LUKA 7 - Mara Bible RV (BSI)

Pheisaih za kha hyutuhpa chakaotuhpa a patlâh

¹ Zawpi theipa ta bie zydua a rei khai nahta, Kâpynia khih liata a ngia ta.

² Pheisaih za kha hyutuhpa chakaotuhpa kho ngaitapa cha tlâh leipa ta, thi daihmâ ta.

³ Zisu thâtih a thei nahta, a vy sala, a chakaotuhpa cha patlâh awpa ta a haw awpa ta Zu machâzy tuah ta.

⁴ Zisu kô kei tlô ei ta, thata a haw ei ta, “Ano la, cha hmo cha na taopa awpa tlâh a châ na,

⁵ eima phopi kyhpachâ ta, eimâ pakhyna o miah a sapatuhpa a châ,” tah ei ta.

⁶ Zisu cha ama hnohta sie ta, o a tlô chy ta, pheisaih za kha hyutuhpa ta a viasazy vaw tuah ta, “Abeipa, na rie a pathei khoh khah y, a o nâ ngiana tlâh châ va na.

⁷ Kei chhao nâ lâ a vy tlâh awpa ta a rao hra va na. A bie ta reih la, nâ chakaotuhpa cha a tlâh thlâh ha aw.

⁸ Kei chhao he biehneina a chabatuhpa châ na ta, ei ry liata pheisaihzy ama y hra. Pheisaih pakha hnohta, ‘Sie teh,’ tah na ta sie ta; ahropa hnohta, ‘A vy teh,’ tah na ta a vy ta; nâ chakaotuhpa hnohta, ‘He he tao teh,’ tah na ta a tao tyh,” tah ta.

⁹ Zisu ta cha biezy cha a thei nahta, a chô liata a noâh ngaita ta. Ano zituhpa zawpizy lâ a heih ta, ama hnohta, “Ei cha chho ei, Izarei lia hmahta he tlu ta ngiapâna he hmô va na,” tah ta.

¹⁰ A chyhsa tuapazy cha o lâ amâ vaw lie nahta, chakaotuhpa cha a tlâh hapa ta hmô ei ta.

Nôhmei sawchapawpa pathyuna

¹¹ A mylâ ta khih miakha Naini ama tahpa lâ sie ta, a pachupazy nata zawpi hluhpi a hnohta sie ei ta.

¹² Khih hawka â kei hnia nahta, athihpa amâ vaw sypa hmô ta. Cha chyhsa cha nôhmei sawchapaw matlupa a châ. Khihsaw hluhpi a hnohta a vy hra ei ta.

¹³ Abeipa ta nôhmei cha a hmô nahta, a chô liata a thapasa ngaita ta, a hnohta, “Cha khah y,” tah ta.

¹⁴ A kei hnia ta, chhâchhua cha kei hria ta, asytuhpazy cha a duah ei ta. “Satliapa, ei cha chho, thyu teh,” tah ta.

¹⁵ Athihpa cha a vaw tyuh ta, a reih vaw pathlie ta. Zisu ta satliapa cha a nô lâ hlâ ta.

¹⁶ Ama zydua ta chi ngaita ei ta, Khazohpa reithai ei ta, “Eima hry liata hrohsopa rônahpa a vaw pua hih! Khazohpa ta a chyhsazy a vaw tly ha hih!” tah ei ta.

¹⁷ A thâtih cha Zudia râh nata a chheipâh râh zydua liata pathâh ta.

Bâtituhpa Zawhâna tuapazy

¹⁸ Cha hmo zydua cha Zawhâna pachupazy ta Zawhâna cha chho ei ta.

¹⁹ Zawhâna ta a pachupa pano aw ta, Abeipa lâ tuah ta, a hnohta, “A vy awpa cha na châ ma, chyhsa hropa ma eima hâ aw?” tahpa ta kei pahiahrisa ta.

²⁰ Zisu kô ama tlô nahta, a hnohta, “Bâtituhpa Zawhâna ta, ‘A vy awpa cha na châ ma, chyhsa hropa ma eima hâ aw?’ tahpa cha hiahri awpa ta nâ lâ miah a vaw tuah,” tah ei ta.

²¹ Cha daihti liata, Zisu ta hri ohpa hluhpi nata potlana vâta pasapa nata thlahpa chhiepa ta a patupa hluhpi patlâhpa ta, mochaopa hluhpi mopavâna pie ta.

²² Âmo cha a chhy ta, “Vawh u la, nama hmôpa nata theipazy he Zawhâna kei chho u la, mochaopazy ama mo pavâ ta, pheisypazy phei ta sie ei ta, phawhpazy pathaih ei ta, nahpâpazy nah pavâpa ta, athihpazy pathyupa ta y ei ta, dyhchhiepazy hnohta Thâtihpha chhopa a châ, tahpa ta kei chho teh u.

²³ Ei chô liata palôhchâ leina a hnei leipa chyhsa cha a nohlao na,” tah ta.

²⁴ Zawhâna tuapazy ama sie tawhta, Zisu ta zawpi hnohta Zawhâna thâtih reih ta: “Khâpa mo awpa ta ma râhchawhpa lâ nama sie? Ziza ta lohthi a chalyupa moh awpa ta ma?

²⁵ Khâpa mo awpa tlai ta ma nama pua? Chysia naipa a tobipa mo awpa ta ma? Moh teh u, chysia rônahpa a tobi ta, lôhrâtlôpa ta a ypazy cha abei ozy liata mah ama y tâh.

²⁶ Cha khiah, khâpa mo awpa ta ma nama pua? Hrohsopa mo awpa ta ma? Ano cha hrohsopa a châ tlai, ei cha chho ei, hrohsopa hlâta rônah viapa a châ.

²⁷ “‘Moh teh u, ei lyuhchâpa na hmia lâta tuah na ta, Ano ta na hmia lâta na lâpi â chhuahdy aw,’ tahpa ta a thâtih ropa kha, ano he a châ.

²⁸ Ei cha chho ei, chanô sapa hry liata Zawhâna hlâta rônah viapa y veih ei. Châhrasala Khazohpa khinarâh liata chyhsa chyh chaipa cha ano hlâta a rônah via,” tah ta.

²⁹ A bie reipa cha zawpi zydua nata chhiekheituhpazy ta ama thei nahta, Khazohpa hmotaopa siapa liata a ly ngaita ei ta. Âmo cha Zawhâna liata bâti a châ chiehpazy ama châ.

³⁰ Phârisaihzy nata ryhpa pachutuhpazy deikua cha, âmo châta Khazohpa ryhraona cha khoh veih ei. Âmo cha Zawhâna liata bâti a châ leipazy ama châ.

³¹ Zisu ta, “He chhâ he khâpa nata ma ei pakho aw? Khâpa ma ama lyu?

³² Sôdaohna su liata a tyuh ei ta, “‘Ramo cha tôpa pi ta, Lâh leipa ei chi ta; Cha chakhei pi ta, Pachârôh hlei veih ei chi,’ tahpa ta â awsao raihriepa hawtizy ama lyu.

³³ Bâtituhpa Zawhâna a vy ta, viahchhâ nie leipa ta kresawhti chhao doh leipa ta y ta, ‘Ahripa a hnei,’ tah ei chi ta.

³⁴ Chyhsa Sawchapawpa a vy ta, niepa ta doh ta, ‘Moh tua u, rihkawhpa nata kresawhti parâpa, chhiekheituhpazy nata moleipazy viasa huh!’ nama tah heih.

³⁵ Châhrasala sona â dozie cha a saw zydua liata â lâ tyh,” tah ta.

Chanô moleipa ngiahthaina

³⁶ Phârisaih chyhsa pakha ta Zisu cha pati nie hrua ta, Phârisaih o liana cha a ngia ta, pati dôh ta.

³⁷ Phârisaih o liata pati dôhpa ta â tyupa thâtih cha, cha khih liata chanô moleipa pakha ta a thei nahta, alabastâ sathaw ropahâhpa ôh a cheipa ta vawh ta.

³⁸ Mothlih chhaota a hnôh lâta a phei thaby liata a duah ta, chanô mothlih ta Zisu phei cha padâ khai ha ta. A mothlih cha a sâ ta hru ta, Zisu phei cha a pahnâ ta, sathaw ropahâhpa ta a pheizy cha thu ta.

³⁹ Cha hmo cha Zisu pati nie a hruatuhpa Phârisaih ta a hmô nahta, a palôh liata, “He chyhsa he hrohsopa a châ tlai khiahta cha, a hriatuhpa chanô he ahy ma a châ tahpa nata kheihawhpa chyhsa ma a châ tahpa a pahno thlyu awpa châ ta, ano he chanô moleipa châ tlôh ta,” tah ta.

⁴⁰ Zisu ta a chhy ta, a hnohta, “Saimaw, na hnohta bie rei awpa ei hnei,” tah ta. Saimaw ta, “Pachutuhpa, reih mah y” tah ta.

⁴¹ Zisu ta, “Tâkâ dyu a pacheisatuhpa pakha liata chyhsa pano ta leibâh hnei ei ta. Pakha ta dinâri za pangawh a bâh ta, ahropa ta sypangawh a bâh ta.

⁴² A thô thei awpa ama châ leipa vâta, ama pano ta ama leibâh cha a ngiahthai raihrie ta. Cha pano liana chata, ahy ma dyupacheisatuhpa cha kyh a pachâ via aw?” tah ta.

⁴³ Saimaw ta a chhy ta, “Leibâh hluh via â ngiahthaipa cha châ sala ei pangiasa,” tah ta. Zisu ta a hnohta, “Na pachâzie â do,” tah ta.

⁴⁴ Chanô lâ a heih ta, Saimaw hnohta, “He chanô he na hmô ma? Nâ ta la na o liata a vaw ngia na ta, ei phei a si nawpa ti chhao na pie va chi. He chanô deikua heta a mothlih ta ei pheizy padâ ta, cha cha a sâ ta a hru.

⁴⁵ Nâ ta la a pahnâ chhao nâ pahnâ va chi, he chanô deikua he la, ei vaw ngiapa nahta, ei phei â pahnâpa bâh mâh vei.

⁴⁶ Nâ la ei luh liata sathaw na thu va chi. He chanô deikua cha, sathaw ropahâhpa ta ei phei sathaw a thu hih.

⁴⁷ Chavâta ei cha chho, he chanô he cha, a kyhpachâna a hluh ngaitapa vâta a moleina hluhpi kha a ngiahthaipa a châ haw. Ngiahthai awpa a chyh khiahta cha, kyhpachâna chhao a chyh via hra,” tah ta.

⁴⁸ Chatawhcha chanô hnohta, “Na moleinazy a ngiahthaipa a châ haw,” tah ta.

⁴⁹ Pati a dôhlâhpazy ta, “He chyhsa he ahy ma a châ tly, moleinazy taih a ngiahthaipa chyhsa he?” tahpa ta a chhohia ei ta.

⁵⁰ Zisu ta chanô hnohta, “Nâ ngiapâna ta a cha pachha haw. Thlahlôhpa ta sie mah y,” tah ta.