LUKA 15 - Mara Bible RV (BSI)

Mietaku aleipa pakhona

¹ Chhiekheituhpazy nata moleipazy ta a bie thei awpa ta a kiapâh lâ vaw pangai ei ta.

² Phârisaihzy nata ryhpa pachutuhpazy ta, “He chyhsa heta moleipazy a pahlao ta, ama hnohta pati a nie tyh,” tahpa ta paphôh ei ta.

³ Chavâta he pakhona bie he ama hnohta reih ta:

⁴ “Nama hry liata ahy ma mietaku za kha hnei ta, pô kha pahlei ha sala, lyurâhpa liata sychaki nata pô chaki cha siesaipa ta, aleipa cha a hmô hlâlei tlua leipa ta y aw ei chi?

⁵ A hmô heih nahta, a ly ngaitapa ta a ngiatlâh liata a khaih aw.

⁶ O a tlô nahta, a viasazy nata a opazy awpakhy aw ta, ama hnohta, ‘Nâ lykhei teh u, ei mietaku a leipa kha ei hmô haw,’ a tah aw.

⁷ Ei cha chho ei, cha hawhna hra chata vârâh liata cha, ro awpa a hnei leipa chyhsa siapa sychaki nata pachaki chô liata alyna hlâta, molei ropa pakha chô liata alyna a hluh via aw.

Phusâ a leipa pakhona bie

⁸ “Cha leipa chhao ta, ahy chanô ma tâkâ tlaw hrawh hnei ta, tlaw kha pahlei ha sala, meiôh raopa ta o phi aw ta, a hmô hlâlei pakhâta ta tlua leipa ta a y aw?

⁹ A hmô nahta, a viasazy nata a opazy awpakhy aw ta, ‘Nâ lykhei teh u, tâkâ ei pahleipa kha ei hmô haw,’ a tah aw.

¹⁰ Ei cha chho ei, cha hawhna hra chata, Khazohpa vâlyuhchâpazy hmiakô liata cha, molei ropa pakha chô liata alyna a y tyh?” tah ta.

Sawchapaw aleipa pakhona bie

¹¹ Zisu ta reih lymâ ta, “Chyhsa pakha cha sawchapaw pano hnei ta.

¹² A seihnai viapa ta a paw hnohta, ‘Ei pâ, ryu ei to awpa na pie bâ teh,’ tah ta. Chatanachata ama paw ta a sôh cha a sawchapaw panozy pachhaih ta.

¹³ Bohpi leipa liata, a sawchapaw seihnaipa cha a tovyuh zydua pakhy ta, râh hlapi lâ sie ta. Cha liata phasa ngaitapa ta y ta, a sôh cha pahryuh thlâhthli ta.

¹⁴ A hneipa zydua a hmâ khai nahta, cha râh liata chakâh mozoh vaw tlô ta, nie awpa a phahla ha ta.

¹⁵ Chatanachata sie ta, cha râh chyhsa pakha hnohta hria hlao ta. Cha chyhsa chata vaolao pie awpa ta a lyu lâ tuah ta.

¹⁶ Nie awpa a piepa ama y leipa vâta a nodi ngaita ta, vaolao nie khohna taihta parôpachaw ta.

¹⁷ Â vaw pahno pasia nahta, ‘Ei paw o liata hria hlaopa hluhpi y ei ta, nie tiah lei ama hnei thlâh bao na ta, kei deikua cha nodipa ta he liata ei thi aw hih!

¹⁸ Thyu aw na ta, ei paw o lâ sie aw na ta, a hnohta, “Ei pâ y, Khazohpa chô liata nata nâma hmiakô liata hmo ei parao haw.

¹⁹ Na sawchapawpa ta bi tlâh chhao châ khao va na. Na hnohta hria hlaopa pakha hawhta rie na tao hra mah y,” ei tah aw,’ tah ta.

²⁰ Chatanachata thyu ta, a paw lâ sie ta. Lâhlapi ta a y nota a paw ta vaw hmô ta, ngiachhie ngaita ta, a kei râ ta, a sawchapawpa cha a pyhpahly ta, a pahnâ ta.

²¹ A sawchapawpa ta a paw hnohta, ‘Ei pâ y, Khazohpa chô liata nata na hmiakô liata hmo ei parao haw. Na sawchapawpa ta bi tlâh chhao châ khao va na. Na hnohta hria hlaopa pakha hawhta rie na tao hra mah y,’ tah ta.

²² Châhrasala a paw ta a chakaotuhpazy hnohta, ‘Poh pha chaipa kha vaw cheih para u la, vaw pabu teh u. A ku liata kusadi paky u la, a phei liata pheiky paky teh u.

²³ Viahchao taw thawhpa kha kei la u la, thie teh u. Thapha ngaitapa ta nie suh u.

²⁴ He ei sawchapawpa he thi ha ta, a vaw hroh ha heih hih. Lei ha ta, eima hmô ha heih hih,’ tah ta. Chatanachata a lypa ta kyhchhi cha tao ei ta.

²⁵ “A sawchapaw uhtheipa cha lyu tawhta o lâ vaw sie ta. O a vaw tlô chy ta pyungiapa tôpa pyu nata lâpa pyu thei ta.

²⁶ Chakaotuhpa pakha aw ta, ‘Cha cha khâpa pyu maw?’ tah ta.

²⁷ Chakaotuhpa ta, ‘Na nawhta vaw tlô ta, a tlâhpa nata â bohpa ta a hmô heihpa vâta, na paw ta viahchao taw thawhpa a thie,’ tah ta.

²⁸ Sawchapaw uhtheipa cha a hiehâh ngaita ta, a ngia khoh leipa ta. A paw vaw pua ta, reipasao ta,

²⁹ châhrasala a paw cha a chhy ta, ‘Pachâ tua, chatikôsy cha chakao na ta, na rei a ngiah leipa ta y beih va na. Chatanachôta ei viasazy nata alyna ei tao nawpa ta mietaw pô kha dâhdei chhao na pie beih va chi.

³⁰ Châhrasala he na sawchapawpa, âzuahnôzy liata na sôh a hmâh khai hapa hmâchhâh he a vaw tlôpa nahta, viahchao taw thawhpa zua na thiepa bao!’ tah ta.

³¹ A paw ta a hnohta, ‘Ei sawchapawpa y, nâ cha ei hnohta a y kôzawpa châ chi ta, ei hneipa zydua he nâma eih mah a châ tâh.

³² Kyhchhi tao ta thapha ngaitapa ta y awpa cha â phuhpa rai a châ. He na nawhta he cha thi ha ta, a vaw hroh ha heih hih. Lei ha ta, eima hmô ha heih hih,’ a tah aw,” tah ta.