MÂKA 4 - Mara Bible RV (BSI)

Chi hietuhpa pakhona

¹ Tipo kiah liata pachu heih ta. Zawpi hluhpi a hnohta a vypakhy ei ta, tipo liata balyh liata kiah ta, a chô liata a tyuh ta, zawpizy deikua cha tipo kiah liata y ei ta.

² Pakhona bie hmâpa ta hmo hluhpi âmo cha pachu ta. A pachu lymâna liata ama hnohta,

³ “Nathlie u la, moh teh u, chi hietuhpa cha chi hie awpa ta pua ta.

⁴ Chi cha a hie nahta, thokha lâpi liata tla ei ta, pavawzy a vy ei ta, dyh khai ha ei ta.

⁵ Thokha lôphiariapa, alei apana su liata tla ei ta, alei a chha leipa vâta thlai kaw pyuh ei ta,

⁶ châhrasala noh a sa nahta vaw aih ei ta, thari ama hnei leipa vâta ama uah haw.

⁷ Chi thokha cha ahloh hry liata tla ei ta, ahloh cha kaw lai ta, chiriepazy cha disao ei ta, pathei thei veih ei.

⁸ Chi hropazy cha alei phapa liata tla ei ta, pyuh ei ta ama laiseih lymâ. Thei pathei ei ta, a lie sythôh, a lie sycharu nata a lie za kha ta ama pôh lymâ,” tah ta.

⁹ Zisu ta, “Thei nawpa nakhaoh a hneipa maihta thei mawh sy,” tah ta.

Pakhona biezy ta â chhuahpa

¹⁰ Ano dei ta a y nota, a kiapâh ta a ypazy nata pahrawh hleinozy ta pakhona bie kyh hiahri ei ta.

¹¹ Zisu ta ama hnohta, “Khazohpa khinarâh bienyupa cha nama hnohta palâhâh hapa châ ta, khôtho chyhsazy châta deikua cha, ato pakhona bie ta reipa a châ.

¹² Chavâta, “Hmô cha hmô aw ei ta, Pahno thai aw veih ei; Thei cha thei aw ei ta, Ama novâh aw vei; Pahno thai ha ei sala cha, A palie aw ei ta, Ngiahthaipa ama châ ha awpa tlai!” tah ta.

Chi hietuhpa pakhona chhopasiana

¹³ Zisu ta ama hnohta, “Pakhona bie cha pahno thai veih ei chi ma? Kheihta ma pakhona bie hropa zydua nama pahno thei aw?

¹⁴ Chi hietuhpa ta bie chi hie ta.

¹⁵ Hezy he lâpi liata a tlapa bie chizy ama châ. Bie ama theipa nahta, Sâtâ a vy ta, ama palôh liata bie chi hiepa cha thlai a lapa ha tyh ei.

¹⁶ Hezy he lôphiariapa liata chi hiepazy ama châ. Bie ama theipa nahta, a ly ngaitapa ta thlai a pyh ei ta,

¹⁷ châhrasala âmo liata thari rai ama thla leipa vâta, bohpi leipa ta ama tha a zei ha tyh. Bie vâta rietheina tlyma, taolana tlyma a vaw y nahta, thlai ama pao ha tyh.

¹⁸ Ahropazy cha ahloh thih liata chi hiepa ama châ. Bie cha thei ei ta,

¹⁹ châhrasala khizaw hmo pachâna nata hneirôna nata hmo hropazy tlaichhaina âmo liata a vaw ngia ta, cha chata bie cha disao ta, pathei thei leipa ta a y tyh.

²⁰ Lei phapa liata chi hiepazy deikua cha, hezy he ama châ. Bie cha thei ei ta, a pyh ei ta, chi hiepazy cha a lie sythôh, a lie sycharu nata a lie za kha ta ama pathei tyh,” tah ta.

Meiôh sona dopa

²¹ Zisu ta ama hnohta, “Meiôh cha a sona tôh liata so leipa ta, bai ry liata soh awpa ta tlyma, rakhô ry liata so awpa ta tlyma, ama vaw cheih beih ma?

²² Palâ lei awpa ta nyupa khâpa hmahta y leipa ta, a luah lei awpa bierupa khâpa hmah y vei.

²³ Ahy rai thei nawpa nakhaoh a hneipa ta thei mawh sy,” tah ta.

²⁴ Zisu ta ama hnohta, “Nama bie theipa cha pakhâta ta pachâ teh u: nama panuana lilaw ta panuapa châ aw ei chi ta, cha hlâta hluh via chhao ta piepa nama châ aw.

²⁵ A hneipa cha pie baichhapa châ aw ta, a hnei leipa cha a hnei chhôhpa chhao lapa a châ aw,” tah ta.

Chi arulâta laiseihpa pakhona

²⁶ Zisu ta, “Khazohpa khinarâh cha chyhsa ta alei liata chi a hiepa hawhta a châ.

²⁷ Zâ ta a mô ta, nohchhô ta thyu ta, chi cha pyuh ta a laiseih lymâ. Kheihta ma cha hawhta a y tahpa pahno vei.

²⁸ Alei ta palaiseihsa ta a patheisa tyh. A hmiatua ta a kô, cha khai tawhta a suh, cha khai tawhta a suh liata sâh a vaw y tyh.

²⁹ A thei cha a hmoh nahta, sâh hria daihti a châ hapa vâta, savâ ta thlai a tai tyh,” tah ta.

Âhrâ chi pakhona

³⁰ Zisu ta, “Khazohpa khinarâh cha khâpa nata ma eima pakho aw? A châ vei khiah, kheihawhpa pakhona ma eima hmâh aw?

³¹ Khazohpa khinarâh cha âhrâ chi hmô kha alei liata pariepa hawhta a châ. Alei liata chi zydua hlâta chi chyh chaipa châ ta,

³² châhrasala pariepa a châpa nahta, kaw pyuh ta, chichei hropa zydua hlâta lai chai ta, chiah lai ngaitapazy pachiah ta, vâ pavawzy ta a buh nohdi ry liata amâ rie tyh,” tah ta.

Pakhona bie a hmâna zie

³³ Ama pahno thei nawpa ta, cha hawhpa pakhona biezy hmâpa ta ama hnohta bie reih tyh ta.

³⁴ Pakhona bie hmâ leipa ta ama hnohta reih beih vei. A pachupazy hnohta deikua cha, arulâta ato a chhopasia tyh ei.

Thlihpipa a chalihsa

³⁵ Cha noh liata, zâlâ a vaw châ nahta, ama hnohta, “Haosâ lâ kei chaka ei suh u,” tah ta.

³⁶ Zawpizy cha siesaipa ta, ano cha a kiana balyh ualuapa ta siekhei ei ta, balyh hropazy chhao a hnohta y ei ta.

³⁷ Thlihpi ru ngaitapa vaw pathli ta, tichatlaopazy ta balyh cha thata su ta, balyh cha ti ta bie daihmâ ha ta.

³⁸ Châhrasala ano cha balyh chao lâ liata lahuah a huapa ta a mô thlâh ha ta. Kei pathyu ei ta, a hnohta, “Pachutuhpa, eima leidia awpa he pei tah va chi ma?” tah ei ta.

³⁹ Zisu cha kaw thyu ta, thlih cha ra ta, tilaipi hnohta, “A chalih la, a thlih molo teh!” tah ta. Thlih cha a chalih ta, sidia ha ta.

⁴⁰ Zisu ta ama hnohta, “Khazia nama chi? Ngiapâna hnei to veih ei chi ma?” tah ta.

⁴¹ Chi ngaita ei ta, âmo nata âmo a hiahri ei ta, “He chyhsa he ahy ma a châ tly, thlih nata tilaipi chhao ta a bie amâ ngiahpa he?” tah ei ta.