MÂKA 7 - Mara Bible RV (BSI)

Taozietyhpa nata biepiepazy

¹ Phârisaihzy nata Zerusale tawhta a vypa ryhpa pachutuhpa thokhazy Zisu lâ amâ vypakhy nahta,

² a pachupa thokhazy cha ku a si leipa ta, ku puapa ta pati ama niepa hmô ei ta.

³ Phârisaihzy nata Zu chyhsa zydua cha, machâzy taozietyhpa zipa ta, ama ku a phapa ta amâ si ha tua leipa ta cha pati nie beih veih ei.

⁴ Chavâta sôhdaoh su tawhta o lâ amâ di tita, ama ngai amâ si ha tua leipa ta cha, pati nie veih ei. Taozietyhpa ama zyhpa hropa hluhpi y ta, nyuzy, beihzy, dawhbeihzy nata niena tlâhkhaizy pasinazie hawhpa taozietyhpa hluhpi ama chhypa a y hra.

⁵ Phârisaihzy nata ryhpa pachutuhpazy ta Zisu hnohta, “Khazia na pachupazy ta machâzy taozietyhpa zi leipa ta, ku puapa ta pati ama nie thlâh haw?” tahpa ta hiahri ei ta.

⁶ Zisu ta ama hnohta, “Isai ta nâmo, phapakheipazy kyh liata, “‘He phopi heta ama hmao ta na palyupalih ei ta, Ama pathipalôh deikua ta cha einâ hla kaw ei.

⁷ Chyhsapa biepiepazy cha, Biezyhpa hawhta pachu ei ta, Hraoleipa ta einâ chhy ei,’ tahpa ta a vaw chhochhieliepa kha â vaw do kaw tlai na.

⁸ Khazohpa biepiepazy siesai ei chi ta, chyhsa taozietyhpa tlao namâ patu,” tah ta.

⁹ Chatawhcha Zisu ta ama hnohta, “Nama taozietyhpa nama chhy lymâ thei nawpa ta, Khazohpa biepiepazy thy nawpa rypaohna nama pahno kaw!

¹⁰ Mawsi ta, ‘Na nô nata na paw palyupalih teh. Ahy rai a nô tlyma, a paw tlyma a reipachhipa cha a thi tlai awpa a châ,’ tah ta.

¹¹ Nâmo deikua ta, ‘Chyhsa ta a nô tlyma, a paw tlyma hnohta, “Keima tawhta na hmô awpa zydua cha, Khazohpa lâ ei hlâ khai haw,” a tah khiahta cha,

¹² a nô châta tlyma, a paw châta tlyma, khâpa hmah taopa awpa pasaih khao veih ei chi.

¹³ Cha hawhna chata nama taozietyhpa namâ pie pachhuah lymâpa hmâpa ta, Khazohpa bie hraoleipa ta nama tao tyh. Cha hawhpa cha hmo hluhpi nama tao,’” tah ta.

Hmo pathaih leipazy

¹⁴ Chatawhcha zawpizy ano lâ awpakhy heih ta, ama hnohta, “Nama zydua ta ei bie nathlie u la, pahno teh u.

¹⁵ Khôtho lâ tawhta chyhsa chhôh lâ a ngiapa khâpa hmo hmahta chyhsapa papuapalei thei vei. Chhôh lâ tawhta a kaw puapa ta chyhsapa cha tlao a papuapalei tyh.

¹⁶ Nakhaoh a hneipa maihta thei mawh sy,” tah ta.

¹⁷ Zawpizy cha o chhôh lâ â ngiasai tawhta, a pachupazy ta pakhona bie a reipa kyh hiahri ei ta.

¹⁸ Zisu ta ama hnohta, “Nâmo chhao taihta pahno thai veih ei chi mâ? Khôtho lâ tawhta chyhsapa chhôh lâ a ngiapa ta chyhsapa papuapalei vei.

¹⁹ Palôh liata a ngia leipa ta, pavyhpi liata a ngia ta, lyupâh puana lâta a pua ha tyh tahpa pahno veih ei chi ma?” tah ta. Cha hawhna chata Zisu ta niepa zydua a pathaih khaizie phuah ta.

²⁰ Chatawhcha Zisu ta, “Chyhsa chhôh tawhta a kaw puapa ta chyhsapa a papuapalei tyh.

²¹ Chhôh tawhta, chyhsapa pathipalôh tawhta, pachâna moleipazy a kaw pua tyh. Apatlana, paruna, lianycheina, apheina,

²² uahvana, chhiena, dôveina, parâna, kiaphaona, reipachhiena, apalaina nata hruna zy he palôh tawhta a kaw pua tyhpa a châ.

²³ Cha hmo zydua cha chhôh tawhta a kaw puapa châ ta, chazy chata chyhsa a papuapalei tyh,” tah ta.

Phônisia chanô ngiapâna

²⁴ Cha su tawhta Zisu cha thyu ta, Tyre nata Sidaw biazy chahryh ta. O miakha liata a ngia ta, ahy hmahta ama pahno awpa khoh leipa ta, châhrasala nyu thei awpa châ leipa ta.

²⁵ Chanô pakha, thlahpa puapa ta a sawchanô hawti a patu hapa ta Zisu thâtih cha thei ta, ano lâ thlai a vy ta, a phei thaby liata kei pao ta.

²⁶ Cha chanô cha Krikâh chyhsa, Suria râh Phônisia liata a pihpa a châ. A sawchanô tawhta ahripa papua awpa ta a haw ta.

²⁷ Zisu ta a hnohta, “Sawzy ama rih bie tua mawh sy. Sawzy ku liata viahchhâ chhu ta, izy piepa cha hmo yzie châ vei,” tah ta.

²⁸ Chanô ta a chhy ta, “A châ na, Abeipa! Châhrasala tlâhkhai ry liata izy chhao ta sawzy viahchhâ zôhpa a tlapazy cha ama nie tyh mâh tâh,” tah ta.

²⁹ Zisu ta a hnohta, “Na bie reipa vâna chata na o lâ a di mah y. Ahripa cha na sawchanô chhôh tawhta a pua haw,” tah ta.

³⁰ Chanô cha o lâ a di ta, rakhô liata a zia thlâh hapa hawtinô cha hmô ta, ahripa chata puasai ha ta.

Zisu ta nahpâpa a patlâh

³¹ Zisu cha Tyre nata Sidaw râh tawhta pua ta, Dekâpôli râh chapiapa ta Kâlili Tipo kei tlô ta.

³² Chyhsa pakha nahpâpa nata reih pathlie thei leipa ano lâ a vaw chhi ei ta, a chô liata a ku pahnieh awpa ta a haw ei ta.

³³ Zawpi hry tawhta ânano ta a chhi ta, a kuparozy ta a nakhaohzy cha hria ta, a pachih ta pachhao ta, a paleih hria ta.

³⁴ Avâ lâ moh ta, a hrô ta, a hnohta, “Ephâthâ,” tah ta, cha cha “A pahy teh,” tahna a châ.

³⁵ A nakhaohzy a vaw pahy ta, a paleih chahryna chhao a vaw pathlâ ta, a siapa ta bie reih thei ha ta.

³⁶ Zisu ta ahy hmahta chho lei awpa ta âmo cha biepie ta. Châhrasala a pakhâ via nahta, phahnai ngiah viapa ta pathâhsa via rili ei ta.

³⁷ Zawpizy cha rei thai leina taihta ama noâh ta, “Hmo to a tao phazie rimâ cha! Nahpâpa taihta patheisa ta, reih pathlie thei leipa taihta a pathliesa haw,” tah ei ta.