MÂKA 12 - Mara Bible RV (BSI)

Kre sadô nata vaituhpazy pakhona

¹ Pakhona biezy ta ama hnohta reih heih ta. “Chyhsa pakha ta kre sadô tao ta. Sadô cha dôh ta, kre saohna khaoh chao ta, o sâhpa sa ta, lyutaotuhpazy hnohta thlyu hlao awpa ta pie ta, râh hlapi lâ sie ha ta.

² A thei lyu â daih nahta, lyutaopazy lâ chakaotuhpa tuah ta, kre sadô theilâpazy âmo lâ kei palasa ta.

³ Chakaotuhpa cha vaw patu ei ta, chhei ei ta, ku ruapa ta pasiesa ei ta.

⁴ Chakaotuh hropa âmo lâ tuah heih ta, ano chhao cha a luh liata alô ta vawh ei ta, hmah paphao ei ta, nozachhih ngaitapa ta tao ei ta.

⁵ Ahropa tuah heih ta, ano chhao cha thie ei ta. Chakaotuhpa hropazy chhao, cha hawhta vaw tao lymâ ei ta, thokha tu ei ta, thokha thie ei ta.

⁶ Pakha deita hnei bâ ta, cha cha a sawchapaw kho ngaitapa a châ. ‘Ei sawchapawpa chhâ he cha ama za aw,’ tahpa ta pachâ ta. Ano cha a chhâ chaina ta âmo lâ tuah ta.

⁷ Châhrasala lyutaotuhpazy ta, ‘He chyhsa he ryutotuhpa cha a châ hih. A vy u la, thie ei suh u. Chatanachata ryu a to awpa cha keimo châta a châ aw,’ tah ei ta.

⁸ A sawchapawpa cha patu ei ta, thie ei ta, kre sadô khôtho lâ ama thy haw.

⁹ Kre sadô hneituhpa ta kheihta a tao aw? Vawh aw ta, lyutaotuhpazy pahleipadia aw ta, kre sadô cha chyhsa hropazy a pie aw.

¹⁰ Biehrai liata, “‘O satuhpazy alô kho leipa kha, A ki lô a vaw châ haw;

¹¹ Cha cha Abeipa taopa châ ta, Eima mo liata â ngia ngaita,’ tahpa ta ropa reih beih veih ei chi ma?” tah ta.

¹² Cha pakhona bie cha âmo a nuapa ta a reipa a châ tahpa ama pahnopa vâta, Zisu cha patu awpa khoh ei ta. Châhrasala zawpi ama chipa vâta, Zisu cha siesaipa ta, sie ha ei ta.

Chhie piena kyh

¹³ A bie reipa liata patu a chhuahpa ta, Phârisaihzy nata Herawda py liata chyhsa thokha Zisu lâ tuah ei ta.

¹⁴ A kô ama tlô nahta, a hnohta, “Pachutuhpa, chyhsa dopa châ chi ta, ahy pachâna hmahta a papeisa va chi tahpa eima pahno. Chyhsapa alânazie ta cha pahnie leipa ta, hmeiseihna kyh ta Khazohpa lâpi na pachu tyh. Kaisarâ lâ chhie piepa he ryhpa ta a pasaih ma, pasaih vei?

¹⁵ Eima pie aw ma, pie aw vei?” tah ei ta. Zisu ta ama pasuapachao tahpa pahno ta, ama hnohta, “Khazia eina pasia ei chi? Tâkâ dinâri miakha na vaw pie teh u, ei moh tua aw,” tah ta.

¹⁶ Tâkâ cha vaw pie ei ta. Zisu ta ama hnohta, “He he ahy nothlahpa nata ahy moh maw?” tah ta. Âmo ta, “Kaisarâ,” tah ei ta.

¹⁷ Zisu ta ama hnohta, “Kaisarâ hmozy cha Kaisarâ pie u la, Khazohpa hmozy cha Khazohpa lâ pie teh u,” tah ta. Ama noâh ngaita ta.

Thyuheihna kyh hiahrina

¹⁸ Thyuheihna y vei a tahpa Saduasizy ano lâ a vy ei ta, a hnohta,

¹⁹ “Pachutuhpa, Mawsi ta châ miah ropa ta, ahy rai a unawhpa ta saw hnei leipa ta a lapinô a thisai khiahta cha, a unawhpa lapinô cha hnei aw ta, a unawhpa châta chi a pathlapa awpa a châ tahpa ta miah a chho.

²⁰ Unawh pasari y ei ta, a uhthei chaipa ta lapinô hnei ta, chi pathla leipa ta thi ha ta.

²¹ Unawh panona ta a uhta lapinô cha hnei ta, ano chhao chi pathla leipa ta thisai ha hra ta. Unawh pathôhna chhao, cha hawhta châ hra ta.

²² Unawh pasarina chhao ta chi pathla leipa ta thi ha hra ta. Achhâna liata, chanô chhao cha thi pâ ha hra ta.

²³ Thyuheihna daihti liata, ama thyuheih tita ahy lapinô ma a châ aw? Ama pasari ta lapinô ta hnei chyu tlôh ei ta,” tahpa ta hiahri ei ta.

²⁴ Zisu ta ama hnohta, “Cha vâna chata vei ma nama pachâpasi tyh vei? Biehrai pahno leipa ei chi ta, Khazohpa hmotaotheina chhao pahno veih ei chi?

²⁵ Athihpa hry tawhta ama thyuheih tita la, nôvah ahneina y khao aw vei. Vârâh liata vâlyuhchâpazy hawhta tlao ama châ ha aw.

²⁶ Athihpazy pathyupa ta ama y awpa kyh cha, Mawsi châbu liata thobuh kyh rona liana khata, Khazohpa ta, ‘Kei he Abarahâ Khazohpa, Aisika Khazohpa nata Zakaw Khazohpa ei châ,’ tahpa ta Mawsi a chhona bie kha reih beih veih ei chi ma?

²⁷ Khazohpa cha athihpazy Khazohpa châ leipa ta, ahrohpazy Khazohpa a châ. Nama pachâ chhei haw,” tah ta.

Biepie rônahpa

²⁸ Ryhpa pachutuhpazy hry liata pakha ano lâ a vy ta. Bie amâ ei ngâpa cha thei ta, a phapa ta â chhy lymâpa a hmô nahta, Zisu hnohta, “Biepiepa zydua hry liata khâpa ma a peimawh chai?” tahpa ta hiahri ta.

²⁹ Zisu ta, “Biepiepa peimawh chaipa cha he he a châ, ‘Hy Izarei, nathlie teh: Abeipa eima Khazohpa, Abeipa cha pakha deita a y.

³⁰ Abeipa na Khazohpa cha na pathipalôh tlokhuh ta, na thlahpa tlokhuh ta, na pachâna tlokhuh ta nata na thatlôna tlokhuh ta kyh na pachâ awpa a châ,’ tahpa hih.

³¹ A pazipa cha, ‘Nâma kyh nâ pachâpa hawhta, na vaih kyh na pachâ awpa a châ,’ tahpa he a châ. He hlâta biepiepa rônah viapa y vei,” tahpa ta a chhy ta.

³² Ryhpa pachutuhpa ta a hnohta, “Pachutuhpa, na reipa â do na. Biedopa tlai na na reih. Khazohpa pakha deita y ta, ano leipa ta Khazohpa hropa rai y veih ei.

³³ Khazohpa cha pathipalôh tlokhuh ta, pahnona tlokhuh ta nata thatlôna tlokhuh ta kyhpachâpa nata sasyh kyh a pachâpa hawhta vaih kyhpachâpa cha, a pôhpa duata rao khaipa raopa hlânazy nata atheihnazy hlâta pha via syulyupa a châ,” tah ta.

³⁴ So ngaitapa ta â chhypa cha Zisu ta a hmô nahta, a hnohta, “Khazohpa khinarâh tawhta a hla va chi,” tah ta. Cha rakha tawhta cha, ahy hmahta bie hiahri ngâh khao veih ei.

Dâvi Saw chânazie hiahrina

³⁵ Zisu cha Achhyna o liata pachu ta, hiahrinazy a chhy lymâ ta, ama hnohta, “Kheihtazie ta ma ryhpa pachutuhpazy ta Krista cha Dâvi sawchapawpa a châ tahpa ta ama rei tyh tly?

³⁶ “‘Abeipa ta ei Beipa hnohta, Na chariahpazy na phei ry liata ei so khai hlâlei cha, Ei chachâh lâta a tyuh mah y,’ a tahpa kha.

³⁷ Dâvi ta ano cha Abeipa a tah tlôh khiahta cha, kheihta ma Krista cha Dâvi sawchapawpa a châ thai aw?” tah ta. Zawpizy ta a ly ngaitapa ta a bie cha nathlie ei ta.

Ryhpa pachutuhpazy Zisu ta a reipachhie

³⁸ A pachu lymâna liata hetana heta reih ta: “Ryhpa pachutuhpazy tawhta a vaih teh u. Âmo cha viahkao pasipazy a kypa ta, sôdaohna suzy liata anaohna hnabeiseih ei ta,

³⁹ pakhyna o liata dyuchhai pha chaipazy a hnaw ei ta, kyhchhina liata su pha chaipazy amâ haw tyh.

⁴⁰ Nôhmei olyuzy nie khai ei ta, a chapuahchaluah nawpa ta a pasi pi ta thlah ama chhâ tyh. Cha hawhpa chyhsazy cha thailei ama châ pachai aw,” tah ta.

Nôhmei thyuna

⁴¹ Zisu cha thyuna byh dady liata a tyuh ta, chyhsazy ta thyuna byh liata tâkâ ama pathlapa cha moh ta. Chyhsa hneirôhpa hluhpizy ta a hluhpi pathla ei ta.

⁴² Nôhmei dyhchhiepa a vy ta, tâkâ dipa miano pathla ta. Cha cha phusâ miakha tlu a châ.

⁴³ Zisu ta a pachupazy aw ta, ama hnohta, “Hmeiseihta ta ei cha chho ei, sôh thyuna byh liata a pathlapa zydua hlâta, he nôhmei dyhchhiepa heta a pathla hluh chai.

⁴⁴ Mohropa zydua cha ama hnei laikhôpa thyu ei ta, he chanô deikua he cha, dyhchhie kawpa châ hra sala, a khihsatôhtuna châta a hmâ awpa a hnei chhôhpa a thyu khai ha hih,” tah ta.