LUKA 13 - Mara Bible RV (BSI)

Na ro aw ma, na leidia aw?

¹ Cha daihti liata, chyhsa thokha a vy ei ta, Zisu hnohta Kâlili mo thâtih vaw chho ei ta. Kâlili mo cha atheihna ama hlâ hai nota Pilâ ta thie ei ta, ama thisaih cha atheihna sazy nata a pahlao hapazy ama châ tah ei ta.

² Zisu ta âmo cha a chhy ta, “Cha Kâlili mo cha, cha hawhta pasa ama taopa vâta, Kâlili mohropa zydua hlâta molei via pachaipa ama châpa ta ma nama pangiasa?

³ Châ bao va, ei cha chho ei, nâmo chhao nama ro vei khiahta cha, cha hawhta nama leidia khai aw.

⁴ Silôam o sâhpa ta a visaopa chyhsa pahrawh hleicharie chhao kha, Zerusale khih liata a ypa zydua hlâta hmo parao via pachaipa ama châpa ta nama pangiasa ma?

⁵ Châ bao va, ei cha chho ei, nâmo chhao nama ro vei khiahta cha, cha hawhta nama leidia khai aw,” tah ta.

Theiku pathei leipa pakhona bie

⁶ Zisu ta he pakhona bie he reih ta: “Chyhsa pakha cha a kre sadô liata theiku kô kha loh ta. A kô liata a thei kei tlua tyh ta, châhrasala thei kha hmahta hmô leipa ta.

⁷ Kre zôh mohôhtuhpa hnohta, ‘Moh tua, kô thôh chhôh tlai, he theiku kô liana he a thei tluapa ta a vy tyh na ta, thei kha hmah hmô beih va na. Thlu ha mah y. Alei a pahrâ pahraoh thlâhthlipa dei a châ’ tah ta.

⁸ Kre sadô mohôhtuhpa ta, ‘Pâpuh, atakô chhâ he cha y chy sala, a thaby liata chao aw na ta, sahroh ie ta ei vaohei chy aw.

⁹ Chatanachata hâhkô a pathei khiahta cha, a phapa châ sala, a pathei vei khiahta deikua cha, thlu thlâh ha lah vâ chi,’ tahpa ta â chhy,” tah ta.

Chanô zôh akopa a patlâh

¹⁰ Zisu cha Pahânoh ta pakhyna o miakha liata pachu ta.

¹¹ Cha liata chanô pakha, kô hrawh hleicharie chhôh zôh akona thlahpa ta a patupa y ta. A zôh a kopa ta a bôh thlâh ha tyh ta, a patlâpa ta a duah thei leipa a châ.

¹² Zisu ta ano cha a hmô nahta, aw ta, a hnohta, “Chanô, na pasana ta a cha pathlie haw,” tah ta.

¹³ A chô liata a ku pahnieh ta, chanô cha â patlâpa ta thlai a vaw duah ta, Khazohpa cha reithai ha ta.

¹⁴ Zisu ta Pahânoh ta chyhsa a patlâhpa vâta, pakhyna o hyutuhpa cha a hiehâh kaw ta, zawpi hnohta, “Chyhsapa raihria nawpa ta noh charu y ta, cha chhôh chata a vy u la, patlâhpa ta y teh u. Pahânoh ta la tao awpa châ vei,” tah ta.

¹⁵ Abeipa ta ano cha a chhy ta, “Nâmo, phapakheipazy saih u, Pahânoh ta nama viahchao tlyma, alâ tlyma, a o tawhta pathlâpa ta, ti padosa awpa ta a chhi tyh veih ei chi ma?

¹⁶ He chanô, Abarahâ sawchanô, Sâtâ ta kô hrawh hleicharie a chahry hapa he, Pahânoh chhao rai châ sala, pathlâ awpa cha tao hialia awpa châ vei ma?” tah ta.

¹⁷ Cha biezy cha a rei nahta, a khakhaipa zydua cha nozapa ta y ei ta. Zawpi deikua cha hmo rônahpa a taopa zydua vâta a ly ngaita ei ta.

Âhrâ chi pakhona

¹⁸ Chatawhcha Zisu ta, “Khazohpa khinarâh cha khâpa ma a lyu? Khâpa nata ma ei pakho aw?

¹⁹ Khazohpa khinarâh cha, chyhsa ta âhrâ chi hmô kha la ta, a sadô liata a pariepa hawhta a châ. Chi cha kaw pyuh ta, thokô vaw châ ta, vâ pavawzy ta a chiahzy liata bu ama tu tyh,” tah ta.

Thinô pakhona bie

²⁰ Zisu ta reih heih ta, “Khazohpa khinarâh cha khâpa nata ma ei pakho aw?

²¹ Khazohpa khinarâh cha, chanô ta thinô la ta, viahdie saikhua miathôh liata pabu ta, a zydua ta a thyu khaina taihta a pabupa hawhta a châ,” tah ta.

Ochhi buahpa

²² Zisu cha Zerusale pangaipa ta sie ta, lâpi liata khihpi nata khitawzy chahryhpa ta pachu lymâ ta.

²³ Chyhsa pakha ta a hnohta, “Abeipa, pachhapazy cha ama chyhta aw ma?” tah ta. Zisu ta a hnohta,

²⁴ “Chhikao buahpa liata a ngia a chhuah lylia teh u. Ei cha chho ei, chyhsa hluhpi ta a ngia a chhuah aw ei ta, a ngia thei aw veih ei.

²⁵ O hneituhpa thyu ta ochhi a khaw ha khiahta cha, nâmo ta khôtho liata a duahpa ta, ‘Abeipa, ochhi miah pahypa teh,’ tahpa ta ochhi chakhyh hra u la, ‘Khataih tawhta a vypa ma nama châ, cha pahno veih ei na,’ tahpa ta a châ chhy aw ei.

²⁶ Nâmo ta, ‘Na hmiakô liata niepa ta doh tyh pi ta, eima tlyliahzy liata miah na pachu tyhpa kha,’ nama tah aw.

²⁷ Châhrasala ano ta, ‘Ei cha chho ei, khataih tawhta a vypa ma nama châ, cha pahno veih ei na. Nâmo, hmo moleipa a taopa zydua saih u, kei tawhta sie syulyu ha teh u!’ a tah aw.

²⁸ Khazohpa khinarâh liata Abarahâ, Aisika, Zakaw nata hrohsopa zydua nama hmô tita, nâmo cha khôtho lâ thypa châ aw ei chi ta, cha liata chana nata hâh chariehna a y aw.

²⁹ Nochhi nata notla, maw nata chho tawhta chyhsa a vy aw ei ta, Khazohpa khinarâh kyhchhi tlâhkhai ama vaw dôh aw.

³⁰ Pachâ teh u, hnôh chaipazy cha hmia chaipa châ aw ei ta, hmia chaipazy chhao hnôh chaipa ta a y awpazy ama y,” tah ta.

Zerusale châta pachârôhna

³¹ Cha dawh lia tlai chata Phârisaih thokha a vy ei ta, a hnohta, “Pua la, he tawhtapa he sie syulyu ha teh, Herawda ta thie a châ chhuah,” tah ei ta.

³² Zisu ta ama hnohta, “Cha changie hnohna chata hetana heta kei chho teh u, ‘Tanoh nata mylâ ahripazy papuapa ta patlâhna raizy hria aw na ta, a noh thôhna noh ta ei rai ei patlô aw.

³³ Chatahrasala, tanoh chhao, mylâ chhao, hânoh chhao ei sie lymâ aw, hrohsopa cha Zerusale khihpi lia dei leipa ta cha, khôtho lâ thie theipa châ vei.’

³⁴ Hy Zerusale, Hy Zerusale, hrohsopazy thie chi ta, nâ lâta tuapazy alô ta a vawhsaotuhpa khihpi! Awhpanô ta a tachhihzy a mathlaw ry liata a pahmaohpa hawhta, na sawzy pahmaoh a chhuah tyh na ta, châhrasala khoh va chi!

³⁵ Moh tua u, nama o cha aruapa ta siesaipa a châ ha hih. Ei cha chho ei, ‘Abeipa moh ta a vypa cha reithaipa ta y mawh sy!’ nama tah hlâlei cha na hmô khao aw veih ei chi,” tah ta.