LUKA 14 - Mara Bible RV (BSI)

Pahânoh ta athlohpa a patlâh

¹ Pahânoh ta Phârisaihzy hyutuhpa pakha o liata pati nie awpa ta vawh ta, zawpizy ta Zisu cha moh pathli ei ta.

² A hmiakô liata athlohpa pakha y ta.

³ Zisu ta dâhthaipazy nata Phârisaihzy cha a chhy ta, ama hnohta, “Pahânoh ta patlâhpa he ryhpa ta a pasaih ma, pasaih vei maw?” tah ta.

⁴ Châhrasala âmo cha a thlih thlâh ha ei ta. Zisu ta a thlohpa cha patu ta, a patlâh khai tawhta, pasiesa ha ta.

⁵ Ama hnohta, “Nama hry liata chyhsa pakha ta sawchapaw tlyma, viahchao tlyma hnei sala, Pahânoh ta tikhaoh liata tla sala, thlai ta a thaoh lei awpa ahy a y aw ei chi?” tah ta.

⁶ Cha biezy chhao cha a chhy thei veih ei.

Ahneina kyhchhi pakhona bie

⁷ Patinie hruapazy ta chyhsa peimawhpazy atyuna amâ chhupa a hmô nahta, ama hnohta pakhona bie reih heih ta.

⁸ “Kialao nie awpa ta chyhsa ta a cha hrua tita, chyhsa peimawhpazy atyuna liata a tyuh khah y. Nâma hlâta chyhsa peimawh viapa a hruapa y thei aw ta,

⁹ nama pano ta châ hruatuhpa cha a vy aw ta na hnohta, ‘Nâ tyuna kha he chyhsa he tlei teh,’ cha tah aw ta, nâ cha noza ngaitapa ta atyuna a hnai chaipa liata a tyuh awpa na châ pathlei aw.

¹⁰ Hruapa na châ tita, vawh la atyuna a hnai chaipa liata a tyuh mah y. Chatanachata châ hruatuhpa â vy tita, na hnohta, ‘Viasa, â sâh viapa lâ a pasie teh,’ cha tah aw ta, pati tlâhkhai na dôhlâhpa zydua mohmô ta palyupalihpa ta na y aw.

¹¹ A pasâhsapa maih panawhpa châ aw ei ta, a panawhpa maih palyupalihpa ama châ aw,” tah ta.

Kyhchhi rônahpa pakhona bie

¹² Chatawhcha Zisu ta patinie a hruatuhpa hnohta, “Zâpati tlyma, kyhchhi rônahpa tlyma na tao tita, na viasazy, na unawhzy, na chieheihzy, na vaih hneirôhpazy hrua khah y. Chataleipatala cha hrua hri aw ei ta, thôpa ta na y pathlei aw.

¹³ Kyh na chhi tita, dyhchhiepazy, pihpasipazy, pheisypazy, mochaopazy tlao hrua mah y.

¹⁴ Âmo cha châ thô thei awpa ama châ leipa vâta, byhnâ to aw chi ta, chyhsa dopazy thyuheihna liata thôpa na châ aw,” tah ta.

¹⁵ Tlâhkhai liata pati a dôhlâhpa pakha ta cha biezy cha a thei nahta, a hnohta, “Khazohpa khinarâh liata pati a nie awpa cha a nohlao kaw dia!” tah ta.

¹⁶ Zisu ta a hnohta, “Ei kha cha chyhsa pakha ta kyhchhi rônahpa tao ta, chyhsa hluhpi hrua ta.

¹⁷ Nie daihti a châ nahta, a hruapazy hnohta, ‘A vy teh u, tahmâ ato â mâ haw,’ tah awpa ta a chakaotuhpa tuah ta.

¹⁸ Châhrasala ama zydua ta reihkha tlapa ta reina hnei khai ha ei ta. A hmiatua chaipa ta a hnohta, ‘Lyu chalei na ta, mo awpa ta ei sie awpa a byuh. Ngiachhiepa ta na pachâ thai mah y,’ tah ta.

¹⁹ Ahropa ta, ‘Viahchao tôhpa bao pangawh chalei na ta, mopasia awpa ta sie a chhuah na ta, ngiachhiepa ta na pachâ thai mah y,’ tah ta.

²⁰ Ahropa chhao ta, ‘Lapinô pakia na ta, chavâta a vy thei aw va na,’ tah ta.

²¹ Chakaotuhpa cha a vy ta, cha biezy cha a zibeipa chho ta. O hneituhpa cha a pathi ia kaw ta, a chakaotuhpa hnohta, ‘A chatliepa ta pua la, khihpi lâlai nata lâpizy lâ vawh la, dyhchhiepazy, pihpasipazy, mochaopazy, pheisypazy a vaw chhi teh,’ tah ta.

²² Chakaotuhpa ta, ‘Ei zibeipa, na biepiepa hawhta tao hapa châ ta, châhrasala su a rua thlâh ha chy,’ tah ta.

²³ Zibeipa ta chakaotuhpa hnohta, ‘Pua la, lâlai nata khih chaki lâ zy vawh la, ei o biena taihta chyhsazy a vaw ngia awpa ta kei reipasao lylia teh.

²⁴ Ei cha chho ei, chyhsa ei hruapazy kha, pakha hmahta ei kyhchhi pati nie aw veih ei,’” tah ta.

Pachupa châna ty

²⁵ Ei kha cha Zisu hnohta zawpi hluhpi sie ei ta, âmo lâ a heih ta, ama hnohta,

²⁶ “Ahy rai ei hnohta a vy khohpa cha, a paw, a nô, a lapinô, a sawzy, a unawhzy, a sietanôzy nata ano hrona tlai chhao â hao vei khiahta cha, ei pachupa châ thei aw vei.

²⁷ Ahy rai a kraws a piapa ta nâ zi leipa cha, ei pachupa châ thei aw vei.

²⁸ Nama hry liata ahy ma o sâhpa sa a chhuah sala, a tyuh ta, o sana mâ a laichadaipa ta, o paloh nawpa sôh a hnei nata hnei lei a pasia ha tua lei awpa a y ei chi?

²⁹ Chataleipatala, â bôna tao khai ha tlôhpa ta, a paloh thei leipa khiahta cha, a hmôpa maihta pasipasawh aw ei ta,

³⁰ ‘He chyhsa heta o sa ta, châhrasala paloh thei vei,’ ama tah pathlei aw.

³¹ Cha leipa chhao ta, ahy bei ma, bei hropa a dyuh awpa ta sie a chhuah sala, a tyuh aw ta, pheisaih thy no ta a vaw siehnaopa cha, pheisaih thy kha ta â tyh ngâh aw ma tahpa pachâ ha tua leipa ta a sie aw?

³² Â dyuh thei lei awpa khiahta cha, bei hropa cha lâhlapi liata a y nota, adyhna bietai hia awpa ta lyuhchâpa a tuah ha aw.

³³ Cha hawhna hra chata nama hry liata chhao, a hneipa zydua a siesai leipa cha ei pachupa châ thei aw vei.

Alôh padâhpa

³⁴ “Alôh cha a pha na, châhrasala alôh cha a padâh ha khiahta cha, kheihta a iah heih thei aw?

³⁵ Alei châta phahnai leipa aw ta, lei phapa tao nawpa ta sahroh ie liata pahlao tlâh chhao châ aw vei. Thy awpa deita a châ aw. Thei nawpa nakhaoh a hneipa ta thei mawh sy,” tah ta.