MÂKA 2 - Mara Bible RV (BSI)

Zisu ta pheisypa a patlâh

¹ Noh khazie rakha ma a khô tawhta, Kâpynia khih lâ vaw kua heih ta. O liata a y tahpa chyhsazy ta pahno ei ta.

² O a tlôh khao leina taihta chyhsa hluhpi a vypakhy ei ta, ochhi thaby lia taihta yna y leipa ta. Âmo cha bie pachu ta.

³ Chyhsa papalih ta pheisypa pakha ano lâ a vaw sy ei ta.

⁴ Zawpi ama hluh tupa vâta Zisu cha a hnia thei leipa ei ta, ano dady liata vâphuh phie ei ta, ama phie khai nahta, asypa cha a hmohphaw chhaota za pathliah ei ta.

⁵ Zisu ta amâ ngiapâna cha a hmô nahta, asypa hnohta, “Ei sawchapawpa, na moleinazy a ngiahthaipa a châ haw,” tah ta.

⁶ Cha liata ryhpa pachutuhpa thokha a tyuh hra ei ta, ama palôh liata,

⁷ “Khazia he chyhsa heta cha hawhta bie a reih? Khazohpa a reipachhie he! Khazohpa dei leipa ta, ahy ma moleinazy a ngiahthai thei?” tahpa ta pachâ ei ta.

⁸ Cha hawhta ama palôh liata ama pachâpa cha Zisu ta a thlahpa ta thlai pahno ta, ama hnohta, “Cha bie cha khazia nama palôh liata nama pachâ?

⁹ Pheisypa hnohna heta, ‘Na moleinazy a ngiahthaipa a châ haw,’ tahpa nata ‘Thyu la, na hmohphaw la la, phei ta sie teh,’ tahpa he a kheihawhpa ma a rei a nao via?

¹⁰ He hmo he, chyhsa Sawchapawpa he moleinazy a ngiahthai theina biehneina khizaw liata a hnei tahpa nama pahno nawpa ta taopa a châ,” tah ta. Asypa hnohta

¹¹ “Ei cha chho, thyu la, na hmohphaw la la, na o lâ a di teh,” tah ta.

¹² Ama zydua mohmô ta thlai thyu ta, a hmohphaw la ta, pua ha ta. Zawpi zydua ta ama noâh ngaita ta, Khazohpa reithai ei ta, “He hawhpa he hmô beih ma pi,” tah ei ta.

Livai awna

¹³ Tipo ngiahkâ lâ pua heih ta, zawpi zydua a hnohta a vy ei ta, âmo cha pachu ta.

¹⁴ A sie hai nota, Alphu sawchapawpa Livai cha chhie kheina su liata â tyu thlâh hapa hmô ta, a hnohta, “Na zi teh,” tah ta, thyu ta, zi ha ta.

¹⁵ Zisu cha Livai o liata pati a dôh hai nota, chhiekheituhpa hluhpi nata moleipazy chhao, Zisu nata a pachupazy hnohta pati dôh hra ei ta. Chyhsa hluhpi ta Zisu cha ama pazipa a châ.

¹⁶ Phârisaihzy hry liata ryhpa pachutuhpa thokhazy ta, Zisu ta chhiekheituhpazy nata moleipazy hnohta pati a dôhpa ama hmô nahta, a pachupazy hnohta, “Khazia chhiekheituhpa nata moleipazy hnohta niedopa ta a y?” tah ei ta.

¹⁷ Zisu ta cha bie cha a thei nahta, ama hnohta, “Atlâhpazy ta dawhty a ngiah leipa ei ta, tlâhleipazy ta amâ ngiah. Mosiapazy pado awpa ta a zupa châ leipa na ta, moleipazy pado awpa ta a zupa tlao ei châ,” tah ta.

Kâhvileina kyh

¹⁸ Zawhâna pachupazy nata Phârisaihzy cha kâhvileipa ta y ei ta. Chyhsazy a vy ei ta, Zisu hnohta, “Khazia Zawhâna pachupazy nata Phârisaih pachuna a zyhpazy kâhvileipa ta y ei ta, na pachupazy he kâhvileipa ta ama y hra vei?” tah ei ta.

¹⁹ Zisu ta ama hnohta, “Ahneina kyhchhi a hlaopazy ta myuhneituhpa ama hnohta a y chhôh cha, kâhvileipa ta ama y beih ma? Myuhneituhpa ama hnohta a y chhôh zydua cha, kâhvileipa ta y beih veih ei.

²⁰ Myuhneituhpa ama hry tawhta lana nohzy a vaw tlô aw. Cha nohzy liata deikua cha, kâhvileipa ta ama y aw.

²¹ Ahy hmahta chysia parohpa liata pohthâ thiehpa baithla beih veih ei. Ama bai khiahta cha, a baithlana ta tlao a daoparu aw ta, a thiehpa ta a parohpa cha hrie aw ta, tlao â hrie via ha aw.

²² Ahy hmahta savo titheih parohpa liata kresawhti thiehpa ryh beih hra veih ei. Ama ryh khiahta cha, kresawhti ta savo titheih cha tôhchheih aw ta, kresawhti a leih aw ta, savo titheih chhao a rao aw. Kresawhti thiehpa cha savo titheih thiehpa liata ama ryh tyh,” tah ta.

Zisu Pahânoh Beipa

²³ Pahânoh ta sâh thihzy chapiapa ta sie ta, a pachupazy ta ama sie pâ ta sâh suzy thlie ei ta.

²⁴ Phârisaihzy ta a hnohta, “Moh tua, khazia Pahânoh ta tao awpa ryhpa ta a pasai leipa ama tao tly?” tah ei ta.

²⁵ Zisu ta ama hnohta, “Dâvi nata a hnohta a ypazy ta a phahlapa ta ama nodi nota ama hmotaopa kha reih beih veih ei chi ma?

²⁶ Abiathâ theihthai beichaipa a châ nota, Khazohpa o liata a ngia ta, theihthaipazy deita nie pasaipa Ypâna Viahchhâ nie ta, a hnohta a ypazy chhao a pie hrapa kyh kha reih beih veih ei chi ma?” tah ta.

²⁷ Ama hnohta, “Pahânoh cha chyhsapa châta taopa châ ta, chyhsapa cha Pahânoh châta taopa châ vei.

²⁸ Chyhsa Sawchapawpa he Pahânoh Beipa chhao a châ,” tah ta.