LUKA 20 - Mara Bible RV (BSI)

Zisu biehneina kyh hiahrina

¹ Noh kha cha Zisu ta Achhyna o liata zawpi pachu ta, thâtihpha a rei hai nota, theihthai beizy nata ryhpa pachutuhpazy cha machâzy chhaota a vy ei ta,

² a hnohta, “Khâpa biehneina ta ma he hmozy he na tao, ahy ma he biehneina he châ pie? miah chho teh,” tah ei ta.

³ Zisu ta âmo cha a chhy ta, “Kei chhao ta bie kawh kha ei cha hiahri hra aw ei. Na chho teh u,

⁴ Zawhâna bâtina kha vârâh tawhtapa ma, chyhsapa tawhtapa maw?” tah ta.

⁵ A chhohia ei ta, “‘Vârâh tawhtapa,’ tah mawh sih la, ‘Cha khiahta cha khazia namâ ngiapâ vei?’ miah tah ha aw.

⁶ ‘Chyhsapa tawhtapa,’ tah mawh sih la, Zawhâna cha hrohsopa a châpa pahno pasia tlôh ei ta, chyhsa zydua ta alô ta miah vawhsao aw ei,” tah ei ta.

⁷ Chatanachata khataih tawhtapa ma a châ tahpa ama pahno leizie a chhy ei ta.

⁸ Zisu ta ama hnohta, “Kei chhao ta, ahy biehneina ta ma he hmozy he ei tao tahpa cha chho hra aw veih ei na,” tah ta.

Kre sadô thlyuhlaopazy pakhona bie

⁹ Zawpi hnohta he pakhona bie he reih ta: “Chyhsa pakha cha kre sadô tao ta, lyutaopazy hnohta thlyuhlao awpa ta pie ta, bohpi y awpa ta râh hro lâ sie ha ta.

¹⁰ A thei lyu daihti a tlô nahta, kre sadô liata a patheipa tawhta a tovyuh la awpa ta, thlyuhlaotuhpazy lâta chakaotuhpa pakha tuah ta. Châhrasala thlyuhlaotuhpazy ta vaw tu ei ta, ku ruapa ta pasiesa ei ta.

¹¹ Chakaotuhpa hropa tuah heih ta. Cha chhao cha vaw tu ei ta, nozachhih ngaitapa ta tao ei ta, ku ruapa ta pasiesa ei ta.

¹² A pathôhna tuah heih ta. Cha chhao cha hmah paphaopa ta, papua ha ei ta.

¹³ Chatawhcha kre sadô hneituhpa ta, ‘Kheihta ma ei tao aw tly? Ei sawchapawpa kho ngaitapa he ei tuah thlâh ha tua aw. Ano chhâ he la ama vaw za via ngyu na,’ tah ta.

¹⁴ Châhrasala thlyuhlaotuhpazy ta ano cha ama vaw hmô nahta, a chhohia ei ta, ‘He chyhsa he ryutotuhpa a châ hih. A ryu cha eima to thei nawpa ta, thie ei suh u,’ tah ei ta.

¹⁵ Chatanachata kre sadô tawhta thy pathlah ei ta, ama thie haw. Kre sadô hneituhpa ta kheihta a tao aw ei?

¹⁶ A vy aw ta, thlyuhlaotuhpazy cha pahleipadia aw ta, kre sadô cha mohropazy a pie aw ei,” tah ta. Cha cha ama thei nahta, “Khazohpa ta pasaih khah sy?” tah ei ta.

¹⁷ Zisu ta âmo cha moh ta, “Cha khiahta cha, he bie ropa he khâpa ma a châ tly? “‘O satuhpazy alô kho leipa cha, A ki lô a vaw châ haw,’ tahpa hih,” tah ta.

¹⁸ “Ahy rai, cha alô chô liata a paopa cha keichheih aw ta, a vipa chhochhi cha a phypazao khai aw,” tah ta.

Kaisarâ lâ chhie piena kyh

¹⁹ Cha nona tlai chata ryhpa pachutuhpazy nata theihthai beizy ta, cha pakhona bie cha âmo a rei chakiana bie a châ tahpa pahno ei ta, chavâta patu a chhuah ei ta, châhrasala zawpi chi ei ta.

²⁰ Mohpathli awpa ta mohparutuhpazy tuah ei ta. Mohparutuhpazy cha a bie nathlie khoh hmeiseihpa hawhta y pakhei ei ta, râhvaotuhpa ryureina nata biehneina liata tlôkhei awpa ta, a bie rei chheipa patu awpa ta a byh ei ta.

²¹ Zisu cha bie hiahri ei ta, “Pachutuhpa, thlua hlei hnei leipa ta, âdopa ta bie reipa ta pachu chi ta, hmeiseihna kyh ta Khazohpa lâpi na pachu tyh tahpa eima pahno.

²² Kaisarâ lâ chhie piepa he eima ryhpa chakhiapa a châ ma, châ vei?” tah ei ta.

²³ Châhrasala Zisu ta ama pasuapachao tahpa pahno ta, ama hnohta,

²⁴ “Dinâri tâkâ na vaw pahmô tua u, ahy nothlahpa nata ahy moh ma â choh?” tah ta. Âmo ta, “Kaisarâ” tah ei ta.

²⁵ Zisu ta ama hnohta, “Cha thlaopa cha, Kaisarâ hmozy cha Kaisarâ lâ pie u la, Khazohpa hmozy cha Khazohpa lâ pie châh ei chi,” tah ta.

²⁶ Zawpi hmiakô liata a bie rei chheipa patu awpa hmô leipa ei ta, â chhyna cha tlao ama noâh kaw ta, amâ chalih haw.

Thyuheihna kyh hiahrina

²⁷ Thyuheihna y vei a tahpa Saduasizy ano lâ a vy ei ta,

²⁸ a hnohta hiahrina tao ei ta, “Pachutuhpa, Mawsi ta châ miah ropa ta, ahy rai saw leipa ta a lapinô a thisai khiahta cha, a unawhpa ta nôhmei cha hnei aw ta, a unawhpa a thi hapa châta chi a pathlapa aw, tahpa ta miah a chho.

²⁹ Unawh pasari y ei ta. A uhthei chaipa ta lapinô hnei ta, saw hnei leipa ta thi ha ta.

³⁰ A panona ta a uhta lapinô cha hnei ta, ano chhao cha saw hnei leipa ta thi ha ta.

³¹ A pathôhna ta a uhta lapinô cha hnei heih ta, cha hawhna chata tao lymâ ei ta, pasarina taihta saw hnei leipa ta thi khai ha ei ta.

³² Achhâna liata chanô chhao cha thi ha hra ta.

³³ Thyuheihna liata chanô cha ahy lapinô ma a châ aw? Ama pasari ta lapinô ta hnei chyu tlôh ei ta,” tah ei ta.

³⁴ Zisu ta ama hnohta, “He chhâ sawzy heta lapinô nata vahpa zy ama hnei tyh.

³⁵ Chhâ vaw y awpa a to tlâh awpa ta pachâpazy nata athihpa hry tawhta thyuheihna liata a hlao tlâh awpa ta raopazy deikua la, lapinô pakia khao leipa aw ei ta, vahpa hnei khao aw veih ei.

³⁶ Thi thei khao aw veih ei. Thyuheihna sawzy ama châpa vâta, Khazohpa sawzy châ ei ta, vâlyuhchâpazy hawhta ama châ haw.

³⁷ Athihpazy pathyupa ta ama y awpa kyh he, Mawsi chhao khata a vaw reih haw. Abeipa cha Abarahâ Khazohpa, Aisika Khazohpa, Zakaw Khazohpa tahpa ta, thobuh liana kha a vaw palâsa ha mâh tâh.

³⁸ Khazohpa cha athihpazy Khazohpa châ vei, ahrohpazy Khazohpa a châ. Chyhsa zydua he ano châta a hrohpa châ khai tlôh ei ta,” tah ta.

³⁹ Ryhpa pachutuhpa thokha ta a chhy ei ta, “Pachutuhpa, na reipa cha â do kaw na,” tah ei ta.

⁴⁰ Cha khai tawhta cha bie hropa hiahri ngâh khao veih ei.

Mesia kyh hiahri pasiana

⁴¹ Zisu ta ama hnohta, “Kheihtazie ta ma Mesia cha Dâvi Sawchapawpa a châ ama tah tyh tly?

⁴² Hlazy châbu liata, Dâvi cheingei ta, “‘Abeipa ta ei Beipa hnohta, Ei chachâh lâta a tyuh teh,

⁴³ Na chariahzy na phei tlyna ta ei tao khai hlâlei cha,’ a tahpa kha.

⁴⁴ Dâvi ta ano cha Abeipa a tah tlôh khiahta cha, kheihta ma a sawchapawpa a châ thei rai aw?” tah ta.

Ryhpa pachutuhpazy tawhta a vaih awpa ta pachuna

⁴⁵ Chyhsa zydua theina liata, a pachupazy hnohta,

⁴⁶ “Ryhpa pachutuhpazy tawhta a vaih teh u. Âmo cha viahkao pasipazy a kypa ta, sôdaohna suzy liata anaohna hnabeiseih ei ta, pakhyna ozy liata dyuchhai pha chaipazy a hnaw ei ta, kyhchhina liata su pha chaipazy amâ haw tyh.

⁴⁷ Nôhmei olyuzy nie khai ei ta, a chapuahchaluah nawpa ta a pasi pi ta thlah ama chhâ tyh. Cha hawhpa chyhsazy cha thailei ama châ pachai aw,” tah ta.