MÂKA 15 - Mara Bible RV (BSI)

Zisu Pilâ hmiakô liata

¹ My a vaw châpa nahta, theihthai beizy ta machâzy, ryhpa pachutuhpazy nata ryureituhpa zydua a chhohia ei ta. Zisu cha chahrypa ta a chhi ei ta, Pilâ lâ hlâ ei ta.

² Pilâ ta a hnohta, “Zuzy Beipa na châ ma?” tah ta. Zisu ta a chhy ta, “Na reipa hawhta ei châ,” tah ta.

³ Theihthai beizy ta kyh hluhpi ta vaw leih ei ta.

⁴ Pilâ ta hiahri heih ta, a hnohta, “Khâpa hmah a chhy aw va chi ma? Pachâ tua, ama cha leihna zyzie hih,” tah ta.

⁵ Châhrasala Zisu ta khâpa hmah a chhy via khao leipa ta. Chavâta Pilâ cha a noâh kaw ta.

Pilâ ta Zisu thie awpa a pathlu

⁶ Chyhsa atâhpazy hry liata zawpi ta amâ hawpa pakha cha, Zawpakhô kyhchhi noh ta Pilâ ta papua tyh ta.

⁷ He daihti liata patâhna o liata chyhsa pakha, a moh Bârabâ ama tahpa y ta. Ano cha ryureina a dyuhpa ta liany a cheihpa vâta patâhpa a châ.

⁸ Zawpizy khy ei ta, Pilâ cha ama châta a tao tyhpa hawhta tao heih awpa ta a haw ei ta.

⁹ Pilâ ta ama hnohta, “Zuzy Beipa he cha papuapa aw ei sah la, nama khoh ma?” tah ta.

¹⁰ Zisu cha theihthai beizy ta hiatliana vâta ama patusapa a châzie pahno thlâh ha ta.

¹¹ Châhrasala theihthai beizy ta Bârabâ papua hri awpa ta zawpi pasyu ei ta.

¹² Pilâ ta âmo cha a chhy ta, ama hnohta, “Cha khiah Zuzy Beipa nama bipa he zaw, kheihta ei tao aw?” tah heih ta.

¹³ Zawpizy ta, “Khaipâ teh,” tahpa ta thata awh heih ei ta.

¹⁴ Pilâ ta ama hnohta, “Khazia maw, khâpa moleina ma a tao haw?” tah ta. Châhrasala, “Khaipâ teh,” tahpa ta thata awh via rili ei ta.

¹⁵ Pilâ ta zawpi palysa khohpa ta, Bârabâ cha papua ta, Zisu cha a chhei khai nahta, khaipâ awpa ta hlâ ha ta.

Pheisaihzy ta Zisu ama taola

¹⁶ Zisu cha pheisaihzy ta râhvaotuhpa o dôhpachhôh, Pritôria ama tahpa lâ a ngiakhei ei ta. Ama py liata pheisaih zydua awpakhy ei ta.

¹⁷ Viahkao pasipa nohsaihpa paky ei ta, hloh lakho phiehpa a luh liata pakho ei ta.

¹⁸ “Zuzy Beipa, hroh pareih mah y!” tahpa ta a naoh ei ta.

¹⁹ Lohthi ta a luh liata chhei ei ta, ama pachih ta pachhao ei ta, ama pakhu paneihpa ta a naoh ei ta.

²⁰ Ama pasipasawh khai nahta, poh nohsaihpa cha hlaipa ei ta, ano viahkao pasipa pakysa heih ei ta, khaipâ awpa ta a chhi ha ei ta.

Khaipâna

²¹ Lâpi liata amâ tyhpa Kurini khihpa Saimaw cha Zisu kraws papiasa raruah ei ta. Ano cha Alezandâ nata Rufu zy paw châ ta, khitaw lâ tawhta a vaw tlôpa a châ.

²² Zisu cha Luh Ru Su ama tahpa Kalvari tlâh lâ a chhi ei ta.

²³ Myrâ nata pahlaopa kresawhti pie ei ta, châhrasala doh khoh leipa ta.

²⁴ Chatawhcha khaipâ ei ta, a chysiazy a rai ei ta, nuby a daopa ta ama to awpa chyu a la ei ta.

²⁵ Zisu ama khaipâna daihti cha my dawh chakipa liata a châ.

²⁶ Ano leihna bie a luh chô liata ama tawpa cha, “Zuzy Beipa,” tahpa a châ.

²⁷ Zisu hnohta hraotuhpa pano, a chachâh lâta pakha, a chavei lâta pakha khaipâ hra ei ta.

²⁸ Chatanachata, “Moleipazy hry liata rei pâpa a châ,” tahpa Biehrai bie a vaw tlô paki haw.

²⁹ Cha su a chapiapazy ta ama luh chahuahpa ta, “Âh! Nâ, Achhyna o phie ta, noh thôh ta a sa heih awpa chi,

³⁰ nâmasasyh ta a pachha la, kraws tawhta za chô châh chi!” tahpa ta pasipasawh ei ta.

³¹ Cha hawhna hra chata theihthai beizy nata ryhpa pachutuhpazy chhao ta pasipasawh hra ei ta, “Chyhsa hropazy pachha ta, ano hmâchhâh â pachha thei khao vei huh.

³² Izarei Beipa Mesia cha tahmâ tlai heta kraws tawhta za chô bao sa! Cha cha eima hmô khiahta cha, eimâ ngiapâ aw,” tah ei ta. A hnohta khaipâ hrapazy chhao ta pasipasawh hra ei ta.

Zisu thina

³³ Dawh hrawh hleino a vaw paro nahta, cha daihti tawhta zâlâ dawh thôhpa taihta, alei chô zydua vaw zoh kaluh ha ta.

³⁴ Dawh thôhpa liata, Zisu cha ao paro ngaitapa ta awh ta, “Elôi, Elôi, lâmâ sabakthâni?” tah ta, cha yzie cha “Ei Khazohpa, ei Khazohpa, khazia eina pathlua chi?” tahna a châ.

³⁵ A kiapâh liata a duahpa thokhazy ta cha bie cha ama thei nahta, “Nathlie tua u, Elaizâh a aw chu,” tah ei ta.

³⁶ Chyhsa pakha a râ ta, kresawhti thaopa liata ti pasysana ny ta, lohthi pawhmao liata pataoh ta, padosa ta, “Ano la awpa ta Elaizâh â zu ma tahpa hâ sih la, moh tua suh u,” tah ei ta.

³⁷ Zisu cha ao paro ngaitapa ta awh ta, a hu chhâ ha ta.

³⁸ Achhyna o pohraipa cha a chô lâ tawhta a ry lâ taihta â khophie ta a hrie ta.

³⁹ A hmiakô liata a duahpa pheisaih za kha hyutuhpa ta, cha hawhta a hu chhâpa cha a hmô nahta, “He chyhsa he Khazohpa Sawchapawpa a châ hmeiseih tlai na,” tah ta.

⁴⁰ Lâhla tawhta a saipa chanôzy chhao y ei ta, chazy hry liata Mâri Mâdali, Zâmie seihnai viapa nata Zôse zy nô Mâri nata Salômi zy amâ hlao hra.

⁴¹ Kâlili liata Zisu a y no kha, âmozy heta zi ei ta, ama chakao tyh. A hnohta Zerusale lâ a khy hrapa chanô hropa hluhpi chhao amâ hlao hra.

Zisu pabuna

⁴² Zâlâ a vaw châ nahta, Pachyh noh a châpa vâta, cha cha Pahânoh a pazipa noh châ ta,

⁴³ Arimathai khihpa Zawsi, ryureituh zachhihpa nata Khazohpa khinarâh vaw tlô awpa a hâ hrapa cha a vy ta, a riah a paphapa ta Pilâ lâ a ngia ta, Zisu ri cha hiah ta.

⁴⁴ Cha hawhta thlai a thi thlâh hapa cha Pilâ chhao ta noâh tah kaw ta, pheisaih za kha hyutuhpa cha aw ta, a thi ha tlai ma tahpa ta hiahri ta.

⁴⁵ A thi ha tlaipa kyh pheisaih za kha hyutuhpa tawhta a pahno nahta, a ri cha Zawsi hnohta pie ta.

⁴⁶ Zawsi ta poh rih dipa chalei ta, Zisu ri cha la ta, poh rih dipa ta pahly ta, lôkhaoh khiepa thlâ liata pazia ta. Thlâ paka cha alô ta pamai ta.

⁴⁷ Mâri Mâdali nata Zôse nô Mâri ta a paziana su cha hmô ei ta.