LUKA 3 - Mara Bible RV (BSI)

Bâtituhpa Zawhâna pachuna

¹ Taibiria Kaisarâ â beina kô hrawh hleipangawhna liata, Pawtia Pilâ cha Zudia râh râhvaotuhpa châ ta, Herawda cha Kâlili bei a châ. A unawhpa Phili cha Ituria nata Tarâkôniti bei châ ta, Lysania cha Abilene bei a châ.

² Anâ nata Kaiphâ theihthai beichaipazy ama châ nota, râhchawhpa liata a ypa Zekaria sawchapawpa Zawhâna hnohta Khazohpa bie vaw tlô ta.

³ Zawhâna cha Zawdâh chheipâh râh zydua chahryh ta, moleinazy a ngiahthai nawpa ta rona bâtina bie chho ta.

⁴ Hrohsopa Isai châbu biezy liata ropa hawhta, “Râhchawhpa liata awhtuhpa ao ta, ‘Abeipa lâthlôh a chhuahdy u la, A lâpizy patlâsa teh u.

⁵ Saikao to pabiepa châ aw ta, Tlâhpi nata tlâhthlôh to pahnaipa a châ aw. Lâpi akopazy patlâpa châ aw ta, Lâpi chhiepazy pamihpa a châ aw.

⁶ Chyhsa zydua ta Khazohpa pachhana ama hmô aw,’” tahpa ta bie chho ta.

⁷ Bâti châ awpa ta ano lâ zawpi a vypazy hnohta Zawhâna ta, “Nâmo, vâzi pathlazy saih u, hiehâhna vaw tlô awpa a râsai awpa ta ahy ma zikyu châ râ ei?

⁸ Rona moh phaoh tlâhpa ta pathei teh u. ‘Abarahâ pathla eima châ,’ a tah khuh vy. Khazohpa ta he alôzy tawhna heta Abarahâ pathlazy a padua thei tahpa ei cha chho ei.

⁹ Tahmâ chhao tlai he, tho tharizy liata ahrei sopa a châ haw. Tho to thei pha a pathei leipa maih thlu ta mei liata thypa a châ aw,” tah ta.

¹⁰ Zawpizy ta a hnohta, “Cha khiahta la khâpa eima tao aw?” tah ei ta.

¹¹ Zawhâna ta ama hnohta, “Ahy rai viahkao zo no a hneipa ta, a hnei leipa hnohta pie sala, ahy rai niedo a hneipa ta, cha hawhta tao hra mawh sy,” tah ta.

¹² Chhiekheituhpazy chhao ta bâti châ awpa ta a vy ei ta, a hnohta, “Pachutuhpa, khâpa eima tao aw?” tah ei ta.

¹³ Ano ta ama hnohta, “Chhie nama khei awpa zie hlâta a hluh via khei khuh vy,” tah ta.

¹⁴ Pheisaihzy chhao ta a hnohta, “Keimo chhao he khâpa eima tao aw?” tah ei ta. Ano ta ama hnohta, “Pachhiparypa nata â doleipa ta leihpa ta ahy sôh hmah nama la awpa châ vei. Nama hlao liata palôhtlâh namâ paoh awpa a châ,” tah ta.

¹⁵ Zawpizy cha ama hnabeiseihna a sâh ngaita ta, chyhsa to ta ama palôh liata, “Zawhâna he Krista châ thlâh ha khiah maw,” tahpa ta pachâ ei ta.

¹⁶ Zawhâna ta âmo cha a chhy ta, “Kei ta la ti ta cha bâti ei na ta, châhrasala keima hlâta rônah viapa â vy hai, kei la a pheiky ri a pathlâ tlâh chhao châ va na. Ano ta la Thlahpa Pathaihpa nata mei ta a cha bâti aw ei.

¹⁷ A ku liata barah y ta, a sawhri sâh zie aw ta, a sâh cha pâh liata a ryh aw. Asihpa deikua cha mei pachhai thei leipa liata a rao aw,” tah ta.

¹⁸ Pasyuna bie hropa hluhpi hmâpa ta, chyhsazy hnohta Thâtihpha chho lymâ ta.

¹⁹ Bei Herawda cha a unawhpa lapinô Herawdi kyh liata nata hmo moleipa a taopa zydua vâta Zawhâna ta vaw chhorei ta.

²⁰ Zawhâna hmotaopazy ta a hie pahâh via rili ta, chavâta Zawhâna cha patâhna o liata khô ha ta.

Zisu bâtina

²¹ Chyhsa zydua bâti ama châ khai tawhta, Zisu chhao cha bâti châ hra ta. Thlah a chhâ hai nota, avâ a vaw pahy ta,

²² Thlahpa Pathaihpa cha pôhpa hneipa ta, vachhuh hawhta za chô ta, Zisu chô liata a zâ choh ta. Avâ tawhta ao za pua ta, “Ei Sawchapaw kyh ei pachâpa na châ, na chô liata ei ly ngaita,” tah ta.

Zisu thyutôna

²³ Zisu cha chakaona rai â thao nota, kô sythôh rachhôhpa châ ta, chyhsapa lâ tawhta cha Zawsi sawchapawpa a châ. Zawsi cha Heli sawchapawpa châ ta,

²⁴ Heli cha Mathâ sawchapawpa a châ. Mathâ cha Livai sawchapawpa châ ta, Livai cha Melki sawchapawpa a châ. Melki cha Zanai sawchapawpa châ ta, Zanai cha Zawsi sawchapawpa a châ.

²⁵ Zawsi cha Mâtathia sawchapawpa châ ta, Mâtathia cha Amôsâ sawchapawpa a châ. Amôsâ cha Nâhu sawchapawpa châ ta, Nâhu cha Esli sawchapawpa a châ. Esli cha Nakai sawchapawpa châ ta,

²⁶ Nakai cha Mâthi sawchapawpa a châ. Mâthi cha Mâtathia sawchapawpa châ ta, Mâtathia cha Semei sawchapawpa a châ. Semei cha Zôseka sawchapawpa châ ta, Zôseka cha Zôdâ sawchapawpa a châ.

²⁷ Zôdâ cha Zôanâ sawchapawpa châ ta, Zôanâ cha Resâ sawchapawpa a châ. Resâ cha Zerubâbe sawchapawpa châ ta, Zerubâbe cha Salâtia sawchapawpa a châ. Salâtia cha Neri sawchapawpa châ ta,

²⁸ Neri cha Melki sawchapawpa a châ. Melki cha Adi sawchapawpa châ ta, Adi cha Kôsâ sawchapawpa a châ. Kôsâ cha Elmadâ sawchapawpa châ ta, Elmadâ cha Erâ sawchapawpa a châ.

²⁹ Erâ cha Zawsua sawchapawpa châ ta, Zawsua cha Eliaza sawchapawpa a châ. Eliaza cha Zôri sawchapawpa châ ta, Zôri cha Mathâ sawchapawpa a châ. Mathâ cha Livai sawchapawpa châ ta,

³⁰ Livai cha Simeôna sawchapawpa a châ. Simeôna cha Zudâh sawchapawpa châ ta, Zudâh cha Zawsi sawchapawpa a châ. Zawsi cha Zônami sawchapawpa châ ta, Zônami cha Eliakima sawchapawpa a châ.

³¹ Eliakima cha Melia sawchapawpa châ ta, Melia cha Menâ sawchapawpa a châ. Menâ cha Mâtathâ sawchapawpa châ ta, Mâtathâ cha Nâthâ sawchapawpa a châ. Nâthâ cha Dâvi sawchapawpa châ ta,

³² Dâvi cha Zese sawchapawpa a châ. Zese cha Ôbedâ sawchapawpa châ ta, Ôbedâ cha Bôaza sawchapawpa a châ. Bôaza cha Salâ sawchapawpa châ ta, Salâ cha Nâsô sawchapawpa a châ.

³³ Nâsô cha Aminadâ sawchapawpa châ ta, Aminadâ cha Âdami sawchapawpa a châ. Âdami cha Ani sawchapawpa châ ta, Ani cha Hezrô sawchapawpa a châ. Hezrô cha Pereza sawchapawpa châ ta, Pereza cha Zudâh sawchapawpa a châ.

³⁴ Zudâh cha Zakaw sawchapawpa châ ta, Zakaw cha Aisika sawchapawpa a châ. Aisika cha Abarahâ sawchapawpa châ ta, Abarahâ cha Terâ sawchapawpa a châ. Terâ cha Nâhaw sawchapawpa châ ta,

³⁵ Nâhaw cha Seru sawchapawpa a châ. Seru cha Reu sawchapawpa châ ta, Reu cha Pele sawchapawpa a châ. Pele cha Ebe sawchapawpa châ ta, Ebe cha Selâh sawchapawpa a châ.

³⁶ Selâh cha Kainanâ sawchapawpa châ ta, Kainanâ cha Aphakhâ sawchapawpa a châ. Aphakhâ cha Semâ sawchapawpa châ ta, Semâ cha Nôah sawchapawpa a châ. Nôah cha Lâmeka sawchapawpa châ ta,

³⁷ Lâmeka cha Methuselâ sawchapawpa a châ. Methuselâ cha Enawka sawchapawpa châ ta, Enawka cha Zare sawchapawpa a châ. Zare cha Mahâlale sawchapawpa châ ta, Mahâlale cha Kainanâ sawchapawpa a châ.

³⁸ Kainanâ cha Enawsâ sawchapawpa châ ta, Enawsâ cha Sethâ sawchapawpa a châ. Sethâ cha Âdâh sawchapawpa châ ta, Âdâh cha Khazohpa sawchapawpa a châ.