MÂKA 8 - Mara Bible RV (BSI)

Sâh palih rih a pabie

¹ Cha nohzy liata, zawpi hluhpi a vypakhy heih ei ta, nie awpa khâpa hmah hnei leipa ei ta. Zisu ta a pachupazy aw ta, ama hnohta,

² “Zawpizy he tahmâ noh thôh tlai ei hnohta y ha ei ta, nie awpa khâpa hmah ama hnei leipa vâta, tha ei pasa ngaita ei.

³ Nie leipa ta ama o lâ ei padisa khiah ei ta cha, thokhazy cha amâ vyna a hla tlôh ta, lâpi liata ama panao aw,” tah ta.

⁴ A pachupazy ta a chhy ei ta, “He zie chyhsa nie awpa ta, he su dâhthlohpa liana heta kheihta ma viahchhâ eima hnei thei aw?” tah ei ta.

⁵ Zisu ta, “Viahchhâ tlâ khazie nama hnei?” tah ta. “Tlâ sari,” tah ei ta.

⁶ Zawpizy cha alei liata patyusa ta. Viahchhâ tlâ sari cha la ta, alyna bie a rei khai nahta, eichheih ta, zawpizy rai awpa ta, a pachupazy cha pie ta. Pachupazy ta zawpizy cha rai ei ta.

⁷ Nga dipa chhao a chyhta hnei ei ta. Byhnâ a aw khai nahta, cha chhao cha zawpizy rai awpa ta a pachupazy chho ta.

⁸ Nie ei ta, ama rih bie khai ta. Nie laibâhpa azôhpa chhao hrâbyh hmo sari tlai a huah ei ta.

⁹ A niepa zydua cha sâh palih rachhôh ama châ. Chatawhcha zawpizy cha pasiesa ha ta.

¹⁰ Zisu cha a pachupazy chhaota balyh thlai kiah ta, Dalmanuthâ râh lâ sie ha ta.

Ngiana amâ hnaw

¹¹ Phârisaihzy vaw pua ei ta, Zisu bie cha ei ei ta. Ano pasia nawpa ta, avâ tawhta ngiana ano liata tlua ei ta.

¹² Zisu cha a thlahpa ta thata a hrô ta, “He chhâ heta khazia ngiana a tlua tly? Hmeiseihta ta ei cha chho ei, he chhâ hnohna heta ngiana piepa châ aw vei,” tah ta.

¹³ Âmo cha siesai ta, balyh liata kiah ta, haosâ lâ chaka ha ta.

Phârisaih nata Herawda thinô

¹⁴ Pachupazy ta viahchhâ a phao awpa my ha ei ta, viahchhâ tlâ kha dei leipa ta cha, balyh liata ahropa rai hnei leipa ei ta.

¹⁵ Zisu ta pachupazy cha zikyu a râ ta, ama hnohta, “A hrohrua u la, Phârisaihzy thinô nata Herawda thinô tawhta a vaih teh u,” tah ta.

¹⁶ Pachupazy ta viahchhâ ama hnei leipa kyh reih ei ta.

¹⁷ Zisu ta ama biereipa cha pahno ta, ama hnohta, “Khazia viahchhâ nama hnei leipa kyh nama reih? Pahno thai to veih ei chi ma? Nama no a vâh to vei ma? Nama palôh kuh a chha thlâh ha chy ma?

¹⁸ Mokhaoh hnei ei chi ta, hmô veih ei chi ma? Nakhaoh hnei ei chi ta, thei veih ei chi ma? A thei khao veih ei chi ma?

¹⁹ Chyhsa sâh pangawh châta viahchhâ tlâ pangawh ei pachhaih nona khata, hrâbyh hmo khazie ma nie laibâhpa namâ huah khawh?” tah ta. Âmo ta, “Hmo hrawh hleino,” tah ei ta.

²⁰ “Cha khiahta la, chyhsa sâh palih châta viahchhâ tlâ sari ei pachhaih nona khata, a laibâhpa khazie namâ huah?” tah ta. Âmo ta, “Hmo sari,” tah ei ta.

²¹ Zisu ta ama hnohta, “Pahno thai to veih ei chi ma?” tah ta.

Besaidâ liata mochaopa a patlâh

²² Besaidâ khih tlô ei ta. Mochaopa Zisu lâ a vaw chhi ei ta, hria awpa ta a haw ei ta.

²³ Mochaopa cha a ku ta patu ta, khih tawhta puakhei ta, a mo liata a pachih pachhao ta, a chô liata a ku a pahnieh khai nahta, hiahri ta, “Khâpa chhâ na hmô ma?” tah ta.

²⁴ Chyhsa cha kaw ua ta, “Chyhsa hmô na ta, châhrasala tho a pasiepasâ ngâpa hawhta ei hmô,” tah ta.

²⁵ A mo liata a ku pahnieh heih ta, mohmia pasaih awpa ta chho ta, a mo vaw pavâpa ta, ato a sia ngaitapa ta hmô thei ha ta.

²⁶ Zisu ta, “Khih liata a ngia khah y,” tah ta, o lâta padisa ha ta.

Pity ta Zisu a palâhâh

²⁷ Zisu cha a pachupazy chhaota Kaisaria Philipi khihzy lâ sie ta. Lâpi liata ama sie nota, a pachupazy hnohta, “Chyhsazy ta ahy a châ eina tah ei?” tahpa ta hiahri ta.

²⁸ Âmo ta a chhy ei ta, “Bâtituhpa Zawhâna a châ, cha tah ei ta; thokha ta Elaizâh a châ, cha tah ei ta; thokha ta hrohsopa ahy tlyma a châ, ama cha tah,” tah ei ta.

²⁹ Zisu ta, “Cha khiahta la, nâmo zaw ahy a châ eina tah ei chi?” tah ta. Pity ta a chhy ta, a hnohta, “Mesia na châ,” tah ta.

³⁰ Zisu ta a thâtih cha ahy hmah chho lei awpa ta pachupazy cha biepie ta.

Zisu ta a thi nawpa nata a thyuheih nawpa kyh a reih chhielie

³¹ Zisu ta chyhsa Sawchapawpa cha hmo hluhpi pasa a tao awpa châ ta, machâzy, theihthai beizy nata ryhpa pachutuhpazy ta khoh leipa aw ei ta, thie aw ei ta, noh thôh khai tawhta a thyu heih awpa kyh a pachupazy pachu pathao ta.

³² Cha bie cha a sia ngaitapa ta reih ta. Pity ta Zisu cha a chhi nano ta, ra ta.

³³ Zisu cha a vaw palie ta, a pachupazy moh ta, Pity cha ra ta, a hnohta, “Sâtâ, ei hnôh lâ y teh! Khazohpa hmozy pachâ leipa chi ta, chyhsapa hmozy tlao na pachâ via he,” tah ta.

³⁴ Zawpizy cha a pachupazy chhaota ano lâ awpakhy ta, ama hnohta, “Ahy rai eina zi khoh khiahta cha, anosasyh a paky sala, a kraws a piapa ta na zi mawh sy.

³⁵ Ahy rai a hrona pabohsa a chhuahpa cha, a hrona pahlei aw ta, keima vâta nata thâtihpha vâta a hrona a pahleipa deikua cha, a hrona a pabohsa aw.

³⁶ Chyhsa ta khizaw he a pôhpalôhpa ta hnei sala, a thlahpa a pahlei tlôh khiahta cha, a châta khâpa a phahnai aw?

³⁷ Chyhsa ta a thlahpa vyuhpa ta khâpa a pie thei aw?

³⁸ Ahy rai, he apheihmâhpa nata moleipa chhâ liana heta, kei nata ei biezy a zakheipa maih cha, Paw rônahna nata vâlyuhchâpa pathaihpazy chhaota Chyhsa Sawchapawpa â zu tita, ano cha a zakhei hra aw,” tah ta.