LUKA 16 - Mara Bible RV (BSI)

Mohôhtuhpa ngâchhih leipa pakhona bie

¹ Zisu ta a pachupazy hnohta, he bie chhao he reih ta, “Chyhsa hneirôhpa pakha ta sôh mohôhtuhpa hnei ta, cha chyhsa chata a sôh a pahryuh thlâhthlipa kyh chyhsazy ta ano lâ vaw leih ei ta.

² Sôh mohôhtuhpa cha aw ta, a hnohta, ‘Na thâtih ei theipa he khâpa ma a yzie? Sôh na mohôhna rona châbu vaw pangia teh. Sôh mohôhtuhpa châ thei khao aw va chi,’ tah ta.

³ Sôh mohôhtuhpa cha a palôh liata, ‘Ei zibeipa ta sôh mohôhna rai ei hriapa na pabâ â chhuah haw. Kheihta ma ei tao aw? Lei palie thei tlôh na va, kudao awpa hra ei noza tlôh.

⁴ Sôh mohôhna tawhta pabâhpa ei châ tita, chyhsazy ta ama o liata eina paysa thei nawpa ei ta a taozie awpa ei pahno haw,’ tah ta.

⁵ Chatanachata a zibeipa sôh a bâhpazy pakha pakha ta aw ta, a hmiatuapa hnohta, ‘Ei zibeipa liata khazie nâ bâh?’ tah ta.

⁶ Ano ta, ‘Sathaw ôh za kha,’ tah ta. Sôh mohôhtuhpa ta a hnohta, ‘Na châbu la la, a tyuh para la, sypangawh roh teh,’ tah ta.

⁷ Ahropa hnohta, ‘Nâma zaw khazie nâ bâh?’ tah ta. Ano ta, ‘Sâh saikhua za kha,’ tah ta. Ano ta a hnohta, ‘Na châbu la la, sycharie roh teh,’ tah ta.

⁸ A zibeipa ta sôh mohôhtuhpa adoleipa cha ryhraona a pahno thaipa liata tlao reithai ha ta. Khizaw sawzy he âmo chhâ hmo kyh liata la, khaihpa sawzy hlâta ama vaw so via.

⁹ Ei cha chho ei, khizaw sôh ta viasa a tao teh u. Chatanachata sôh a chhâ tita chhâzaw pahrâna suzy liata ama cha paysa aw.

¹⁰ “A chyhta chô liata ngâchhihpa cha, a hluhpi chô liata chhao ngâ â chhih tyh. A chyhta chô liata ngâchhih leipa cha, a hluhpi chô liata ngâchhih hra aw vei.

¹¹ Khizaw sôh chô liata hmah ngâ namâ chhih vei khiahta cha, ahy ma sôh hmeiseihpa châ pavaosa ngâh aw ei?

¹² Chyhsa hropa eih chô liata hmah ngâ namâ chhih vei khiahta cha, ahy ma nâmo eih awpa châ pie aw ei?

¹³ Chakaotuhpa ahy hmah hyutuhpa pano chakao pabaoh thei vei. Pakha a haopa ta pakha khoh aw ta, pakha a châhkheipa ta pakha a mohnao aw. Khazohpa nata sôh chakao pabaoh thei veih ei chi,” tah ta.

Ryhpa nata Khazohpa Khinarâh

¹⁴ Cha biezy cha tâkâ a tlaichhai kawpa Phârisaihzy ta ama thei nahta, pahneisao ei ta.

¹⁵ Zisu ta ama hnohta, “Chyhsa mohmô liata a do kawpa hawhta a lâpa deita nama châ. Khazohpa deikua cha nama palôh a pahno. Chyhsa hry liata palyupalihna cha Khazohpa mohmô ta pasichhihpa a châ.

¹⁶ “Ryhpa nata hrohsopazy bie cha Zawhâna daihti taihta y ta. Cha rakha tawhta cha Khazohpa khinarâh thâtihpha chhopa châ ta, chyhsa to ta a ngia a chhuahpa ta ama chatôh lymâ.

¹⁷ Châhrasala ryhpa bie miakhata chhao a lei awpa hlâta, alei nata avâ leidia awpa a nao via.

Nôvah achhaihna kyh

¹⁸ “Ahy rai a lapinô ma ta, lapinô hropa a hneipa cha â pheipa a châ. A vahpa nata a chhaihpa chanô a hneipa chhao â pheipa a châ hra.

Hneirôhpa nata Lâzarâh

¹⁹ “Chyhsa hneirôhpa pakha y ta. Chysia saihlawpa nata rih dipa ta a tobipa ta, noh chareih phasa ngaitapa ta y tyh ta.

²⁰ A kaohrai thaby liata sipasapa pakha, a moh Lâzarâh ama tahpa, a pôhpa duata hmah ta a biepa a zia tyh ta.

²¹ Chyhsa hneirôhpa tlâhkhai tawhta a tlaopazy nie awpa a khohpa vâta, cha liata â zia tyhpa a châ. Izy a vy ei ta, a hmahzy ama paliepa tyh.

²² Sipasapa cha thi ta, vâlyuhchâpazy ta a chhi ei ta, Abarahâ kalachhôh tlôkhei ei ta. Chyhsa hneirôhpa chhao cha thi ta, pabupa châ ta.

²³ Athihkhih liata thata pasa tao ta, avâ kaw ua ta, lâhlapi liata Abarahâ kei hmô ta, Lâzarâh cha a kalachhôh liata vaw y thlâh ha ta.

²⁴ Hneirôhpa cha awh ta, ‘Ei paw Abarahâ y, na ngiachhie la, Lâzarâh kha a kudy pawhmao ti liata ny sala, ei paleih chakuasa awpa ta na vaw tuapa mah y. Meipaleih liana heta ei pasa ngaita,’ tah ta.

²⁵ Châhrasala Abarahâ ta, ‘Ei saw y, nâ cha na hro chhôh ta hmo phapa to chi ta, Lâzarâh deikua cha hmo chhiepa a topa kha pahno châh chi. Châhrasala tahmâ ano cha he liata thlahpalôhpa ta y ta, nâ cha pasa na tao kha zaw.

²⁶ Cha leipa chhao ta, he su tawhta nâmo lâ sie a chhuahpazy ta ama sie thei lei nawpa nata kha su tawhta keimo lâ ahy hmah amâ vy thei lei nawpa ta, keimo nata nâmo likawh liata leichiepa kawh ngaitapa taopa a châ haw,’ tah ta.

²⁷ Hneirôhpa ta, ‘Cha khiahta la, ei paw y, Lâzarâh kha ei paw o lâ chhâ na tuah awpa ta ei châ haw.

²⁸ Unawh papangawh hnei na ta, he su lâ amâ vy pathlei hra lei nawpa ta, zikyu a kei râ awpa ta tuah mah y,’ tah ta.

²⁹ Abarahâ ta, ‘Mawsi nata hrohsopazy ama hnei mâh tâh. Âmo bie nathlie mawh ei sy,’ tah ta.

³⁰ Hneirôhpa ta, ‘Châ vei, ei paw Abarahâ y, athihpa hry tawhtapa tlai ta âmo lâ a vaw khiahta cha, ama ro aw,’ tah ta.

³¹ Abarahâ ta a hnohta, ‘Mawsi nata hrohsopazy bie ama nathlie vei khiahta cha, athihpa hry tawhta a thyupa y hra sala, a bie zo hlei aw veih ei,’” tah ta.