MÂKA 3 - Mara Bible RV (BSI)

Kusypa a patlâh

¹ Pakhyna o liata a ngia heih ta, cha liata kusypa pakha y ta.

² Ano ama leih thei nawpa ta, Pahânoh ta a patlâh ma tahpa moh thlâh ha ei ta.

³ Zisu ta kusypa hnohta, “A duah teh,” tah ta.

⁴ Zawpi hnohta, “Pahânoh ta khâpa tao awpa ma ryhpa ta a pasai? Hmopha tao awpa ma, pasasa awpa maw? Hrona pachha awpa ma, thie awpa maw?” tah ta. A thlih thlâh ha ei ta.

⁵ Hiehâhpa ta âmo cha moh ta, ama palôh kuhchhapa vâta a palôh pasa ngaita ta, kusypa hnohta, “Na ku pazawh teh” tah ta. A ku pazawh ta, a kusypa cha pha ha ta.

⁶ Phârisaihzy cha pua ei ta, ano ama thie thei nawpa pachâpa ta, Herawda pyzy nata thlai a chhohia ei ta.

Zawpi hluhpi ta Zisu ama zi

⁷ Zisu cha a pachupazy chhaota tipo lâ sie ta, Kâlili nata Zudia râhzy tawhta chyhsa hluhpi ta ano cha zi ei ta.

⁸ Zerusale tawhta zy, Idumia râh tawhta zy, Zawdâh khô lâ tawhta zy, Tyre nata Sidaw khih chheipâh tawh zy ta ano cha zi ei ta. Zawpi hluhpi ta a hmotaopa rônahzie ama thei nahta, ano cha pangai lymâ ei ta.

⁹ Zawpi ama hluh ngaitapa vâta, ano ama chadie lei nawpa ta, balyh chyhpa paruapa awpa ta a pachupazy chho ta.

¹⁰ Chyhsa hluhpi a patlâhpa vâta, hri ohpazy ta ano ama hria thei nawpa ta thata ama bypa a châ.

¹¹ Thlahpa chhiepazy ta Zisu ama hmô nahta, a hmiakô liata pao ei ta, “Khazohpa Sawchapawpa na châ,” tahpa ta awh ei ta.

¹² Châhrasala a châna phuah lei awpa ta, âmo cha â i ngaitapa ta biepie ta.

Lyuhchâpa pahrawh hleinozy

¹³ Chatawhcha tlâh lâ khy ta, ano ta a khopazy aw ta, ano lâ a vy ei ta.

¹⁴ Pahrawh hleino a tlyh ta, âmo cha lyuhchâpazy ta rao ta. A hnohta y awpa nata bie chho awpa ta tuah awpa ta a raopazy châ ei ta,

¹⁵ ahripazy papua theina biehneina a pie ei.

¹⁶ Chazy cha Pity tahpa ta moh a bipa Saimaw,

¹⁷ Tôkalôhpa sawzy tahpa ta ama moh a bipa Zebâdi sawchapawpa Zâmie nata a unawhpa Zawhâna,

¹⁸ Adaru, Phili, Bâthawlawmu, Mathai, Thawma, Alphu sawchapawpa Zâmie, Thâdia, Kâna chyhsa Saimaw nata

¹⁹ ano a patusatuhpa Zudâh Iskari zy ama châ.

Belzebu nata Zisu

²⁰ Zisu cha o lâ a di ta. Chyhsa hluhpi a hnohta a vypakhy heih ei ta, chavâta Zisu nata a pachupazy cha pati chhao nie hmâ khao leipa ei ta.

²¹ A chhôhkhazy ta cha thâtih cha ama thei nahta, “A palôh â ki khao ei vei chuh,” tah ei ta, a chhi awpa ta sie ei ta.

²² Zerusale tawhta ryhpa pachutuhpa a zupazy ta, “Belzebu a hneipa a châ hih, ahripa bei a châpa vâta ahripazy a papua theipa a châ hih,” tah ei ta.

²³ Zisu ta âmo cha aw ta, ama hnohta pakhona bie hmâpa ta bie reih ta, “Kheihta ma Sâtâ ta Sâtâ a papua thei aw?

²⁴ Khinarâh chhao anosasyh ta â dyuh khiahta cha kheihta â duah thei aw?

²⁵ Chhôhkha nata chhôhkha a dyuh ei sala, cha chhôhkha cha a duah thei aw vei.

²⁶ Sâtâ chhao anosasyh ta â dyuh khiahta cha, a pachhaih aw ta, a duah thei aw vei, a leidia aw.

²⁷ Ahy hmahta chyhsa thatlôpa o liata a ngiapa ta a sôhzy hrao a chhuah sala, chyhsa thatlôpa cha a chahry ha tua leipa ta cha hrao thei aw vei. A chahry khai tawhta a o cha a hrao thei aw.

²⁸ Hmeiseihta ta ei cha chho ei, chyhsa sawzy moleina zydua nata reipachhiena bie ama reipa zydua a ngiahthai theipa a châ.

²⁹ Thlahpa Pathaihpa a reipachhiepa deikua cha, khati nota hmahta a ngiahthaipa châ aw vei, tlyzaw moleina liata thaileichâpa ta a y,” tah ta.

³⁰ “Thlahpa chhiepa a hneipa a châ,” ama tahpa vâta, cha bie cha a reipa a châ.

Zisu nô nata a unawhzy

³¹ A nô nata a unawhzy ano lâ a vy ei ta, khôtho liata a duah ei ta. Chyhsa tuapa ta, za paawsa ei ta.

³² A kiapâh liata zawpi a tyuh hôlô ei ta, a hnohta, “Na nô nata na unawhzy ta cha tlua ei ta, khôtho liata ama y,” tah ei ta.

³³ Zisu ta âmo cha a chhy ta, “Ei nô nata ei unawhzy cha ahyzy ma ama châ?” tah ta.

³⁴ A kiapâh liata a tyuhpa, ano a chadô thlâh hapazy cha moh ta, “Hezy he ei nô nata ei unawhzy cha ama châ!

³⁵ Ahy rai Khazohpa khopa a taopa maih, chazy tlai cha ei unawhzy, ei sietanôzy, ei nôzy ama châ,” tah ta.