LUKA 8 - Mara Bible RV (BSI)

Zisu chakaotuhpa chanôzy

¹ Sathawthupa a châ khai tawhta, Zisu cha biechhopa nata Khazohpa khinarâh thâtihpha phuahpa ta, khihpi nata khitawzy chahryh lymâ ta. Pahrawh hleinozy a hnohta y ei ta,

² thlahpa chhiepazy âmo tawhta a papuapa nata pasana a patlâhpazy chhao amâ hlao hra. Âmo cha a chhôh tawhta ahripa pasari a papuapa Mâdali ama bipa Mâri,

³ Herawda sôh mokhâhtuhpa Kuza lapinô Zôanâ, Susanâ nata ahropa hluhpizy ama châ. Âmozy chata ama hneina tawhta Zisu cha ama deichhy lymâ.

Chi hietuhpa pakhona

⁴ Khi to tawhta chyhsazy ano lâ a vy ei ta, zawpi hluhpi amâ vaw hmaoh nahta, pakhona bie hmâpa ta bie reih ta,

⁵ “Chi hietuhpa cha chi hie awpa ta pua ta. Chi cha hie ta, thokha lâpi liata tla ei ta, tlypâpa ta y ei ta, avâ pavawzy ta ama dyh khai haw.

⁶ Thokha lôphiariapa liata tla ei ta, kaw pyuh ei ta, châhrasala ti pahna leipa vâta ama uah lilaw haw.

⁷ Thokha ahloh thih liata tla ei ta, ahloh nata pyuh khoh ei ta, ahloh ta a disao ha ei.

⁸ Thokha lei phapa liata tla ei ta, pyuh ei ta, a lie za kha ta ama pathei,” tah ta. Cha biezy cha a rei khai nahta, awh ta, “Ahy rai thei nawpa nakhaoh a hneipa ta thei mawh sy,” tah ta.

Pakhona bie hmâna chhâpa

⁹ A pachupazy ta pakhona bie cha a yzie hiahri ei ta,

¹⁰ Zisu ta, “Nâmo hnohta la Khazohpa khinarâh bienyupazy pahno awpa ta piepa nama châ haw. Mohropazy hnohta deikua cha, pakhona bie ta reipa a châ. Moh aw ei ta, châhrasala hmô aw veih ei; thei aw ei ta, châhrasala pahno thai aw veih ei.

¹¹ He he pakhona bie yzie cha a châ: Chi cha Khazohpa bie a châ.

¹² Lâpi liata a tlapazy cha bie a theipazy châ ei ta, ahripa a vy ta, a ngiapâ leipa ei sala pachha ama châ thei lei nawpa ta, ama palôh liata bie a ypa cha a lapa ha ei.

¹³ Hezy he lôphiariapa liata chi hiepazy ama châ. Bie ama theipa nahta, a ly ngaitapa ta a pyh ei ta, châhrasala thari ama thla leipa vâta, bohpi leipa chhôh zyh ei ta, reipasaona a vaw y nahta, ama paosai ha tyh.

¹⁴ Hezy he ahloh thih liata chi a tlapazy cha ama châ. Bie thei ei ta, châhrasala ama sie nahta, hro chhôh khihsa pachâna nata hneirôna nata phasana tlaichhaina zy ta âmo cha disao ta, ama thei pitloh thei vei.

¹⁵ Lei phapa liata a tlapazy cha hezy he ama châ. Bie thei ei ta, palôh dopa nata phapa phaopa ta â ipa ta patu ei ta, hria hualuapa ta thei ama pathei tyh.

Meiôh sona dopa

¹⁶ “Ahy hmah meiôh rao sala beih ta khu beih leipa ta, rakhô ry liata soh beih hra vei. O chhôh lâ a ngiapazy ta khaihna ama hmô thei nawpa ta, meiôh sona liata a soh tyh.

¹⁷ Phuah lei awpa ta phihpa khâpa hmah y leipa ta, pahno lei awpa nata a lâ lei awpa ta nyupa khâpa hmah y vei.

¹⁸ Chavâta nama bie theipa liata a chado teh u. A hneipa cha baichhapa châ aw ta, a hnei leipa cha, hneipa hawhta â pachâpa chhao, ano tawhta lapa a châ aw,” tah ta.

Zisu nô nata unawhzy

¹⁹ A nô nata a unawhzy Zisu lâ a vy ei ta, châhrasala zawpi vâta a hmô thei leipa ei ta.

²⁰ A hnohta, “Na nô nata na unawhzy ta châ hmô khoh ei ta, khôtho liata amâ duah thlâh haw,” tahpa ta chho ei ta.

²¹ Zisu ta âmo cha a chhy ta, “Khazohpa bie thei ta, a taopazy cha ei nô nata ei unawhzy ama châ,” tah ta.

Thlihpipa a chalihsa

²² Noh kha cha a pachupazy chhaota balyh kiah ta, ama hnohta, “Tipo haosâ lâ kiah ei suh u,” tah ta, balyh cha hia ei ta.

²³ Balyh ta ama sie hai nota Zisu cha a mô ha ta. Tipo liata thlihpi vaw pathli ta, ama balyh cha ti ta bie daihmâ ta, chichhihna a tyh ei ta.

²⁴ Vawh ei ta, Zisu cha kei pathyu ei ta, a hnohta, “Pachutuhpa, Pachutuhpa, eima leidia aw he zaw!” tah ei ta. Zisu cha a vaw hra ta, thlih nata tichatlaopa ru ngaitapa cha ra ta, a chalih ei ta, sidia ha ta.

²⁵ Zisu ta ama hnohta, “Khataih liata namâ ngiapâna a y haw?” tah ta. Chi kaw ei ta, ama noâh ngaita ta, “He chyhsa he ahy ma a châ tly? Thlih nata ti taih biepie ta, a bie ama zyhpa he!” tah ei ta.

Kerâsene liata ahripa patupa a patlâh

²⁶ Kerâsene râh tlô ei ta, cha cha Kâlili râh dady liata a ypa a châ.

²⁷ Zisu cha ngiahkâ lâ a pua nahta, khihpi liata chyhsa pakha, ahripa a hneipa ta a vaw tyh ta. Cha chyhsa cha chysia â tao leina tawhta bohpi châ ha ta, o liata y leipa ta thlâzy liata a y tyhpa a châ.

²⁸ Zisu a hmôpa nahta, awh ta, a hmiakô liata pao ta, ao paro ngaitapa ta, “Zisu, Khazohpa Chônôchai Sawchapawpa, ei chô liata khâpa tao awpa ma na khoh? Ei châ haw na, rie na taola khah y,” tah ta.

²⁹ Cha thlahpa puapa cha, cha chyhsa tawhta pua awpa ta, Zisu ta bie a vaw pie ha chiehpa a châ. Cha chyhsa cha thlahpa puapa chata patu tyh ta, bâlia ta buhpa ta keihrai daipa ta vaih tyhpa a châ. Châhrasala ama chahrynazy cha chhie ta, ahripa chata râhchawhpa lâ a chadai ha tyh.

³⁰ Zisu ta, “Na moh ahy?” tah ta. Ano ta, “Zahluh,” tah ta. Cha chyhsa chhôh liata ahripa hluhpi amâ ngiapa vâta a châ.

³¹ Ahripazy chata khaohtlô athupa liata tla awpa ta biepie lei awpa ta Zisu cha a haw ei ta.

³² Tlâh liata vao zaw hluhpi ama lao chuah ei ta. Vao chhôh liata pangiasa awpa ta Zisu cha a haw ei ta. Amâ hawna cha pasaih ta.

³³ Ahripazy cha chyhsa chhôh tawhta pua ei ta, vao chhôh liata a ngia ei ta, vao zaw cha pâdawhpa lâ tawhta tipo lâ a râ ei ta, tipo liata tlasao khai ha ei ta.

³⁴ Vao pasatuhpazy ta hmo a tlôpa cha ama hmô nahta, a râ ei ta, khihpi nata khitaw zy liata reih lymâ ei ta.

³⁵ Khâpa hmo ma a tlô tahpa mo awpa ta chyhsazy pua ei ta, Zisu kô ama tlô nahta, ahripa ta a puasai hapa chyhsa kha, chysia a tobipa ta palôh pasohpa ta Zisu phei thaby liata â tyu thlâhpa hmô ei ta, chi kaw ei ta.

³⁶ Hmo tlôpa a hmôpazy ta Zisu ta ahripa patupa a patlâhna thâtih cha âmo chho ei ta.

³⁷ Kerâsene chheipâh râh liata chyhsa zydua cha chi ngaita ei ta, âmo puasai awpa ta Zisu cha a haw ei ta. Chavâta Zisu cha balyh kiah ta, a lie ha ta.

³⁸ Ahripa ta a puasai hapa khata Zisu hnohta y awpa ta a haw ta, châhrasala Zisu ta,

³⁹ “Na o lâ a di la, Khazohpa ta na chô liata hmo rônahpa a taopa kha kei phuah mah y,” tah ta, pasiesa ha ta. Sie ta, Zisu ta a chô liata hmo rônahpa a taopa cha, khihpi chhôh zydua liata phuah lymâ ta.

Zairu sawchanô nata chanô thi lohpa patlâhna

⁴⁰ Zisu â vaw liepa cha zawpizy ta vaw hâ thlâh ha ei ta, thapha ngaitapa ta a vaw ly ei ta.

⁴¹ Chyhsa pakha a moh Zairu ama tahpa, pakhyna o hyutuhpa a vy ta, Zisu phei thaby liata pao ta, a o tly awpa ta a haw ta.

⁴² Zairu cha sawchanô matlupa, kô hrawh hleinopa hnei ta. Hawtinô cha thata pasa ta, thi daihmâ ta. Zisu cha a sie hai nota, zawpizy ta thata by ei ta.

⁴³ Chanô pakha kô hrawh hleino thi lohpa, a sôh hneipa zydua dawhtyzy liata a hmâh khai tawh chhao ta, ahy ta hmah ama patlâh thei leipa y ta.

⁴⁴ Cha chanô cha Zisu hnôh lâta pazi ta, a poh pai hria ta, a thi lopa cha thlai a hâh ha ta.

⁴⁵ Zisu ta, “Ahy nâ hria?” tah ta. Chyhsa to ta ama hria leizie reih ei ta, Pity ta, “Pachutuhpa, zawpizy ta thata cha by ei ta, ama cha chakho hôlô!” tah ta.

⁴⁶ Châhrasala Zisu ta, “Ahy tlyma ta eina hria, hmotaotheina ei chhôh tawhta a puapa ei pahno,” tah ta.

⁴⁷ Chanô cha â nyu thei khao leipa â pahno nahta, achalyuna chôta a vy ta, a hmiakô liata pao ta, a hriana chhâpa nata thlai a tlâh hanazie zy cha chyhsa zydua hmiakô liata phuah ta.

⁴⁸ Zisu ta a hnohta, “Ei sawchanô, nâ ngiapâna ta a cha patlâh haw. Thlalôhpa ta sie mah y,” tah ta.

⁴⁹ Cha bie cha a rei hai nota, pakhyna o hyutuhpa o tawhta chyhsa pakha a vy ta, “Na sawchanô a thi haw, Pachutuhpa he patypamâ khao khah y,” vaw tah ta.

⁵⁰ Cha bie cha Zisu ta a thei nahta, “Chi leipa la, a ngiapâ thlâh ha mah y, a tlâh aw,” tah ta.

⁵¹ O a tlô nahta, Pity, Zawhâna, Zâmie nata hawtinô nô nata paw dei leipa cha, ahy hmah o chhôh lâ a ngia awpa pasaih leipa ta.

⁵² Chyhsa zydua ta hawtinô cha chakheipa ta, mâchhie vaw sapa ei ta, Zisu ta, “Cha khah u, thi vei, â môpa a châ hih,” tah ta.

⁵³ A thi ha tlai tahpa ama pahnopa vâta Zisu cha pahneisao ei ta.

⁵⁴ Zisu ta hawtinô cha a ku patu ta, aw ta, “Hawtinô, thyu teh,” tah ta.

⁵⁵ Hawtinô thlahpa cha vaw kua ta, thlai kaw thyu ha ta. Hawtinô cha niepa pie awpa ta biepie ta.

⁵⁶ A nô nata a paw cha ama noâh ngaita ta. Châhrasala Zisu ta a hmotaopa cha ahy hmah chho lei awpa ta biepie ta.