LUKA 9 - Mara Bible RV (BSI)

Lyuhchâpazy tuana

¹ Zisu ta pahrawh hleinozy awpakhy ta, ama hnohta ahripa zydua chô liata hmotaotheina nata biehneina nata pasanazy patlâh theina pie ta.

² Khazohpa khinarâh bie chho awpa nata tlâhleipazy patlâh awpa ta âmo cha tuah ta.

³ Ama hnohta, “Nama khitlyna châta khâpa hmah a phao khuh vy. Chôchahrei, sahria, viahchhâ nata tâkâ zy a phao leipa u la, viahkao zo no hnei hra khuh vy.

⁴ Nama tlôna o liata y aw ei chi ta, cha o tawhta nama sie aw.

⁵ Châ ly leipa maih cha, cha khih tawhta nama pua tita, ama thaileichâna pahnosa nawpa ta nama phei liata buchadoh chatho thlu teh u,” tah ta.

⁶ Chatanachata sie ei ta, khihzy chahryh ei ta, su to liata thâtihpha chhopa ta tlâhleipazy patlâh lymâ ei ta.

Bâtituhpa Zawhâna thina

⁷ Bei Herawda ta Zisu hmotaopa zydua cha thei ta, a noâh ngaita ta. A chhâpa cha thokha ta Zawhâna kha athihpa hry tawhta a vaw thyupa a châ tah ei ta,

⁸ thokha ta Elaizâh â vaw luah tah ei ta, thokha ta hlâno hrohsopa ahy tlyma a vaw thyu heihpa a châ ama tahpa vâta a châ.

⁹ Herawda ta, “Zawhâna kha a luh tai ha na ta, châhrasala he hawhta a thâtih ei thei heihpa chyhsa he ahy ma a châ tly?” tah ta. Zisu cha hmô a chhuah ta.

Sâh pangawh rih a pabie

¹⁰ Amâ vaw lie nahta, lyuhchâpazy ta ama hmotaopa zydua Zisu chho ei ta. Zisu ta âmo cha a chhi ta, Besaidâ khih ama tahpa lâ ânano ta siekhei ta.

¹¹ Châhrasala zawpizy ta ama pahno nahta, Zisu cha pazi ha hra ei ta. Zisu ta âmo cha a vaw ly ta, Khazohpa khinarâh thâtih chho ta, patlâh â ngiahpazy patlâh lymâ ta.

¹² Zâlâ a vaw châ nahta, pahrawh hleinozy a vy ei ta, a hnohta, “Su dâhthlohpa liata y pi ta. Chavâta tlô o nata nie awpa ama hmô thei nawpa ta, zawpizy he eima chheipâh khihzy nata lyuzy lâ pasiesa teh,” tah ei ta.

¹³ Zisu ta ama hnohta, “Nâmo ta nie awpa pie teh u,” tah ta. Âmo ta, “Sie ei sih la, he chyhsa zydua châta nie awpa eima chalei leipa ta cha, viahchhâ tlâ pangawh nata ngasa miano dei leipa ta khâpa hmah hnei ma pi,” tah ei ta.

¹⁴ Pitlohpa chapaw sai ta sâh pangawh rachhôh y ei ta. Zisu ta a pachupazy hnohta, “A hlao hlao ta, sypangawh lymâ ta patyusa teh u,” tah ta.

¹⁵ Cha hawhta tao ei ta, patyusa khai ei ta.

¹⁶ Viahchhâ tlâ pangawh nata ngasa miano cha la ta, avâ lâ uapa ta byhnâ aw ta. Viahchhâ cha pachhaih ta, zawpi rai awpa ta pachupazy cha pie ta.

¹⁷ Ama zydua ta nie ei ta, ama rih bie khai ta, ama nie bâhpa hrâbyh hmo hrawh hleino tlai a huah ei ta.

Pity ta Zisu cha Mesia a châzie a palâhâh

¹⁸ Zisu cha ano dei ta thlah a chhâ nota, a pachupazy ano lâ a vy ei ta, ama hnohta, “Chyhsazy ta ahy a châ eina tah ei?” tahpa ta hiahri ta.

¹⁹ Âmo ta, “Bâtituhpa Zawhâna a châ, cha tah ei ta; châhrasala thokha ta Elaizâh a châ, cha tah ei ta; thokha ta hrohsopa ahy tlyma a thyuheihpa a châ, ama cha tah,” tah ei ta.

²⁰ Zisu ta ama hnohta, “Cha khiahta la, nâmo zaw, ahy a châ eina tah ei chi?” tah ta. Pity ta, “Khazohpa Mesia na châ,” tah ta.

Zisu ta a thi nawpa kyh a reih chhielie

²¹ Cha bie cha ahy hmahta chho lei awpa ta Zisu ta biepie ta,

²² ama hnohta, “Chyhsa Sawchapawpa he pasa hluhpi tao aw ta, machâzy, theihthai beizy nata ryhpa pachutuhpazy ta khoh leipa aw ei ta, thie aw ei ta, noh thôhna noh ta pathyupa a châ aw,” tah ta.

Na Kraws a piapa ta na zi teh

²³ Chatawhcha chyhsa zydua hnohta, “Ahy rai eina zi khoh khiahta cha, anosasyh a paky sala, noh chareih a kraws a piapa ta na zi mawh sy.

²⁴ Ahy rai a hrona pabohsa a chhuahpa cha, a hrona pahlei aw ta, keima vâta a hrona a pahleipa deikua cha, a hrona a pabohsa aw.

²⁵ Chyhsa ta khizaw he a pôhpalôhpa ta hnei sala, anosasyh a pahleipa ta â parao tlôh khiahta cha, a châta khâpa a phahnai aw.

²⁶ Ahy rai kei nata ei biezy a zakheipa cha, Chyhsa Sawchapawpa ta a rônahna chhaota nata a Paw rônahna nata a vâlyuhchâpa pathaihpazy rônahna chhaota â zu tita, ano cha a zakhei hra aw.

²⁷ Hmeiseihta ta ei cha chho ei, he liata a duahpa sahlao thokhazy he, Khazohpa khinarâh ama hmô hlâlei cha thina a padi lei awpa ama y,” tah ta.

Hmia nanona

²⁸ Cha biezy cha a rei tawhta noh charie a châ nahta, Zisu cha Pity nata Zawhâna nata Zâmie zy a chhi ta, thlahchhâ awpa ta tlâh lâ kiah ta.

²⁹ Thlah a chhâ hai nota, a hmiaphaozie a vaw nano ta, a chysiazy vaw dieh khai hapa ta, a thlarawsie ngâ kaw ta.

³⁰ Chyhsa pano ta Zisu cha bie a chho ei ta. Cha chyhsazy cha Mawsi nata Elaizâh ama châ.

³¹ Rônahna ta a tobipa ta a zâ luah ei ta, Zisu thi nawpa kyh nata cha cha Zerusale liata a pangoh awpa kyh reih ei ta.

³² Pity nata a viasazy cha mokupa ta tlauah ei ta, amâ vaw hra nahta, a rônahna nata a hnohta chyhsa pano a duahpazy cha hmô ei ta.

³³ Cha chyhsazy ta Zisu ama siesai hai nota, Pity ta Zisu hnohta, “Pachutuhpa, he liata ypa he eima châta a pha na! Byureih miathôh, nâma châta miakha, Mawsi châta miakha, Elaizâh châta miakha eima tu aw,” tah ta. Khâpa ma a reih tahpa chhao a theihlô vei.

³⁴ Cha biezy cha a rei hai nota, meihdo a vaw chhoh ta, âmo cha khu ha ta. Meihdo liata amâ ngiapa cha chi ngaita ei ta.

³⁵ Meihdo tawhta ao vaw pua ta, “He he ei Sawchapawpa, ei tlyhpa a châ; a bie nathlie teh u!” tah ta.

³⁶ Ao â chalih nahta, Zisu cha ano dei ta hmô ei ta. Ama hmôpazy cha khâchâ a chalihkhei ei ta, cha nohzy liata ahy hnohta hmah chho veih ei.

Thlahpa puapa hneipa hawtipa a patlâh

³⁷ A mylâ ta tlâh tawhta amâ zu nahta, chyhsa hluhpi ta ano cha vaw dy ei ta.

³⁸ Zawpi hry tawhta chyhsa pakha vaw awh ta, “Pachutuhpa, ei sawchapawpa mo awpa ta ei châ haw, sawchapaw ei hnei chhôhpa châ tlôh ta.

³⁹ Ei sawchapawpa cha ahripa ta patu ta, eikhapi ta awh tyh ta, padaosa ta, a pachih buchaphy a pua khai ha tyh. Hmah paphao ta, a pua rai ta puasai khoh vei.

⁴⁰ Ahripa cha papua awpa ta na pachupazy a haw ei na ta, châhrasala papua thei veih ei,” tah ta.

⁴¹ Zisu ta a chhy ta, “Hy ngiapâleipa nata chhorupa chhâ saih u, khachâ ma nâma hnohta y aw na ta, ei cha pachâ thai aw ei tly? Na sawchapawpa cha he lâ a vaw chhi teh,” tah ta.

⁴² Â vy hai nota, ahripa ta taikhy ta, thata padaosa ta. Zisu ta thlahpa puapa cha ra ta, hawtipa cha patlâh ta, a paw lâta hlâ ta.

⁴³ Khazohpa hmotaotheina rônahzie cha chyhsa zydua ta noâh tah ngaita ei ta. Chyhsa zydua ta a hmotaopa zydua cha noâh ama tah kaw nota, Zisu ta a pachupazy hnohta,

A thi nawpa kyh a reih chanei

⁴⁴ “He biezy he nama nakhaoh liata a ngia mawh sy: Chyhsa Sawchapawpa he chyhsazy ku ta patusapa ta a y aw,” tah ta.

⁴⁵ Châhrasala a bie reipa cha, ama pahno thei lei nawpa ta nyupa a châpa vâta, a yzie pahno veih ei. Âmo hra ta a bie reipa kyh cha ano hiahri ngâh tlôh leipa ei ta.

Rônahna dopa

⁴⁶ Ama hry liata ahy ma a rônah chai aw tahpa kyh liata pachupazy hry liata aeichhiana pua ta.

⁴⁷ Zisu ta ama palôh pachâna cha pahno ta, hawti pakha a chhi ta, a kiapâh liata paduasa ta,

⁴⁸ ama hnohta, “Ahy rai ei moh vâta he hawti a lypa cha keima nâ lypa châ ta, ahy rai kei nâ lypa cha nâ tuahtuhpa a lypa a châ. Nama zydua hry liata a chyh chaipa cha, ano tlai cha a rônah chaipa a châ,” tah ta.

Châ dyuh leipa cha nama chhâh a châpa a châ

⁴⁹ Zawhâna ta a chhy ta, “Pachutuhpa, chyhsa pakha ta na moh ta ahripazy a papuapa hmô pi ta, châ zituhpazy hry liata â hlao hra leipa vâta eima pakhâ haw,” tah ta.

⁵⁰ Zisu ta a hnohta, “Pakhâ khuh vy, châ dyuh leipa cha nama chhâh a châpa a châ,” tah ta.

Samâri mo ta Zisu ama dytha

⁵¹ Zisu cha vârâh lâ a chhipa ta a y nawpa daihti â hnia nahta, Zerusale lâ sie awpa ta a chhuah ta.

⁵² A hmia lâta zikyu a râpazy pasiesa ta. Âmo cha sie ei ta, ano a vaw chhuahdy awpa ta Samâri khih liata a ngia ei ta.

⁵³ Châhrasala a hmia cha Zerusale lâ khâchâ a pahei hapa vâta, a vaw ly leipa ei ta.

⁵⁴ Cha cha a pachupa Zâmie nata Zawhâna ta ama pahno nahta, “Abeipa, he sahlao he kâ khai awpa ta, Elaizâh hawh khata avâ tawhta mei pathla awpa ta aw sih la, a pha na tah ma?” tah ei ta.

⁵⁵ Zisu cha a vaw heih ta, âmo cha ra ta, ama hnohta, “Kheihawhpa thlahpa tawhtapa ma nama châ tahpa pahno veih ei chi.

⁵⁶ Chyhsa Sawchapawpa he chyhsa hrona pahleipadia awpa ta a zupa châ leipa ta, pachha awpa ta a zupa a châ,” tah ta. Chatawhcha khi hro lâ sie ha ei ta.

Zisu zina ty

⁵⁷ Lâpi liata ama sie hai nota, chyhsa pakha ta Zisu hnohta, “Na siena maihta ei cha zi aw,” tah ta.

⁵⁸ Zisu ta a hnohta, “Changiezy ta khaoh hnei ei ta, vâ pavawzy ta bu ama hnei. Chyhsa Sawchapawpa deikua cha, luh nyu nawpa su chhao hnei vei,” tah ta.

⁵⁹ Chyhsa hropa hnohta, “Na zi teh,” tah ta. Châhrasala ano ta, “Abeipa, ei paw kei pabu ha tua awpa na pasaih mah y,” tah ta.

⁶⁰ Zisu ta a hnohta, “Athihpazy ta ama chyhsa athipazy cha pabu mawh ei sy. Nâ deikua cha sie la, Khazohpa khinarâh bie pathâhsa mah y,” tah ta.

⁶¹ Chyhsa hropa chhao ta, “Abeipa, ei cha zi aw, anodeikuacha ei o liata a ypazy atlâhna bie kei rei tua awpa na pasaih mah y,” tah ta.

⁶² Zisu ta a hnohta, “Ahy rai leipalie liata a ku soh ta hnôh lâ a heihpa cha, Khazohpa khinarâh chyhsa tlâh châ vei,” tah ta.