MÂKA 11 - Mara Bible RV (BSI)

Zerusale â ngiana

¹ Zerusale a hnia ei ta, Ôli tlâh liata Bethaphâ nata Bethâni khih ama tlô nahta, Zisu ta a pachupazy hry liata pano tuah ta,

² ama hnohta, “Nama hmia lâta khih lâ hao vawh u la, khih namâ ngia nahta, ahy hmah kia beih leipa alâtaw hraipa hmô aw ei chi ta, pathlâ u la, a vaw chhi muh vy.

³ ‘Khazia khata nama tao?’ châ tahpa ama y khiahta cha, ‘Abeipa ta a khoh, he liata thlai a vaw soh heih aw,’ nama tah aw,” tah ta.

⁴ Pachupazy cha vawh ei ta, ochhi kiapâh, khôtho lâ lâlai liata alâtaw â hraih thlâh hapa hmô ei ta, pathlâ ei ta.

⁵ Cha liata a duahpa thokhazy ta ama hnohta, “Khazia alâtaw kha nama pathlâ?” tah ei ta.

⁶ Zisu bie reipa cha âmo chho ei ta, chatanachata pasiesa ha ei ta.

⁷ Alâtaw cha Zisu lâ a vaw chhi ei ta, ama pohzy ta a ky padia ei ta, Zisu ta alâ cha kiah ta.

⁸ Chyhsa hluhpi ta lâpi liata ama pohzy phaw ei ta, ahropazy ta lyurâhpa liata thobuh chiahzy chhawhpa ta phaw ei ta.

⁹ A hmia lâta a siepazy nata a hnôh lâta a pazipazy ta, “Haozanâ! Abeipa moh ta a vypa cha reithaipa ta y mawh sy!

¹⁰ Eima paw Dâvi khinarâh a vaw tlô awpa cha reithaipa ta y mawh sy! Chônôchaipa liata Haozanâ!” tahpa ta awh ei ta.

¹¹ Zerusale â ngia nahta, Achhyna o lâ vawh ta. Hmo to a mo khai nahta, vaw zâlâ ha ta, pua ta, pahrawh hleinozy chhaota Bethâni lâ sie ha ei ta.

Theiku kô chhiesapa

¹² A mylâ ta, Bethâni tawhta amâ vy nahta, a nodi kaw ta.

¹³ Lâhla tawhta theiku kô buh rôhpa kei hmô ta, a thei hmô awpa hnabeiseihpa ta pangai ta. A kei tlô nahta deikua cha, a hna dei leipa cha khâpa hmah hmô leipa ta. Theiku pathei daihti a châ mâh leipa vâta a châ.

¹⁴ Zisu ta theiku kô hnohta, “Ahy hmahta na thei nie beih khao khah sy,” tah ta. Cha bie cha a pachupazy ta thei ei ta.

Achhyna o a pathai

¹⁵ Zerusale tlô ei ta. Achhyna o liata a ngia ta, Achhyna o liata hmo a zuahtuhpazy nata a chaleituhpazy papua ta, tâkâ rituhpa tlâhkhaizy nata pivaw zuahtuhpa dyuchhaizy chhao chati pathlah ta.

¹⁶ Achhyna o chapiapa ta hmo phaopa chhao ahy hmah pasai khao leipa ta.

¹⁷ Âmo cha pachu ta, ama hnohta, “‘Ei o cha phopi zydua châta thlahchhâna o ama bi aw,’ tahpa ta ropa châ vei ma? Nâmo deikua ta cha, parutuhpazy lôpu ta nama tao ha he zaw,” tah ta.

¹⁸ Theihthai beizy nata ryhpa pachutuhpazy ta cha bie cha thei ei ta. Zawpi zydua ta a pachuna noâh ama tah ngaitapa vâta, Zisu cha chi ei ta, ama pahleipadia thei nawpa lâpi tlua ei ta.

¹⁹ Zâlâ a vaw châ nahta, khihpi tawhta pua ta.

Theiku kô raohpa tawhta achupa

²⁰ My ta ama sie nota, theiku kô kha chapia ei ta, a thari taihta a raoh khai hapa hmô ei ta.

²¹ Pity ta a vaw thei ta, Zisu hnohta, “Pachutuhpa, moh tua! Theiku kô chhie na sapa kha a raoh ha huh,” tah ta.

²² Zisu ta ama hnohta, “Khazohpa a ngiapâ teh u.

²³ Hmeiseihta ta ei cha chho ei, ahy rai he tlâh hnohna heta, ‘A pasie la, tilaipi liata a kei thy teh,’ tah sala, a palôh liata a lôh leina hnei leipa ta, a bie reipa cha a vaw tlô aw tahpa â ngiapâ khiahta cha, a châta taopa a châ aw.

²⁴ Chavâta ei cha chho ei, khâpa rai thlahchhâna ta nama hiapa maih hmô hapa hawhta pachâ teh u. Chatanachata nama hiapa cha nâmo eih a châ aw.

²⁵ Thlahchhâpa ta namâ duana maihta, chyhsa chô liata kheihawhpa biepeipa nama hneipa maih a ngiahthai ha muh vy. Chatanachata nama Paw vârâh liata a ypa chhao ta nama paraonazy a châ ngiahthai aw ei.

²⁶ Namâ ngiahthai vei khiahta cha, nama Paw vârâh liata a ypa ta nama paraonazy châ ngiahthai aw veih ei,” tah ta.

Zisu biehneina ama pasia

²⁷ Zerusale lâ a lie heih ei ta. Achhyna o chhôh liata â hlaihlâ hai nota, theihthai beizy, ryhpa pachutuhpazy nata machâzy ano lâ a vy ei ta,

²⁸ a hnohta, “Khâpa biehneina hmâpa ta ma he hmozy he na tao? He hmozy tao awpa ta ahy ma biehneina châ pie?” tah ei ta.

²⁹ Zisu ta ama hnohta, “Bie kawh kha ei cha hiahri hra aw ei. Nâ chhy u la, kei chhao ta he hmozy he ahy biehneina ta ma ei tao tahpa ei cha chho aw ei.

³⁰ Zawhâna bâtina kha vârâh tawhtapa ma, chyhsapa tawhtapa maw? Nâ chhy teh u,” tah ta.

³¹ A chhohia ei ta, “‘Vârâh tawhtapa,’ tah mawh sih la, ‘Cha khiah khazia a bie nama zo vei?’ miah tah ha aw?

³² ‘Chyhsapa tawhtapa,’ eima tah thlâh ha aw tlyma?” tah ei ta. Châhrasala chyhsa zydua ta Zawhâna cha hrohso hmeiseihpa hawhta ama pachâpa vâta, zawpi chi tlôh ei, tahpa ta noraihpa ta y ei ta,

³³ Zisu cha a chhy ei ta, “Pahno ma pi,” tah ei ta. Zisu ta ama hnohta, “Kei chhao ta ahy biehneina ta ma he hmozy he ei tao tahpa cha chho hra aw veih ei na,” tah ta.