo ta, “Kheih hawhta ma kyh cha miah na pachâ?” nama tah. “Esaw kha Zakaw unawhpa châ vei ma? Châhrasala Zakaw kyhpachâ na ta,

³ Esaw deikua cha ei hao. A tlâhpizy roryhrapa ta soh na ta, a ryutozy cha râhchawhpa savaizy ei pie ha ei,” Abeipa ta a tah.

⁴ Edômâ ta, “Parao khaipa châ pi ta, châhrasala araopazy cha eima padua pathi heih aw,” tah hrasa la, Pheisaihzy Abeipa ta hetana heta a tah: “Ama padua ngyu ma, châhrasala phie aw na ta, ‘râh moleipa,’ nata ‘Abeipa hiehâhna chhâzaw ta a topa phopi,’ tahpa ta awpa ama châ aw.”

⁵ Cha cha nama mokhaoh cheingei ta hmô aw ei chi ta, “Abeipa he Izarei râh khô lâ taih chhao ta a rônah tlai na,” nama tah aw.

Seina a hneipa hmohlâpazy

⁶ “‘Sawchapaw ta a paw palyupalih ta, sei ta a zibeipa a palyupalih. Nâmo, theihthaipa, ei moh nâ pachhietuhpazy saih u, paw ei châ khiahta cha, ei phuhpa palyupalihna cha khataih liata ma a y? Zibeipa ei châ khiahta cha, ei phuhpa chizana cha khataih liata ma a y?’ Pheisaihzy Abeipa ta a cha tah ei. Châhrasala nâmo ta, ‘Kheihta ma na moh cha eima cha pachhie?’ nama tah.

⁷ Ei maisâh liata viahchhâ papuapalei chiehpa nama hlâ tyhpa liata ei moh nama pachhie tyh. Châhrasala nâmo ta, ‘Kheihta ma eima cha papuapalei?’ nama tah. ‘Abeipa tlâhkhai cha reipachhie theipa a châ thlâh ha bao na,’ nama tahpa liata eina papuapalei ei chi

⁸ Atheihna châta sahroh mochaopa nama hlâ khiahta cha, moleina châ vei ma? Asypa nata apasapa nama hlâ khiahta cha, moleina châ hra vei ma? Cha hawhpazy cha nama râh ryureituhpa hnohta pie tua rai u, nama chô liata â ly aw ma? A châ pyh aw ei ma?” Pheisaihzy Abeipa ta a tah.

⁹ “Miah a ngiachhie thei nawpa ta, tahmâ Abeipa khokheina hiah teh u. Kha hawhpa hmohlâpazy nama ku tawhta nama hlâ chhôh zydua cha, a châ pyh thei nah ei ta nama pangiasa ma?” Pheisaihzy Abeipa ta a tah.

¹⁰ “Aw, pakha chhâ ta ei ochhizy khaw ha u la cha, hraoleipa ta ei maisâh liata mei nama pati ngâ kaw lei awpa tlai,” Pheisaihzy Abeipa ta a tah. “Nama chô liata ei palôh tlâh vei, chavâta nama ku tawhta hmohlâpa a pyh aw va na,” Pheisaihzy Abeipa ta a tah.

¹¹ “Noh chhina tawhta noh tlana taihta phopizy hry liata ei moh palyupalihpa ta y aw ta, su to liata ropahâhpa nata hmohlâpa pathaihpazy ei moh ta ama hlâ tyh aw. Phopizy hry liata ei moh palyupalihpa ta a y aw,” Pheisaihzy Abeipa ta a tah.

¹² “Châhrasala nâmo ta, ‘Abeipa tlâhkhai cha papuapaleipa châ ta, cha liata theilâpa nata niepazy chhao khâpasaw ta rei lei theipa a châ,’ nama tahpa liata ei moh cha nama papuapalei tyh.

¹³ ‘Cha thachhâ â chhih rimâ cha!’ tah ei chi ta, nama hnapasu nama tô chiepa liata ei moh nama papuapalei haw,” Pheisaihzy Abeipa ta a tah. “Nama parupa sahroh, asypa nata apasapazy vaw cheih ei chi ta, atheihna châta nama hlâ tyh. Nama ku tawhta ei châ pyhpa aw ei ma?” Abeipa ta a tah.

¹⁴ “A sahroh zaw hry liata seina hnei leipa a chapawpa hnei thlâh ha tlôh ta, cha cha pie awpa ta bie chhao a vaw taih ha ta, hnôhlâ ta seina a hneipa sahroh Abeipa lâta a hlâpa, dôvei hmâhpa chyhsa cha chhiesapa ta a y aw. Kei he Bei rônahpa châ na ta, ei moh he phopizy hry liata chizapa ta a y aw,” Pheisaihzy Abeipa ta a tah.