LUKA 23 - Mara Bible RV (BSI)

Zisu Pilâ hmiakô liata

¹ Zawpi zydua cha thyu ei ta, Zisu cha Pilâ lâ a chhi ei ta.

² “He chyhsa heta eima phopi pasiesa chheipa ta, Kaisarâ lâ chhie pie awpa miah pakhâ ta, anosasyh ta Mesia â tahpa nata abeipa â tahpa eima thei,” tahpa ta leih ei ta.

³ Pilâ ta, “Zuzy Beipa na châ ma?” tah ta. Zisu ta, “Na reipa hawhta ei châ,” tah ta.

⁴ Pilâ ta theihthai beizy nata zawpizy hnohta, “He chyhsa chô liana heta thailei pachâsa nawpa khâpa hmah hmô va na,” tah ta.

⁵ Châhrasala âmo ta, “Kâlili râh tawhta pathaopa ta, he su taihta, Zudia râh su to liata pachupa ta chyhsazy a patypamâ lymâ,” tahpa ta leih via rili ei ta.

Zisu Herawda hmiakô liata

⁶ Pilâ ta cha cha a thei nahta, Zisu cha Kâlili chyhsa a châ nata châ lei hiahri ta.

⁷ Herawda avaona râh chyhsa a châpa a pahno nahta, Herawda lâ hlâ ha ta. Cha nota Herawda cha Zerusale liata a y no châ ta.

⁸ Herawda cha Zisu a hmô nahta, a ly ngaita ta. Zisu thâtih vaw thei ha ta, hmonoâhpa a taopa kheihawhpa chhâ ma hmô awpa hnabeiseih tyh ta, hmô awpa a byuh kaw tyhpa a châ.

⁹ Chavâta bie hluhpi hiahri ta, châhrasala a chhy tlâ leipa ta.

¹⁰ Theihthai beizy nata ryhpa pachutuhpazy a duah ei ta, thata leih ei ta.

¹¹ Herawda nata a pheisaihzy ta Zisu cha mohnao kawpa ta pasipasawh ei ta. Poh rônahpa pabupa ta, Pilâ lâ hlâ pakhua ha ta.

¹² Cha noh tawhta Herawda nata Pilâ cha a viasa kaw ei ta. Cha hlâ zydua cha a dyh thai leipa ama châ.

Zisu thi awpa ta pathluna

¹³ Pilâ ta theihthai beizy, ryureituhpazy nata zawpizy awpakhy ta,

¹⁴ ama hnohta, “He chyhsa he, chyhsazy a siekheichhei tahpa ta kei lâ namâ vaw chhipa kha châ ta. Nama hmiakô lia tlai ta a padai na ta, pachâ teh u, nama leihna kyh liana khata, he chyhsa chô liata a thaileichâna khâpa hmah hmô va na.

¹⁵ Herawda chhao ta hmô hra vei. Keimo lâ miah a vaw hlâ pakhua haw. Hmeiseih ta la, thina tlâh a châpa khâpa hmo hmah tao vei.

¹⁶ Chavâta chhei aw na ta, ei pathlie ha aw,” tah ta.

¹⁷ Zawpakhô kyhchhi maihta Pilâ ta atâhpa pakha zawpi lâ papua tyh ta.

¹⁸ Châhrasala â raoh ngaitapa ta awh ei ta. “Kha chyhsa kha pahleipadia la, Bârabâ kha miah papuapa teh,” tah ei ta.

¹⁹ Cha chyhsa cha sawhkhâ a dyuhpa ta khihpi liata tymâna a taopa vâta nata liany a cheipa vâta patâhna o liata khôpa a châ.

²⁰ Pilâ ta Zisu a papua khohpa vâta, ama hnohta bie reih heih ta.

²¹ Châhrasala, “Khaipâ teh, khaipâ teh!” tahpa ta awh via rili ei ta.

²² A ei thôhna ta ama hnohta, “Khazia maw, he chyhsa heta khâpa hmo ma a parao? Thina tlâh a châpa thaileichâna ano liata khâpa hmah hmô va na. Chavâta chhei aw na ta, ei pathlie aw,” tah ta.

²³ Châhrasala khaipâ awpa ta ao paro ngaitapa ta khâchâ a haw ei ta. Ama ao ta Pilâ cha pahnie ha ta.

²⁴ Amâ hawpa hawhta pie awpa ta biechhâna a tao haw.

²⁵ Papua awpa ta amâ hawpa, sawhkhâ â dyuhpa vâta nata lianycheina vâta patâhna o liata ama khôpa cha papua ta, Zisu deikua cha, ama khozie hawhta tao awpa ta âmo lâ hlâ ta.

Khaipâna

²⁶ Zisu cha siekhei ei ta, Kurini khihpa Saimaw, a yna râh lâ tawhta a vaw tlôpa cha patu ei ta, kraws papiasapa ta, Zisu hnôh lâta pasiesa ei ta.

²⁷ Zawpi hluhpi nata ano châta mâchhiesapa ta a chakheipa chanôzy ta zi ei ta.

²⁸ Zisu cha âmo lâ a heih ta ama hnohta, “Zerusale sawchanôzy saih u, na chakhei khah u, nâmo nata nama sawzy châta tlao cha teh u.

²⁹ Moh teh u, nohzy a vaw tlô hai. Cha nohzy liata, ‘Chanô chohpa nata nawh â choh beih leipa chhi nata nawh ta a pazy beih leipa sâhpi zy cha ama nohlao na!’ ama tah aw.

³⁰ Cha tina chata chyhsazy ta tlâhpizy hnohta, ‘Miah vi teh,’ tah aw ei ta; tlâhthlôhzy hnohta, ‘Miah khu teh,’ ama tah aw.

³¹ Tho hrohpa chô lia hmahta cha hawhta ama tao khiahta cha, tho raohpa chô liata chhochhi cha, khatlu ta ma ama tao aw tly?” tah ta.

³² A hnohta mohropa pano, moleipa thie awpazy a chhi hra ei ta.

³³ Luh Ru Su ama tahpa Kalvari tlâh ama tlô nahta, kraws liata khaipâ ei ta. Moleipazy chhao, a chachâh lâta pakha, a chavei lâta pakha khaipâ hra ei ta.

³⁴ Zisu ta, “Ei Paw y, âmo he a ngiahthai mah y, ama hmotaopa he ama pahno vei na,” tah ta. A chysiazy a rai awpa ta nuby a dao ei ta.

³⁵ Zawpizy a kiapâh liata a duah ei ta, sai thlâh ha ei ta. Ryureituhpazy deikua ta pasipasawh ei ta, “Mohropazy a pachha tyh mâh tâh. Khazohpa Atlyhpa Mesia a châ tlai khiahta cha, anosasyh a pachha bao sa!” tah ei ta.

³⁶ Pheisaihzy chhao ta Zisu cha pasipasawh ei ta, ano lâ a vy ei ta, kresawhti thaopa pie ei ta.

³⁷ “Zuzy Beipa na châ tlai khiahta cha, nâmasasyh ta a pachha châh chi!” tah ei ta.

³⁸ A luh chô liata Krikâh reih, Rawma reih nata Hebrai reihzy ta, “He he Zuzy Beipa a châ,” tahpa ta tawh ei ta.

³⁹ Moleipa ama khaipâpa pakha ta Zisu cha reipachhie ta, “Mesia châ va chi mâ? Nâmasasyh ta a pachha la, keimo chhao miah pachha châh chi!” tah ta.

⁴⁰ Pakhapa ta ano cha ra ta, “Khazohpa tlai chhao chi va chi ma? Thaileichâna miakha ta hriepa nama châpa he.

⁴¹ Keimo la hrie tlâh rai eima châ. Eima hmotaopa ty eima hmôpa a châ hih. He chyhsa deikua he cha, khâpa hmah parao vei,” tah ta.

⁴² Chatawhcha Zisu hnohta, “Zisu, na khinarâh na tlô tita nâ thei mah y,” tah ta.

⁴³ Zisu ta a hnohta, “Hmeiseihta ta ei cha chho, tanoh he ei hnohta Pârâdi liata na y aw,” tah ta.

Zisu thina

⁴⁴ Nohchhô dawh hrawh hleino rachhôh tawhta zâlâ dawh thôh taih, alei chô zydua vaw zoh kaluh ha ta.

⁴⁵ Noh khaih khao leipa ta, Achhyna o pohraipa cha â khophie ta a hrie ta.

⁴⁶ Zisu cha ao paro ngaitapa ta awh ta, “Ei Paw, na ku liata ei thlahpa ei cha pavaosa!” tah ta. Cha bie cha a rei khai nahta, a thlahpa pathlie ha ta.

⁴⁷ Pheisaih za kha hyutuhpa ta hmo a tlôpa cha a hmô nahta, “He chyhsa he chyhsa siapa tlai na a châ!” tah ta, Khazohpa reithai ta.

⁴⁸ Cha hmo cha sai awpa ta Zawpi a vypakhypa zydua ta, hmo a tlôpa cha ama hmô nahta, ama chachôhnazy a chôpa ta o lâ a di ha ei ta.

⁴⁹ Zisu hmiapahnopa zydua nata Kâlili tawhta a vaw zipa chanôzy cha, lâhlapi ta a duah ei ta, cha hmozy cha sai ei ta.

Zisu pabuna

⁵⁰ Chyhsa pakha, a moh Zawsi ama tahpa, ryureituh phapa nata siapa y ta.

⁵¹ Ano cha Zisu thâtih ama pachiana nata ama hmotaopa a paryhsa leipa kha a châ. Arimathai khihpa Zu chyhsa châ ta, Khazohpa khinarâh vaw tlô awpa a hâpa a châ.

⁵² Cha chyhsa chata Pilâ lâ vawh ta, Zisu ri kei hiah ta.

⁵³ Zisu ri cha la ta, poh rih dipa ta pahly ta, lôkhaoh khiepa thlâ, ahy hmahta pabu mâh leina liata pazia ta.

⁵⁴ Cha noh cha Pachynoh châ ta, Pahânoh vaw châ daihmâ ha ta.

⁵⁵ Kâlili tawhta Zisu a vaw zipa chanôzy chhao khata Zawsi cha zi ei ta, thlâ nata a ri pabunazie zy cha hmô ei ta.

⁵⁶ O lâ a di ei ta, ropahâhpa nata sathawzy a chhuanoh ei ta. Pahânoh cha biepiepa hawhta a pahâ ei ta.