MÂKA 13 - Mara Bible RV (BSI)

Achhyna o raona chhochhieliena

¹ Achhyna o tawhta a pua nahta, a pachupazy hry liata pakha ta a hnohta, “Pachutuhpa, moh tua, alôzy nata ozy he a rônah kaw dia!” tah ta.

² Zisu ta a hnohta, “He o rônahpazy he na hmô bao ma cha? Alô pachopazy he parao leipa ta miakha hmahta y aw vei,” tah ta.

Daihti chhâna ngianazy

³ Achhyna o dady ta Ôli tlâh liata â tyu thlâh ha nota, Pity, Zâmie, Zawhâna nata Adaru zy ta arulâta bie hiahri ei ta.

⁴ “Cha hmozy cha khati ta a vaw tlô aw? Cha hmo zydua vaw tlô nawpa daihti ngiana khâpa a y aw? Miah chho teh,” tah ei ta.

⁵ Zisu ta ama hnohta, “Ahy hmahta ama cha dôvei lei nawpa ta a vaih teh u.

⁶ Chyhsa hluhpi ta, ‘Krista ei châ,’ tahpa ta ei moh ta a vy aw ei ta, chyhsa hluhpi ama dôvei aw.

⁷ Adyuhnazy nata adyuhna bie pathâhpazy nama thei tita, nôpopa ta y khuh vy. Chazy cha a vaw tlô awpa rai a châ, châhrasala chhâna la châ mâh vei.

⁸ Phopi nata phopi a dyuh aw ei ta, khinarâh nata khinarâh amâ dyuh aw. Su hluhpi liata alozy a sih aw ta, chakâhnazy a tlô aw. Chazy cha sawzeih pasa athaona a châ.

⁹ “Châhrasala a hrohrua teh u. Ryureituhpazy cha patusa aw ei ta, pakhyna ozy liata cha chhei aw ei ta, keima vâta ryureituhpazy nata abeizy hmiakô liata a duah aw ei chi ta, ama hmiakô liata pahnotuhpa châ awpa ta namâ duah aw.

¹⁰ Thâtihpha cha phopi zydua hnohta chho khai tua awpa a châ.

¹¹ Cha patupa ta ama châ chhi tita, khâpa eima reih aw tahpa ta pachâ chhie chhielie khuh vy. A daihtita liata bie vaw tlô aw ta, cha bie cha nama rei awpa a châ. A reihtuhpa cha nâmo châ leipa aw ei chi ta, Thlahpa Pathaihpa tlao a châ aw.

¹² Thie awpa ta, unawhpa ta a unawhpa patusa aw ta, paw ta a saw patusa aw ta, sawzy ta ama nôpawzy a dyuh aw ei ta, ama pathiesa aw.

¹³ Chyhsa zydua ta ei moh vâta ama châ hao aw. Châhrasala achhâna taihta a tao hualuapa cha pachhapa ta a y aw.

Roryhrana pasichhihpa

¹⁴ “Châhrasala roryhrana pasichhihpa cha â dua lei nawpa su liata â duapa nama hmô tita, Zudia liata a ypazy cha tlâh lâ a râ mawh ei sy. A reihtuhpa ta a yzie pahno thai mawh sy.

¹⁵ O chô liata a ypa ta o ry lâ chô leipa sala, a o liata hmo la awpa ta a ngia khah sy.

¹⁶ Lyu liata a ypa ta a poh la awpa ta kua heih khah sy.

¹⁷ Cha nohzy liata chanô sawphaohpa nata hawsaih a pyh haipazy hupo awpa rimâ cha!

¹⁸ Cha hmo cha chasipaw nota a vaw tlô lei nawpa ta thlahchhâ teh u.

¹⁹ Cha nohzy cha riethei pasana noh châ aw ta, cha tlatlu ta rarôh ypa cha, Khazohpa taopa leilô y tua no tawhta tahmâ taihta y beih leipa ta, y heih khao aw vei.

²⁰ Abeipa ta cha nohzy cha pachhosa leipa chhochhi sala, chyhsa ahy hmahta pachhapa ta y aw veih ei. Châhrasala chyhsa atlyhpa, a raopazy vâta nohzy cha a pachhohsapa a châ.

²¹ Chyhsa ta nama hnohta, ‘Moh teh u, Mesia cha he liata a y,’ a tah khiahta tlyma, ‘Moh teh u, hao liata a y,’ a tah khiahta tlyma, zo khuh vy.

²² Mesia pakheipazy nata hrohso pakheipazy vaw pua aw ei ta, ngiana nata hmonoâhpazy ama tao aw. Tao theipa châ sala, atlyhpazy taih ama dôvei aw.

²³ Nâmo deikua cha, a vaih teh u, ato ei cha chhochhielie ha ei hih.

Chyhsa Sawchapawpa avyna

²⁴ “Cha nohzy liata, riethei pasana a y khai tawhta, noh pazohsapa châ aw ta, thlâpâ khaih khao leipa aw ta,

²⁵ avâ tawhta awhsizy za tla aw ei ta, avâ hmotaotheinazy cha chalyupa a châ aw.

²⁶ Chatawhcha Chyhsa Sawchapawpa cha hmotaotheina nata rônah ngaitapa ta meihdo hry liata â zupa ama hmô aw.

²⁷ A vâlyuhchâpazy tuah aw ta, â tlyhpazy cha kaokih miapalih tawhta, alei chy chhâna tawhta avâ chy chhâna taihta a pakhy aw.

Theiku pakhona

²⁸ “Theiku kô tawhta a chu teh u. A chhyh panyupa kaw paka ta, a hna a vaw thao khiahta cha, nopi â hnia haw tahpa nama pahno.

²⁹ Cha hawhna hra chata, chazy a vaw tlôpa nama hmô tita, Chyhsa Sawchapawpa cha a vaw hnia ha ta, chhikao thaby liata a y tahpa pahno teh u.

³⁰ Hmeiseihta ta ei cha chho ei, cha hmo zydua a tlô paki khai hlâlei cha, he chhâ he lei aw vei.

³¹ Lei nata vâ a lei aw, ei biezy deikua lei aw vei.

Ahy hmahta a noh nata dawh pahno veih ei

³² “Châhrasala cha noh nata dawh cha, Paw dei leipa ta cha, ahy hmahta pahno veih ei. Vârâh liata vâlyuhchâpazy ta pahno leipa ei ta, Sawchapawpa chhao ta pahno vei.

³³ A daihti vaw tlô nawpa nama pahno leipa vâta, riavaihpa ta y u la, a hrohruapa ta thlahchhâ teh u.

³⁴ Cha daihti vaw tlô nawpa cha, chyhsa ta lâhlapi lâ khitlyh ta, a o a siesaipa cha a chakaotuhpazy ku liata soh ta, ama raihria awpa pie chyu ta, ochhi vaituhpa cha, khâ a hra thlâh ha awpa ta bie a piepa hawhta a châ.

³⁵ Chavâta a hrohrua teh u, o hneituhpa vaw tlô nawpa daihti cha, zâlâ ta ma, zâcho ta ma, awhkho ta ma, my ta ma a châ aw tahpa pahno tlôh leipa ei chi ta.

³⁶ Chataleipatala eikhapi ta a vy aw ta, namâ mô chhôh ta a cha vaw pachhai pathlei aw ei.

³⁷ Nama hnohta ei reipa he chyhsa zydua hnohta a reihpa ei châ: Riavaihpa ta y teh u,” tah ta.