MÂKA 5 - Mara Bible RV (BSI)

Zisu ta ahripa patupa a patlâh

¹ Tipo haosâ Kerâsene râh tlô ei ta.

² Balyh tawhta a pua nahta, thlahpa puapa a hneipa chyhsa pakha thlâ su tawhta thlai vaw pua ta, Zisu cha a vaw tyh ta.

³ Cha chyhsa cha thlâ su liata a pahrâ tyhpa châ ta, ahy ta hmahta ama chahry thei khao leipa, bâlia chhao ta ama chahry thei leipa a châ.

⁴ Keihraizy daipa ta bâlia ta chahry tyh ei ta, châhrasala bâlia cha chhie ta, keihrai chhao a chaphie khai ha tyh. Ahy ta hmah kheihta hmah tao thei veih ei.

⁵ Chhô nah zâ ta thlâ su nata tlâh liata zy awh ngâ thlâh ha ta, anosasyh ta alôzy ta a â tyh ta.

⁶ Lâhlapi tawhta Zisu a hmôpa nahta, a kei râ ta, a hmiakô liata pao ta.

⁷ Ao paro ngaitapa ta awh ta, “Zisu, Khazohpa Chônôchaipa Sawchapawpa, ei chô liata khâpa tao awpa ma nâ chhuah? Khazohpa moh ta ei châ haw na, na taola khah y,” tah ta.

⁸ Zisu ta a hnohta, “Nâ, thlahpa puapa, chyhsa tawhta pua teh!” tah ta.

⁹ Zisu ta, “Na moh ahy?” tah ta. Ano ta, “Ei moh cha Zahluh a châ, mo hluhpi eima châ,” tah ta.

¹⁰ Cha râh tawhta papua lei awpa ta thata a haw ta.

¹¹ Tlâh baikhaihpa liata vao zaw ama lao chuahpa ta y ei ta.

¹² Thlahpa puapazy ta Zisu cha a haw ei ta, a hnohta, “Vaozy lâ hao miah papua la, âmo chhôh lâ miah pangiasa teh,” tah ei ta.

¹³ Zisu ta amâ hawna cha pasaih ta. Thlahpa puapazy cha pua ei ta, vaozy chhôh liana cha a ngia ei ta. Vao zaw cha sâh no dua châ ei ta, chhutla lâta tilaipi lâ a râ lymâ ei ta, tilaipi liata ama tlasao khai haw.

¹⁴ Vao pasatuhpazy cha a râ ei ta, cha thâtih cha khihpi liata nata khitaw zy liata reih ei ta. Hmo a tlôpa cha moh awpa ta zawpizy a vy ei ta.

¹⁵ Zisu kô ama kei tlô nahta, ahripa patupa, Zahluh kha chysia a tobipa ta, palôh sopa ta â tyu thlâh hapa hmô ei ta, chi ngaita ei ta.

¹⁶ A hmôtuhpazy ta ahripa patupa chô liata hmo a tlôpa nata vao thâtihzy cha âmo chho ei ta.

¹⁷ Zisu cha ama râh puasai awpa ta a haw ei ta.

¹⁸ Balyh a kia nahta, ahripa patupa khata Zisu hnohta y awpa ta a haw ta.

¹⁹ Châhrasala Zisu ta pasaih leipa ta a hnohta, “Na chyhsazy lâ vawh la, Abeipa ta na châta hmo rônahpa a taopa nata a cha ngiachhiezie zy kha na chyhsazy kei chho mah y,” tah ta.

²⁰ Chatanachata sie ta, Zisu ta a chô liata hmo a taopa rônahzie cha Dekâpôli liata pathâhsa ta, chyhsa to ama noâh ngaita ta.

Zairu sawchanô nata chanô thi lohpa patlâhna

²¹ Zisu cha balyh ta haosâ lâ chaka heih ta, tipo ngiahkâ liata a y nota, zawpi hluhpi ta vaw by ei ta.

²² Pakhyna o hyutuhpazy hry liata pakha, a moh Zairu ama tahpa a vy ta, Zisu a hmô nahta, a phei thaby liata pao ta,

²³ “Ei sawchanô hawtipa thi daihmâpa ta y ta. Tlâh sala, a hro thei nawpa ta, a vy la, a chô liata na ku vaw pahnieh mah y,” tahpa ta a haw chaimâh ta.

²⁴ Zisu cha Zairu hnohta vawh ta. Zawpi hluhpi ta pazi ei ta, ano cha chakho hôlô ei ta.

²⁵ Chanô pakha kô hrawh hleino thi lohpa y ta.

²⁶ Dawhty hluhpi ta mohôh ei ta, a hneina zydua a pahryuh khai tawh chhao ta pha viana hlâta tlao paru via rili ta.

²⁷ Cha chanô chata Zisu thâtih a thei nahta, zawpi hry liata a hnôh lâta pazi ta, a poh pai hria ta.

²⁸ “A poh pai chhâ ei hria khiahta cha, patlâhpa ta ei y aw,” tah ta.

²⁹ A thi lopa cha thlai a hâh ha ta, a hri ohpa tawhta patlâhpa a châ haw tahpa a pôhpa liata a vaw pahno ta.

³⁰ Zisu ta a chhôh tawhta hmotaotheina a pua tahpa a pahno nahta, zawpi hry liata thlai a vaw palie ta, “Ahy ei poh pai a hria?” tah ta.

³¹ A pachupazy ta a hnohta, “Zawpizy ta ama cha chakho hôlôpa hmô thlâh ha chi ta, cha hawhta a châpa tlai ta, ‘Ahy nâ hria?’ na tah thlâh hapa cha?” tah ei ta.

³² Zisu cha ano a hriatuhpa hmô a chhuahpa ta a heihhâ ta.

³³ Chanô cha a chô liata hmo a tlôpa cha pahnopa ta, chipa nata achalyuna chôta a vy ta, a hmiakô liata pao ta, a hnohta ato â dopa ta chho khai ta.

³⁴ Zisu ta a hnohta, “Ei sawchanô, nâ ngiapâna ta a cha patlâh haw. Thlalôhpa ta sie la, na pasana tawhta tlâh ha mah y,” tah ta.

³⁵ A rei hai nota, pakhyna o hyutuhpa o tawhta chyhsazy a vy ei ta, “Na sawchanô a thi haw. Khazia Pachutuhpa rie na pathei khoh tly?” tah ei ta.

³⁶ Zisu ta ama bie reipa cha a thei nahta, pakhyna o hyutuhpa hnohta, “Chi leipa la, a ngiapâ thlâh ha mah y,” tah ta.

³⁷ Pity nata Zâmie nata Zâmie unawhpa Zawhâna zy dei leipa cha, ahy hmahta ano zi awpa pasaih leipa ta.

³⁸ Pakhyna o hyutuhpa o cha kei tlô ei ta, Zisu ta zawpizy a tymâpa ta cha ei ta, ama sâh awh ngâpa hmô ta.

³⁹ A kei ngia ta, ama hnohta, “Khazia a tymâpa ta nama cha? Hawtinô he thi vei, â môpa dei a châ,” tah ta.

⁴⁰ Zawpizy ta pahneisao ei ta. Châhrasala zawpi zydua cha khôtho lâ papua khai ta, hawtinô paw nata nô nata a hnohta a ypazy a chhi ta, hawti yna lâ cha a ngia ei ta.

⁴¹ Hawtinô ku cha patu ta, a hnohta, “Tâlithâ kumi,” tah ta. Cha yzie cha, “Hawtinô, ei cha chho, thyu teh,” tahna a châ.

⁴² Hawtinô cha thlai thyu ta, sie thei ha ta. Hawtinô cha kô hrawh hleinopa a châ. Zawpizy cha ama noâh ngaita ta.

⁴³ Zisu ta cha thâtih cha ahy hnohta hmah pahnosa lei awpa ta zawpizy cha â i ngaitapa ta biepie ta. Hawtinô cha niepa pie awpa ta âmo cha chho ta.