MÂKA 6 - Mara Bible RV (BSI)

Nâzari khih liata Zisu ama dytha

¹ Cha su tawhta pua ta, a khih lâ ngai ta, a pachupazy ta ano cha zi ei ta.

² Pahânoh ta pakhyna o liata pachu pathao ta. A bie a theituhpa hluhpizy cha ama noâh ngaita ta, “He chyhsa heta, he biezy he khataih tawhta ma a pahno tly? He chyhsa hnohta sona piepa he kheihawhpa sona ma a châ tly? Kha hawhpa hmonoâhpazy kha, kheihta ma a ku ta a tao thei tly?

³ He chyhsa he Zâmie, Zôse, Zudâh nata Saimaw zy unawhpa, Mâri sawchapawpa, tho zôthaipa kha châ vei ma? A sietanôzy chhao, he liata eima hnohta y thlâh ha veih ei ma?” tah ei ta. Chavâta a chô liata ama palôh châ leipa ta.

⁴ Zisu ta ama hnohta, “Hrohsopa cha, a khih nata a chiheih nata a chhôhkha liata tah leipa ta la, palyupalihna hlao leipa ta y beih vei,” tah ta.

⁵ Chavâta tlâhleipa chyhsa chyhtazy chô liata a ku pahnieh ta a patlâhpazy dei leipa ta cha, Nâzari khih liata hmonoâhpa tao thei vei.

⁶ Ama zo leina kyh liata noâh a tah ngaita. Chatawhcha khihzy chahryhpa ta, pachu lymâ ta.

Lyuhchâpazy tuana

⁷ Pahrawh hleinozy cha aw ta, pano lymâ ta tuah ta, thlahpa puapazy chô liata biehneina ama hnohta pie ta.

⁸ Chôchahrei dei leipa ta cha, khâpa hmah, viahchhâ tlyma, sahria tlyma, ama chaisaihna liata tâkâ tlyma a phao lei awpa ta, âmo cha biepie ta.

⁹ Pheiky deikua a kypa ta, viahkao zo no a ky lei awpa ta biepie hra ta.

¹⁰ Ama hnohta, “Khataih lia rai ta, nama tlôna o cha nama sie heih hlâlei puasai khuh vy.

¹¹ Châ ly leipa nata nama bie a nathlie khoh leipa khihzy cha, nama puasai tita, ama thaileichâna pahnosana châta nama phei liata buchadoh chatho thlu teh u,” tah ta.

¹² Chatanachata sie ei ta, ro awpa ta chyhsazy chho laih lymâ ei ta.

¹³ Ahripa hluhpi papua ei ta, tlâhleipa hluhpi sathaw thu ei ta, ama patlâh lymâ.

Bâtituhpa Zawhâna thina

¹⁴ Zisu cha a moh a pathâh kawpa vâta, Bei Herawda chhao ta a thâtih vaw thei ta. Thokhazy ta, “Bâtituhpa Zawhâna kha athipa hry tawhta thyu heih ta, chavâta he hmonoâhpa tao theina biehneinazy he ano liata a ypa a châ,” tah ei ta.

¹⁵ Ahropazy ta, “Elaizâh a châ,” tah ei ta. Ahropazy heih ta, “Hrohsopa na a châ, hrohsopa parohpa hry liata pakha a lyu,” tah ei ta.

¹⁶ Herawda deikua ta a thei nahta, “A luh ei tai hapa Zawhâna a vaw thyu heihpa a châ chuh,” tah ta.

¹⁷ Herawdâ ta a unawhpa Phili lapinô Herawdi cha lapinô ta a hneipa kyh liata, chyhsa tuah ta Zawhâna cha patusa ta, patâhna o liata chahryna chôta a khôpa kha a châ.

¹⁸ Zawhâna ta Herawda hnohta, “Na unawhpa lapinô na hneipa he ryhpa ta pasaih vei,” tahpa ta a chhopa vâta a châ.

¹⁹ Chavâta Herawdi ta Zawhâna cha a hao kaw ta, thie awpa khoh ta, châhrasala tao thei leipa ta.

²⁰ Herawda ta Zawhâna cha chyhsa siapa nata pathaihpa a châ tahpa a pahnopa vâta chi ta, a pabohsapa a châ. A bie a thei nahta, a nôpo kaw tyh ta, châhrasala a ly ngaitapa ta a nathlie pyly tyh.

²¹ Herawdi châta daihti rypaohpa vaw y ta. Herawda ta a pina noh liata a beimachâzy, a pheisaih hyutuhpazy nata Kâlili râh liata molaipazy châta kyhchhi tao ta.

²² Herawdi sawchanônô a vaw ngia ta, lâh ta, Herawda nata a hnohta a tyuhpazy cha palysa ngaita ta. Abei ta laihsa hnohta, “Na khopa maih na hiah teh, ei cha pie aw,” tah ta.

²³ A hnohta bie a taih ta, “Khâpa rai eina hiapa maih chi cha, ei râh khophie chhao châ sala, ei cha pie aw,” tah ta.

²⁴ Laihsa cha pua ta, a nô hnohta, “Khâpa ei hia aw?” tah ta. A nô ta, “Bâtituhpa Zawhâna luh,” tah ta.

²⁵ Laihsa cha abei lâ thlai a ngia ta, a hnohta, “Bâtituhpa Zawhâna luh beikoh liata sopa ta thlai eina pie awpa chi ta ei khoh,” tah ta.

²⁶ Abei cha a pachârôh ngaita ta, châhrasala chyhsa peimawhpa a hruapazy hmiakô liata bie â taih hapa vâta, laihsa hnohta bie a rei hapa cha parao khoh leipa ta.

²⁷ Abei ta pheisaih thlai tuah ta, Zawhâna luh vaw chei awpa ta biepie ta. Pheisaih cha vawh ta, Zawhâna luh cha patâhna o liata kei tai ta.

²⁸ Beikoh ta a luh cha vaw cheih ta, laihsa hnohta pie ta, laihsa ta a nô hnohta pie ta.

²⁹ Cha thâtih cha Zawhâna pachupazy ta ama pahno nahta, a ri la ei ta, thlâ liata ama pazia haw.

Sâh pangawh rih a pabie

³⁰ Lyuhchâpazy Zisu lâ vaw kua ei ta, ama hmotaopa nata pachupa kyh zydua Zisu chho ei ta.

³¹ Zisu ta ama hnohta, “Nâmo dei ta su dâhthlohpa lâ a vy u la, buakha a pahâ chy teh u,” tah ta. Chyhsa hluhpi ta zu heih, khy heih ama tahpa vâta, pati dâhdei chhao nie hmâ leipa ei ta.

³² Âmo deita ta su dâhthlohpa lâ cha balyh ta sie ei ta.

³³ Chyhsa hluhpi ta ama siepa cha hmô ei ta, âmo ama châ tahpa pahno ei ta, khih to tawhta phei ta a vaw râ chyu ei ta, tlô khâh ha ei ta.

³⁴ Zisu cha ngiahkâ lâ a pua nahta, zawpi hluhpi hmô ta, vaituhpa hnei leipa mietaku hawhta ama châpa vâta, âmo cha a tha pasa ngaita ta. Âmo cha hmo hluhpi pachu ta.

³⁵ Zâlâ a vaw châ nahta, a pachupazy ano lâ a vy ei ta, a hnohta, “He he su dâhthlohpa châ ta, zâlâ a châ ha hih.

³⁶ Ama nie awpa khâpa chhâ ma amâ kei chalei thei nawpa ta, zawpizy he eima chheipâh khihzy nata lyuzy lâ pasiesa teh,” tah ei ta.

³⁷ Zisu ta ama hnohta, “Nâmo ta nie awpa pie teh u,” tah ta. Âmo ta a hnohta, “Dinâri za no mâ ta viahchhâ kei chalei sih la ma, nie awpa cha âmo eima pie aw?” tah ei ta.

³⁸ Zisu ta ama hnohta, “Viahchhâ tlâ khazie nama hnei? Vawh u la, kei moh tua u,” tah ta. Ama hneipa zie ama pahno nahta, “Viahchhâ tlâ pangawh nata ngasa miano,” tah ei ta.

³⁹ Zawpizy cha sibiepa su liata a py py ta patyusa awpa ta a pachupazy cha biepie ta.

⁴⁰ Chatanachata a py py ta, za kha py ta zy, sypangawh py ta zy a tyuh ei ta.

⁴¹ Zisu ta viahchhâ tlâ pangawh nata ngasa miano cha la ta, avâ lâ ua ta, byhnâ aw ta. Viahchhâzy cha eichheih ta, zawpizy rai awpa ta a pachupazy pie ta. Ngasa mianopa cha pachhaih ta ama zydua ta rai ta.

⁴² Ama zydua ta nie ei ta, ama rih bie khai ta.

⁴³ Viahchhâ nata ngasa ama nie bâhpa chhao hrâbyh hmo hrawh hleino tlai a huah ei ta.

⁴⁴ Viahchhâ a nietuhpazy cha paw tlohpa sai ta sâh pangawh ama châ.

Zisu ti chô liata a sie

⁴⁵ Zawpizy a pasiesa chhôh ta, a pachupazy cha a hmia lâta, haosâ Besaidâ khih lâ balyh ta thlai pasiesa chhielie ta.

⁴⁶ Âmo a pasiesa khai nahta, thlahchhâ awpa ta tlâh lâ kiah ta.

⁴⁷ Zâlâ a vaw châ nahta, balyh cha tipo liah liata y ta, ano cha tlâh liata ano dei ta y ta.

⁴⁸ Thlih ta thata a supa vâta, balyh ama hiapa ama rie a thei kawpa ta hmô ta. Zâ vaina ei palihna rachhôh liata, âmo cha chapia a chhuahpa ta, tipo chô liata phei ta siepa ta, âmo cha kei pangai ta.

⁴⁹ Tipo chô liata phei ta a siepa ama hmô nahta, thlahmihpa khiah ma tah ei ta, thata sâh ei ta.

⁵⁰ Ama zydua ta hmô khai ei ta, ama chi ngaita. Zisu ta a pachupazy cha bie thlai a chho ta, ama hnohta, “Thlalôhpa ta y teh u; keima na ei châ. Chi khah u,” tah ta.

⁵¹ Ama hnohta balyh liata a ngia ta, thlih cha a chalih ha ta. A pachupazy cha ama noâh ngaita ta.

⁵² Ama palôh kuhchhapa vâta, viahchhâ kyh liata hmo a tlôpa kha ama pahno thai leipa a châ.

Kenesare liata tlâhleipa a patlâh

⁵³ Haosâ lâ ama chaka nahta, Kenesare râh kei tlô ei ta. Ngiahkâ liata ama balyh hraih ei ta.

⁵⁴ Balyh tawhta ama pua nahta, chyhsazy ta ano cha thlai pahno ha ei ta.

⁵⁵ Cha râh chaby zydua lâ thlai sie ei ta. A yna su ama pahnona lâ maih tlâhleipazy ama hmohphaw chhaota a vaw sy ei ta.

⁵⁶ Khitaw liata zy, khihpi liata zy, lyu liata zy, khataih lia rai ta a siena maihta, tlâhleipazy cha sôhdaoh su liata zy pazia ei ta, a poh pai chhâ hria awpa ta Zisu cha a haw ei ta, a hriapa maihta tlâh lymâ ei ta.