LUKA 2 - Mara Bible RV (BSI)

Zisu Pina

¹ Cha nohzy liata, Kaisarâ Awkâstu ta khizaw zydua maluhpi rei awpa ta biepie ta.

² Cha maluhpi reina cha Kurinia Suria râhvaotuhpa a châ nota tao tuapa a châ.

³ Chyhsa to ama moh parosa awpa ta ama khih lâ sie chyu ei ta.

⁴ Zawsi chhao Dâvi chhôhkha nata a pathla a châpa vâta, Kâlili râh Nâzari khih tawhta Bethlehe ama tahpa Zudia râh Dâvi khihpi lâ sie ta.

⁵ Moh parosa awpa ta, lapinô châta â pahawhpa Mâri, saw pih daihmâpa nata sie ei ta.

⁶ Cha liata ama y nota, Mâri cha a saw pina noh a vaw ki ha ta.

⁷ Saw tuapa ta chapaw sa ta, poh pahlyna ta pahly ta, khichhai riebu liata amâ tlôh leipa vâta, sachâki liata pazia ta.

Mietaku vaituhpazy nata vâlyuhchâpazy

⁸ Cha râh liata mietaku vaituhpazy y ei ta, zâ ta ama mietakuzy vaipa ta lyu liata a rie pâ ei ta.

⁹ Abeipa vâlyuhchâpa cha ama hnohta a vaw luah ta, Abeipa rônahna ta ama chheipâh cha za khaih ta, chi ngaita ei ta.

¹⁰ Vâlyuhchâpa ta ama hnohta, “Chi khah u la, nathlie teh u, mo to châta thâtihpha lychhih ngaitapa ei cha vaw tlôkheipa ei.

¹¹ Tanoh he Dâvi khihpi liata nama châta Pachhatuhpa a pih haw, Beipa Krista cha!

¹² He he nama châta ngiana a châ aw: Pohpahlyna ta pahlypa ta, sachâki liata â ziapa hawsaih nama hmô aw,” tah ta.

¹³ Sôkha ta vâlyuhchâpa hnohta vâmo hluhpi a vaw luah ei ta, Khazohpa reithai ei ta,

¹⁴ “Khazoh Chônôchaipa hnohta rônahna y sala, Lei chô liata â lypa chyhsazy hnohta thlalôhna y mawh sy!” tah ei ta.

¹⁵ Vâlyuhchâpazy ta vârâh lâ ama siesaipata nahta, mietaku vaituhpazy ta, “Tahmâ he Bethlehe lâ thlai sie sih la, Abeipa ta miah a chhopa, hmo a vaw tlôpa cha kei moh suh u,” a tah ei ta.

¹⁶ A para kawpa ta sie ei ta, Mâri nata Zawsi nata sachâki liata hawsaih paziapa cha kei hmô ei ta.

¹⁷ Hawsaih ama hmô nahta, ama hnohta hawsaih thâtih ama chhopa kha reih ei ta.

¹⁸ A theipazy ta mietaku vaituhpazy bie reipa cha noâh tah kaw ei ta.

¹⁹ Mâri deikua cha, cha hmo zydua cha a palôh liata pachâ ta, a vao thlâh ha ta.

²⁰ Mietaku vaituhpazy cha, ama hnohta chhopa hawh tlai ta thei ei ta ama hmôpa vâta, Khazohpa reithaina chôta kua ha ei ta.

Zisu moh bina

²¹ Noh charie vaw tloh ta, hawsaih cha chopawtaipa a châ khai nahta, a moh Zisu bi ei ta. Cha moh cha chhi liata nawh â choh hlâta, vâlyuhchâpa ta moh a vaw bi chhielie hapa kha a châ.

Hawsaih Zisu hlâna

²² Mawsi ryhpa hawhta amâ pathaisana noh a vaw tlô nahta, hawsaih Zisu cha Abeipa lâ hlâ awpa ta Zerusale lâ siekhei ei ta.

²³ He he Abeipa ryhpa bie liata, “Chapaw saw chhi a pahy tuapa maih cha, Abeipa châta pathaihpa bipa a châ aw,” tahpa ta ropa hawhta tao ei ta,

²⁴ Abeipa ryhpa bie ta, atheihna hlâna châta “Vachhuh bao kha tlyma, pivaw taw pô no tlyma,” hlâ awpa a tahpa hawhta ama taopa a châ.

²⁵ Cha daihti liata, chyhsa pakha, a moh Simeôna ama tahpa Zerusale liata y ta. Ano cha chyhsa siapa nata Khazohpa a chipa châ ta, Izarei thlapalôh nawpa daihti a hâpa, Thlahpa Pathaihpa a hneipa chyhsa a châ.

²⁶ Abeipa bietaipa Krista a hmô hlâta cha thina a hmô lei awpa kyh Thlahpa Pathaihpa ta vaw pahnosa ha ta.

²⁷ Thlahpa pahnosapa ta Achhyna o lâ vawh ta, hawsaih Zisu cha a nôpawzy ta ryhpa bie hawhta tao awpa ta, Achhyna o liata amâ kei ngiakhei nahta,

²⁸ Simeôna ta Zisu cha a bâh ta a pyh ta,

²⁹ “Hy Abeipa, na bie hawhta, Châ chakaotuhpa he Thlahlôhpa ta pasiesa bâ mah y.

³⁰ Na pachhana ei mo ta hmô ha ta,

³¹ Phopi to mohmô ta na pachhuahpanohpa cha ei hmô haw.

³² Zenitaizy hnohta aluahna châta khaihna châ aw ta, Na phopi Izarei rônahna a châ aw,” tahpa ta Khazohpa reithai ta.

³³ Hawsaih thâtih a reipa cha, a nô nata a paw ta noâh tah kaw ei ta.

³⁴ Simeôna ta âmo cha byhnâ awpa ta, a nô Mâri hnohta, “Pachâ teh, he hawti he Izarei hry liata chyhsa hluhpi paona nata thyuna châta raopa a châ. Ano cha ngiana châ aw ta, chyhsa hluhpi ta ama reipachhie aw.

³⁵ Zaozi ta na palôh chhôpahlie aw ta, chyhsa hluhpi palôh liata pachânazy palâhâhpa a châ aw,” tah ta.

³⁶ Cha liata hrohsonô pakha, Anâ ama tahpa y ta, ano cha Asera chi Phanua sawchanô a châ. Anâ cha nôpi kaw bâ ta, dyh a châ tawhta a vahpa hnohta kô sari dei pahrâ hmâ ta,

³⁷ nôhmei châpa ta kô sycharie nata kô palih chhôh a ypa a châ. Achhyna o puasai leipa ta, chhô nah zâ ta kâhvileipa ta thlahchhâpa ta Khazohpa â chhy tyh.

³⁸ Cha daihti lia tlai ta, Anâ cha a vy ta, Khazohpa lâ alyna bie reih ta, Zerusale chatlaina a hâtuhpa zydua hnohta Zisu thâtih cha chho ta.

Nâzari lâ amâ lie

³⁹ Abeipa ryhpa bie hawhta hmo to zydua ama tao khai tawhta, Kâlili râh liata ama khih Nâzari lâ a lie ei ta.

⁴⁰ Hawsaih cha laiseih lymâ ta, a tha vaw tlô ta, sona ta bie ta, Khazohpa ngiachhiena ano liata y lymâ ta.

Hawti Zisu Achhyna o a ngai

⁴¹ Kô chareih ta Zawpakhô kyhchhi daihti ta Zisu nô nata paw cha Zerusale lâta khy tyh ei ta.

⁴² Zisu cha kô hrawh hleino a châ nahta, ama tao tyhpa hawhta Zerusale lâ khy heih ei ta.

⁴³ Kyhchhi a pai nahta, a lie ei ta, hawtipa Zisu cha Zerusale liata y patlua ha ta. A nôpawzy ta pahno leipa ei ta.

⁴⁴ Noh kha lâsie sie ha ei ta, zawpi hry liata â hlao hra awpa hawhta pachâpa ta, ama heinawhzy nata ama hmia pahnopazy hry liata tlua ei ta.

⁴⁵ Ama hmô leipa vâta, tlua lymâpa ta Zerusale lâ a lie ei ta.

⁴⁶ Noh thôh ama tlua khai tawhta, Achhyna o liata hmô ei ta, pachutuhpazy hry liata a tyuh ta, ama biezy nathliepa ta, âmo lâta hiahrinazy a vaw tao ngâpa hmô ei ta.

⁴⁷ A bie reipa a theipa maihta, a novâhzie nata â chhynazy vâta ama noâh kaw ta.

⁴⁸ A nôpawzy ta ama hmô nahta, ama noâh ngaita ta, a nô ta a hnohta, “Ei sawchapawpa, khazia he hawhta miah na tao? Na paw nata thlazoh ngaitapa ta thata eima cha tlua,” tah ta.

⁴⁹ Zisu ta ama hnohta, “Khazia eina tlua ei chi? Ei Paw o liata ei y awpa a châ tahpa pahno veih ei chi ma?” tah ta.

⁵⁰ Ama hnohta a biereipa cha a pachâna pahno leipa ei ta.

⁵¹ A nôpawzy hnohta zu ta, Nâzari khih cha tlô ta, a nôpawzy bie zyhpa ta y ta. A nô ta hmo zydua cha a palôh ta a vao thlâh ha ta.

⁵² Zisu cha laiseih ta, so via rili ta, Khazohpa nata chyhsapa modypa ta y ta.