MÂKA 9 - Mara Bible RV (BSI)

Hmia nanona

¹ Zisu ta ama hnohta, “Hmeiseihta ta ei cha chho ei, he a duahpa sahlaozy hry liata, Khazohpa khinarâh hmotaotheina chhaota a vaw tlôpa ama hmô hlâlei cha, thina a padi lei awpa ama y,” tah ta.

² Noh charu khai tawhta Zisu ta Pity, Zâmie nata Zawhâna zy a chhi ta, âmo dei ta tlâh sâhpa lâ khykhei ta. A hmiaphao cha ama hmiakô liata a vaw nano ha ta.

³ A chysiazy cha a thlaraw vaw sie ta, alei chô liata chysia pasutuhpazy ta ama padiehsa theipa hlâ syulyu ta vaw dieh via ha ta.

⁴ Elaizâh nata Mawsi ama hnohta a vaw luah ei ta, Zisu cha bie a chho ei ta.

⁵ Pity ta Zisu hnohta, “Pachutuhpa, he liata ypa he eima châta a pha na. Byureih miathôh, nâma châta miakha, Mawsi châta miakha, Elaizâh châta miakha tu ei suh u,” tah ta.

⁶ Chi kaw ei ta, Pity cha bie hropa rei awpa pahno leipa ta.

⁷ Chatawhcha meihdo ta âmo cha vaw khu ta, meihdo tawhta ao vaw pua ta, “He he ei Sawchapaw, kyh ei pachâpa a châ. A bie nathlie teh u,” tah ta.

⁸ Thlai mohmia pasaih ei ta, Zisu dei leipa cha, ama hnohta ahy hmah hmô khao leipa ei ta.

⁹ Tlâh tawhta ama za chô nota, athihpa hry tawhta Chyhsa Sawchapawpa a thyu heih hlâlei cha, hmo ama hmôpazy ahy hmah chho lei awpa ta âmo cha biepie ta.

¹⁰ A bie reipa cha a vao thlâh ha ei ta, athihpa hry tawhta thyuheihpa cha khâpa tahna ma a châ tly, tahpa ta a hiahri raihrie ei ta.

¹¹ Pachupazy ta a hnohta, “Khazia ryhpa pachutuhpazy ta Elaizâh â vy tua awpa a châ ama tah tly?” tahpa ta hiahri ei ta.

¹² Zisu ta ama hnohta, “Hmo to zydua tao pathi awpa ta Elaizâh cha â vy tuapa tlai a châ. Cha khiahta la, Chyhsa Sawchapawpa cha pasana hluhpi tao aw ta, mohnaopa ta a y awpa kyh cha, khâpa vâta ropa ma a châ?

¹³ Châhrasala ei cha chho ei, Elaizâh cha a thâtih ropa hawh tlai ta a vy ha ta, ama khozie hawhta a chô liata ama taopa kha a châ,” tah ta.

Zisu ta thlahpa puapa a hneipa hawti a patlâh

¹⁴ A pachupa hropazy yna ama za tlô nahta, ama kiapâh liata zawpi hluhpi hmô ei ta. Ryhpa pachutuhpazy nata pachupazy cha bie a ei ngâ kaw ei ta.

¹⁵ Zawpi zydua ta Zisu ama hmôpa nahta, noâh tah kaw ei ta. Ano lâ thlai a râpa ta, a naoh ei ta.

¹⁶ Zisu ta ama hnohta, “Ryhpa pachutuhpazy nata khâpa bie ma namâ ei?” tah ta.

¹⁷ Zawpi hry liata pakha ta, “Pachutuhpa, ei sawchapawpa nâ lâ ei vaw chhi. Ei sawchapawpa he thlahpa hnei ta, cha thlahpa chata reih pathlie thei leipa ta a tao haw.

¹⁸ Thlahpa ta a patuna maihta, taikhy ta, a pakah buchaphy tla ta, a hâhzy charieh ta, a pôhpa a vaw pala khai ha tyh. Thlahpa puapa cha papua awpa ta, na pachupazy a haw ei na ta, châhrasala papua thei veih ei,” tah ta.

¹⁹ Zisu ta âmo cha a chhy ta, “Hy ngiapâleipa chhâ saih u, khachâ ma nama hnohta ei y aw? Khachâ ma ei cha pachâ thai aw ei? Kei lâ a vaw chhi teh u,” tah ta.

²⁰ Hawtipa cha ano lâ a vaw chhi ei ta. Zisu a hmôpa nahta, thlahpa ta hawtipa cha a rie thlai patheisa ta, alei liata pao ta, a hluah ta, a pakah buchaphy tla ngâ kaw ta.

²¹ Zisu ta a paw hnohta, “He hawhta a vaw y pathaona he khachâ a châ haw?” tah ta. A paw ta, “A hawtita tawhta a châ.

²² Pahleipadia awpa ta ei hluhpi mei liata zy, ti liata zy a papaosa tyh. Khâpa chhâ na tao thei khiahta la, miah ngiachhie la, miah bao mah y,” tah ta.

²³ Zisu ta a hnohta, “‘Na tao thei khiahta la,’ na tah ma! Ngiapâtuhpa châta cha, ato tao theipa a châ,” tah ta.

²⁴ Hawtipa paw cha thlai awh ta, “Ei ngiâpâ na, ei ngiapâleina liata na bao mah y,” tah ta.

²⁵ Zawpi amâ vaw râpakhy haipa Zisu ta a hmô nahta, thlahpa puapa cha ra ta, a hnohta, “Nâ, reih pathlie thei leina nata nahpâna thlahpa, bie ei cha pie, a chhôh tawhta vaw pua la, a ngia heih khao khah y,” tah ta.

²⁶ Thlahpa puapa cha awsâh ta, hawtipa cha thata a taochhie khai tawhta pua ha ta. Hawtipa cha athipa hawhta vaw y ta, chyhsa hluhpi ta, “A thi hapa he,” tah ei ta.

²⁷ Zisu ta a ku patu ta, pathyu ta, a vaw duah ha ta.

²⁸ O chhôh lâ â ngia nahta, a pachupazy ta, “Khazia keimo ta thlahpa puapa eima papua thei vei?” tahpa ta arulâta hiahri ei ta.

²⁹ Zisu ta ama hnohta, “He hawhpa he cha thlahchhâna nata kâhvileina dei leipa ta cha, khâpa ta hmahta papua thei vei,” tah ta.

Zisu ta a thina nata a thyuheihna kyh a reih chhielie heih

³⁰ Cha su tawhta pua ei ta, Kâlili râh chapiapa ta sie ei ta. Ahy hmahta a sievawna ama pahno awpa khoh leipa ta.

³¹ A pachupazy cha pachu ta, ama hnohta, “Chyhsa Sawchapawpa he chyhsazy ku liata hlâpa châ aw ta, thie aw ei ta, ama thie tawhta noh thôh noh ta a thyu heih aw,” tah ta.

³² Châhrasala a bie reipa cha a pachâ nawpa rai pahno veih ei. Ano hra cha hiahri ngâh tlôh leipa ei ta.

Ahy ma rônah chai aw?

³³ Kâpynia khih tlô ei ta. O chhôh liata a y nota ama hnohta, “Lâpi liana kha khâpa bie ma namâ ei tly?” tah ta.

³⁴ Ahy ma a rônah chai aw tahpa lâpi liata amâ vaw ei laihpa vâta, phie a chalih khai ha ei ta.

³⁵ A tyuh ta, pahrawh hleinozy cha aw ta, ama hnohta, “Ahy rai a hmiatua chaipa a châ khoh khiahta cha, chyhsa zydua hlâta hnôh chaipa ta a y awpa châ ta, chyhsa zydua chakaotuhpa ta a y awpa a châ,” tah ta.

³⁶ Hawtipa pakha la ta, ama hry liata paduasa ta, a bâh liata a pyh ta, ama hnohta,

³⁷ “Ahy rai ei moh ta he hawhpa hawti pakha chhao a lypa cha, keima nâ lypa a châ. Keima nâ lypa cha, keima nâ lypa châ leipa ta, nâ tuahtuhpa a lypa tlao a châ,” tah ta.

Miah a dyuh leipa cha keimo chhâh â châ

³⁸ Zawhâna ta a hnohta, “Pachutuhpa, chyhsa pakha na moh ta ahripa a papuapa hmô pi ta, miah a pazi leipa vâta eima pakhâ haw,” tah ta.

³⁹ Zisu ta, “Pakhâ khuh vy. Chyhsa ahy rai ei moh ta hmonoâhpa a taopa cha, hnôhlâ ta thlai na reipachhie pazi aw vei.

⁴⁰ Ahy rai miah a dyuh leipa cha eima chhâh a châpa a châ.

⁴¹ Hmeiseihta ta ei cha chho ei, ahy rai Krista moh vâta ti nyu kha châ padopa cha, a lymâ pahlei cheita aw vei.

Molei awpa ta reipasaonazy

⁴² “Ahy rai, he nâ ngiapâtuhpa hawtizy hry liata pakha chhao a pahluasapa cha, a rao liata charona lô laipa paaopa ta tilaipi liata thypa châ sala ano châta a pha via aw.

⁴³ Na ku ta a cha pamoleisa khiahta cha, tai ha mah y. Ku miano ta Kehenâ lâ sie awpa hlâta cha, ku miakha chôpa ta hrona liata a ngiapa na châta a pha via.

⁴⁴ Kehenâ liata cha ama lôpa thi beih leipa ta, mei chhao pachhaipa ta y beih vei.

⁴⁵ Na phei ta a cha pamoleisa khiahta cha, tai ha mah y. Phei no hneipa ta Kehenâ lâ thypa châ awpa hlâta cha, pheisypa ta hrona lâ a ngiapa na châta a pha via.

⁴⁶ Kehenâ liata cha ama lôpa thi beih leipa ta, mei chhao pachhaipa ta y beih vei.

⁴⁷ Na mo ta a cha pamoleisa khiahta cha, thaoh ha mah y. Mo no hneipa ta Kehenâ liata thypa châ awpa hlâta cha, mo kha hneipa ta Khazohpa khinarâh lâ a ngiapa na châta a pha via.

⁴⁸ Kehenâ liata cha, ama lôpa thi beih leipa ta, mei chhao pachhaipa ta y beih vei.

⁴⁹ Chyhsa to mei ta pasiapa châ aw ei ta, atheihna to alôh ta pa-iahpa a châ aw.

⁵⁰ Alôh cha a pha, châhrasala alôh cha a padâh ha khiahta cha, kheihta ma nama pa-iahsa heih thei aw? Alôh hawhta iah u la, a dyryh kawpa ta y muh vy,” tah ta.