MÂKA 10 - Mara Bible RV (BSI)

Nôvah achhaihna kyh

¹ Zisu cha, cha su tawhta pua ta, Zawdâh haosâ Zudia râh lâ sie ta. Zawpizy ano lâ a vypakhy heih ei ta. A tao tyhpa hawhta, âmo cha pachu heih ta.

² Phârisaihzy ano lâ a vy ei ta, ano pasia nawpa ta, “Chapaw ta a lapinô ma awpa ryhpa ta a pasaih ma?” tahpa ta hiahri ei ta.

³ Zisu ta ama hnohta, “Mawsi ta kheihta ma bie a cha pie ei?” tah ta.

⁴ Âmo ta, “Mawsi ta mana châ ropa ta lapinô ma awpa a pasaih,” tah ei ta.

⁵ Zisu ta ama hnohta, “Nama palôh kuhchhana vâta, he biepiepa he nama châta a ropa a châ.

⁶ Châhrasala leilô tao tua no tawhta, ‘Khazohpa ta âmo cha chapaw nata chanô ta a tao ei.

⁷ Chavâta chapaw ta a nô nata a paw siesai aw ta, a lapinô a patu aw.

⁸ Chatanachata panozy cha pôhpa miakha ama vaw châ ha aw.’ Pano châ khao leipa ei ta, pôhpa miakha tlao ama châ haw.

⁹ Chavâta Khazohpa ta a pazaopa cha, chyhsa ta pachhaih khah sy,” tah ta.

¹⁰ O liata ama y nota, a pachupazy ta cha bie cha Zisu hiahri heih ei ta.

¹¹ Zisu ta ama hnohta, “Ahy rai a lapinô ma ta, chyhsa hropa a hneipa cha, cha chanô chô liata a pheipa a châ.

¹² Chanô chhao ta a vahpa a chhaih sala, chyhsa hropa a hnei khiahta cha, cha chapaw chô liata â pheipa a châ hra,” tah ta.

Hawtizy byhnâ a awpa

¹³ A hria awpa ta hawtizy ano lâ a vaw chhi ei ta, pachupazy ta âmo cha ra ei ta.

¹⁴ Zisu deikua ta, cha cha a hmô nahta, a ly leipa ta, ama hnohta, “Hawtizy kei lâ a vaw chhi u la, dytha khah u. Khazohpa khinarâh cha, he hawhpa chyhsazy eih châ tlôh ta.

¹⁵ Hmeiseihta ta ei cha chho ei, Khazohpa khinarâh cha, hawti a lypa hawhta a ly leipa maihta a ngia cheita aw veih ei,” tah ta.

¹⁶ Hawtizy cha a bâh ta chalo ta, ama chô liata a ku pahnieh ta, byhnâ awpa ta.

Satlia hneirôhpa

¹⁷ Sie awpa ta a pua nahta, chyhsa pakha ano lâ a vaw râ ta, a hmiakô liata pakhu paneih ta, a hnohta, “Pachutuh phapa, chhâzaw hrona ei hnei thei nawpa ta khâpa ei tao aw?” tah ta.

¹⁸ Zisu ta a hnohta, “Khazia phapa eina tah chi? Khazohpa dei leipa ta ahy hmahta phapa y veih ei.

¹⁹ Biepiepazy na pahno: ‘Liany cheih kha, Aphei kha, Paru kha, Haipa ta chyhsa leih kha, Chyhsa dôvei kha, Na nô nata paw palyupalih teh,’ tahpazy na pahno,” tah ta.

²⁰ Ano ta Zisu hnohta, “Pachutuhpa, cha zydua cha ei hawti no tawhta ei zyh lymâ tyh,” tah ta.

²¹ Zisu ta ano cha moh ta, a kyhpachâ kaw ta, a hnohta, “Hmo miakha nâ phahla: sie la, na hneipa zydua zuah la, dyhchhiepazy pie mah y. Chatanachata vârâh liata ryu na hnei aw. Cha khai tawhta a vy la, na zi mah y,” tah ta.

²² Sôh hluhpi a hneipa a châpa vâta, cha bie vâna chata a hmia chhie kaw ta, pachârôhpa ta sie ha ta.

²³ Zisu cha mohmia pasaih ta, a pachupazy hnohta, “Hneirôhpazy châta la, Khazohpa khinarâh liata a ngia awpa a ru kaw aw tlai na” tah ta.

²⁴ Pachupazy ta a bie reipa cha noâh tah kaw ei ta. Zisu ta âmo cha a chhy heih ta, “Saw saih u, Khazohpa khinarâh liata a ngia awpa cha a ru kaw tlai mâh tâh!

²⁵ Chyhsa hneirôhpa Khazohpa khinarâh liata a ngia awpa hlâta cha, râraoseihpa chiephoh khaoh liata a ngia awpa tlao a nao via,” tah ta.

²⁶ Pachupazy cha ama noâh ngaita ta, a hnohta, “Chata khiahta cha, ahy ma pachha a châ thei aw tly?” tah ei ta.

²⁷ Zisu ta âmo cha moh ta, ama hnohta, “Cha cha chyhsapa châta la tao thei rimâ awpa châ leipa ta, Khazohpa châta deikua cha, tao thei leipa hmo châ vei. Khazohpa châta cha, ato tao theipa a châ,” tah ta.

²⁸ Pity ta a hnohta, “Moh tua, keimo he ato siesaipa ta eima cha zi hih,” tah ta.

²⁹ Zisu ta, “Hmeiseihta ta ei cha chho ei, keima vâta nata thâtihpha vâta, o tlyma, unawhzy tlyma, sietanôzy tlyma, nô tlyma, paw tlyma, sawzy tlyma, râhzy tlyma a siesaipa cha,

³⁰ tahmâ hro chhôh tlai heta ozy, unawhzy, sietanôzy, nôzy, sawzy, râhzy a lie za kha ta hmô aw ei ta, taolana nata daihti vaw tlô awpazy liata chhâzaw hrona ama hnei aw.

³¹ Châhrasala hmiatua chaipa hluhpizy cha hnôh chaipa châ aw ei ta, hnôh chaipazy cha hmiatua chaipazy ama châ aw,” tah ta.

A thi nawpa kyh reih chhieliena ei thôhna

³² Zerusale lâ khy ei ta, lâpi liata ama sie nota, Zisu cha hmia a sah ta. Pachupazy ta noâh tah kaw ei ta, ano a zituhpazy chhao ta chi ngaita ei ta. Pahrawh hleinozy cha anano ta a chhi ta, a chô liata hmo vaw tlô awpazy âmo chho ta,

³³ ama hnohta, “Pachâ teh u, Zerusale lâ eima khy hai hih. Chyhsa Sawchapawpa he theihthai beizy nata ryhpa pachutuhpazy ku liata hlâpa châ aw ta, âmo ta thie awpa ta thailei pachâsa aw ei ta, Zenitaizy ku liata ama hlâ aw.

³⁴ Zenitaizy ta ano cha pasipasawh aw ei ta, ama pachih ta pachhao aw ei ta, chhei aw ei ta, ama thie aw. Noh thôh noh ta a thyu heih aw,” tah ta.

Zâmie nata Zawhâna ahawna

³⁵ Zebâdi sawchapaw Zâmie nata Zawhâna cha Zisu lâ a vy ei ta, a hnohta, “Pachutuhpa, eima châ hawpa maih miah na taopa awpa ta eima khoh,” tah ei ta.

³⁶ Zisu ta ama hnohta, “Khâpa cha taopa ei sah la nama khoh?” tah ta.

³⁷ Âmo ta a hnohta, “Na rônahna liata na chachâh lâta pakha, na chavei lâta pakha, miah patyusa mah y,” tah ei ta.

³⁸ Zisu ta ama hnohta, “Nama hiapa pahno veih ei chi. Ei nyu dopa nama doh thei aw ma? Ei bâti châna liata namâ bâti thei hra aw ma?” tah ta.

³⁹ Âmo ta a hnohta, “Eima tao thei aw,” tah ei ta. Zisu ta ama hnohta, “Ei nyu dopa cha doh thei aw ei chi ta, ei bâtina liata chhao namâ bâti thei ngyu aw.

⁴⁰ Châhrasala ei chachâh lâ tlyma, ei chavei lâ tlyma a tyuh awpa kyh cha, keima pie awpa châ vei. Âmo châta a chhuahdy chiehpazy châta tlao a châ,” tah ta.

⁴¹ Pahrawhzy ta cha kyh cha ama vaw pahno nahta, Zâmie nata Zawhâna chô liata ama palôh châ lei kaw ta.

⁴² Zisu ta pachupazy cha aw ta, ama hnohta, “Zenitaizy chô liata ryureituhpa ta raopazy ta cha, ama sahlaozy chô liata amâ bei ngaitazie nata ama molaipazy chhao ta ama sahlaozy chô liata bie ama hnei ngaitazie nama pahno.

⁴³ Nâmo hry liata deikua cha, cha hawhta a châ awpa châ vei. Ahy rai nama hry liata molaipa châ a khoh khiahta cha, châ chakaotuhpa ta a y awpa châ ta,

⁴⁴ ahy rai nama hry liata hmiatua chaipa châ a khoh khiahta cha, chyhsa zydua sei ta a y awpa a châ.

⁴⁵ Chyhsa Sawchapawpa chhao tlai he, chyhsazy ta ano ama chakao awpa ta a zupa châ leipa ta, ano ta chyhsazy chakaopa ta, chyhsa hluhpi chatlaina châta a hrona pie awpa ta a zupa a châ,” tah ta.

Mochaopa Bâtimia mopavâna

⁴⁶ Zerikô tlô ei ta. Zisu cha a pachupazy nata chyhsa hluhpi chhaota Zerikô tawhta pua ta. Timia sawchapawpa mochaopa kudaopa Bâtimia cha lâpi kiah liata a vaw tyuh thlâh ha ta.

⁴⁷ Nâzari Zisu a châ tahpa a thei nahta, awh ta, a hnohta, “Zisu, Dâvi Sawchapawpa, na ngiachhie mah y!” tah ta.

⁴⁸ Chyhsa hluhpi ta a chalih awpa ta ra ei ta, châhrasala “Dâvi Sawchapawpa, na ngiachhie mah y!” tahpa ta awh via rili ta.

⁴⁹ Zisu cha a duah ta, “Kei aw teh u,” tah ta. Mochaopa cha kei aw ei ta, a hnohta, “Thlalôhpa ta y la, thyu teh, a cha aw chu,” tah ei ta.

⁵⁰ Mochaopa cha a poh thypa ta, a kaw zaw ta, Zisu lâ thlai pangai ta.

⁵¹ Zisu ta a hnohta, “Khâpa cha taopa awpa ma na khoh?” tah ta. Mochaopa ta a hnohta, “Pachutuhpa, mo pavâ awpa ei khoh,” tah ta.

⁵² Zisu ta a hnohta, “Sie mah y, nâ ngiapâna ta a cha patlâh haw,” tah ta. Chatanachata a mo thlai vaw pavâ ta, lâpi liata Zisu cha zi pâ ha ta.