LUKA 12 - Mara Bible RV (BSI)

Phârisaihzy thinô

¹ Cha nona chata, amâ tlypâ ngâna taihta zawpi sâh hluhpi a vaw hmaohpakhy ei ta, Zisu cha a pachupazy hnohta bie reih tua chai ta, “Phârisaihzy thinô liata a vaih teh u, cha cha phapakheina a châ.

² A lâ lei awpa ta khupa khâpa hmah y leipa ta, pahno lei awpa ta nyupa khâpa hmah y vei.

³ Chavâta zohna liata nama reipa zydua cha khaihpa liata theipa châ aw ta; chhôhpadâhpa chhôh chaipa liata bieparu nama reipa zydua chhao, vâphuh tawhta phuahpa a châ aw.

Chi awpa dopa

⁴ “Ei viasa saih u, ei cha chho ei, pôhpa thie ta, cha hnôhlâ ta khâpa hmah a tao thei khao leipazy chi khuh vy.

⁵ Nama chi awpa dopa zikyu ei châ râ aw ei: A thie khai tawh chhao ta, hriena su liata thy theina bie a hneipa cha chi teh u. Ei cha chho ei, ano tlai cha chi teh u!

⁶ Rieta pô pangawh cha phusâ dipa miano ta zuapa châ vei ma? Châhrasala ama hry liata pô kha hmah Khazohpa hmiakô liata mypa châ vei.

⁷ Nama luh liata sâ zydua chhao rei khaipa a châ. Chavâta chi khuh vy, boby hluhpi hlâta nama sôh via mâh tâh.

Chyhsa hmiakô liata Krista palâhâhna

⁸ “Ei cha chho ei, chyhsa hmiakô liata nâ châhkheipa maih cha, Chyhsa Sawchapawpa ta Khazohpa vâlyuhchâpazy hmiakô liata â châhkhei hra aw.

⁹ Chyhsa hmiakô liata nâ paphapa deikua cha, Khazohpa vâlyuhchâpazy hmiakô liata ei papha hra aw.

¹⁰ Chyhsa Sawchapawpa a reipachhiepa cha a ngiahthaipa châ aw ta, Thlahpa Pathaihpa a reipachhiepa deikua cha, a ngiahthaipa châ aw vei.

¹¹ Pakhyna ozy liata nata ryureituhpa nata biehneituhpazy hmiakô liata ama châ chhi tita, kheihta ma eimâ chhy aw, khâpa bie ma eima rei aw tahpa ta nama thlazoh khah sy.

¹² Nama rei awpa cha Thlahpa Pathaihpa ta a daihtita liata a cha pachu lymâ aw ei,” tah ta.

Hneirôhpa ahrupa pakhona bie

¹³ Zawpi hry liata chyhsa pakha ta Zisu hnohta, “Pachutuhpa, ryu na pachhaih awpa ta ei unawhpa na chhopa teh,” tah ta.

¹⁴ Châhrasala Zisu ta a hnohta, “Chyhsa, kei he ahy ma nâmo chô liata ryureituhpa nata ryu pachhaihtuhpa ta nâ tao?” tah ta.

¹⁵ Ama hnohta, “A chado u la, uahvana kheihawhpa lia rai ta a vaih teh u. Sôh hluhpi hneipa he chyhsapa hrona chhâpa châ vei,” tah ta.

¹⁶ Ama hnohta pakhona bie reih ta, “Chyhsa hneirôhpa lyu ta kôvei thata papua ta.

¹⁷ Hneirôhpa cha pachâ ta, ‘Kheihta ma ei tao aw tly, ei sâh nata ei bia so nawpa hnei tlôh lei khâh na ta?’ tah ta.

¹⁸ ‘Hetana heta ei tao aw: Ei sawvâzy phie aw na ta, a lai viapa ta sa aw na ta, cha liata ei sâh nata ei hneipa zydua soh aw na ta.

¹⁹ Chatawhcha ei thlahpa hnohta, “Thlahpa y, kô hluhpi chhôh châta hmo hluhpi nâ pachô haw. A pahâ la, nie la, doh la, thaphapa ta y mah y,” ei tah aw,’ tah ta.

²⁰ Châhrasala Khazohpa ta a hnohta, ‘Ahrupa! Tazâ he na thlahpa lapa châ aw ta, na hmo hneipazy kha ahyzy ma a to aw ei?’ tah ta.

²¹ Ano châta sôh pachô ta, Khazohpa lâta hneirôh tlôh leipa cha, cha chyhsa hawhta a châ aw,” tah ta.

Khizaw hmozy vâta pachârôh lei awpa

²² Chatawhcha Zisu ta a pachupazy hnohta, “Ei cha chho ei, khâpa ma eima nie aw, tahpa ta nama hrona châta pachâ chhie leipa u la, khâpa ma eimâ bu eimâ sai aw, tahpa ta nama pôhpa châta pachâ chhie hra khah u.

²³ Hrona he niedo kyh dei châ leipa ta, pôhpa he a bu a sai kyh dei châ vei.

²⁴ Raawhzy he pachâ tua u. Sâh tu leipa ei ta, hria hra veih ei. Pâh pho leipa ei ta, sawvâzy sa hra veih ei. Châhrasala Khazohpa ta a pasa thlâh ha ei. Nâmo cha pavawzy hlâta nama sôh via syulyu mâh tâh.

²⁵ Nama hry liata ahy ma pachârôhpa vâta a doh dy kha a paseihsa via thei?

²⁶ Cha hawhpa hmo chyhpata hmah a tao thei leipazy ei chi ta, khazia hmo hropazy liata nama pachâ a rôh tly?

²⁷ Lilipawzy laiseihzie pachâ tua u. Raihria leipa ei ta, pala hria hra veih ei. Châhrasala ei cha chho ei, Sawlawmaw tlai chhao kha, a rônah thei chaipa hawhta â tobi no kha, lilipaw miakha tlu chhao heta tobipa ta y vei.

²⁸ Hy nâmo, ngiapâ chyhpa saih u, lyurâhpa sibiepa tanoh hroh ta, mylâ lômathu liata ti thlâh ha awpa hmahta Khazohpa ta cha tlatlu ta a tobi khiahta cha, nâmo chhochhi cha cha hlâta pha via syulyupa ta cha tobi aw veih ei ma!

²⁹ Chavâta nama nie awpa nata nama do awpa tlua leipa u la, nôpopa ta y khuh vy.

³⁰ Khizaw phopi to ta cha hmozy cha ama tlua tyh. Chazy cha namâ ngiah tahpa nama Paw ta a pahno.

³¹ A khinarâh tlao tlua u la, cha hmozy cha baichhapa nama châ aw.

Vârâh liata ryu

³² “Sahlao chyhpa saih u, chi khuh vy. Khinarâh a cha pie awpa ei cha nama Paw alynazie a châ.

³³ Nama hneipazy zuah u la, phahlapazy pie teh u. Parutuhpa ta a paru thei leina nata chhoma-u ta a parao thei leina vârâh liata tâkâ byh a chy beih leipa nata ryu a chhâ beih leipazy a pachô teh u.

³⁴ Nama ryu yna liata nama palôh chhao a y aw.

A mâ chiehpa ta y awpa

³⁵ “Chai a saihpa ta y thlâh ha u la, nama meiôh khâ ia mawh sy.

³⁶ Ama zibeipa cha Kialao kyhchhi tawhta a vaw di ta, ochhi a chakhyh tita thlai pahy thei awpa ta, a chakaotuhpazy ta ama hâ thlâh hapa hawhta, a mâ chiehpa ta y teh u.

³⁷ Ama zibeipa â vy tita, ano hâpa ta a vaw hra thlâh hapa chakaotuhpazy cha ama nohlao na! Hmeiseihta ta ei cha chho ei, ama zibeipa cha chakaona chysia a tobipa ta, chakaotuhpazy cha tlâhkhai liata pati padôhsa aw ta, a vy aw ta, âmo cha a chakao aw ei.

³⁸ Zâcho ta tlyma, awhkho ta tlyma, a vy sala, amâ hra thlâh hapa ta a hmôpa chakaotuhpazy cha ama nohlao ngaita aw dia!

³⁹ He he pahno teh u: Parutuhpa avyna daihti awpa cha o hneituhpa ta pahno ha sala, a hra aw ta, a o pahraosa aw vei.

⁴⁰ Nâmo chhao a mâ chiehpa ta y teh u, nama pangiasa leina daihti liata Chyhsa Sawchapawpa cha a vy tlôh aw ta,” tah ta.

Chakaotuhpa ngâchhihpa nata ngâchhih leipa

⁴¹ Pity ta, “Abeipa, cha pakhona bie cha keimo deita ma miah na chho, chyhsa zydua maw?” tah ta.

⁴² Abeipa ta, “A daihtita ta chhôhkha nie awpa pachhuahpanoh lymâ awpa ta, a zibeipa ta a o liata hyutuhpa châta a raopa, sôh mokhâhtuhpa ngâchhihpa nata sopa cha ahy ma a châ?

⁴³ A zibeipa a vy tita, rai hria haipa ta a hmôpa chakaotuhpa cha a nohlao kaw aw dia!

⁴⁴ Hmeiseihta ta ei cha chho ei, cha chakaotuhpa cha a hneipa zydua chô liata hyutuhpa ta a tao aw.

⁴⁵ Chakaotuhpa ta a palôh liata, ‘Ei zibeipa charâ ta a vy bao aw vei,’ tahpa ta, chakaotuhpa hropazy cha a chanô chapaw ta tu sala, niedopa ta a pari khiahta deikua cha,

⁴⁶ cha chakaotuhpa zibeipa cha a mokhâh leina noh nata a pahno leipa dawh liata a vy aw ta, chakaotuhpa cha hriechheih aw ta, ngâchhih leipazy to awpa a patosa aw.

⁴⁷ A zibeipa khopa pahno thlâh hana chôta, a mâ chiehpa ta y leipa chakaotuhpa nata zibeipa khopa hawhta a tao leipa chakaotuhpa cha, thata tupa a châ aw.

⁴⁸ Pahno leina vâta tu tlâhpa hmo a taopa chakaotuhpa deikua cha, a chyh via ta tupa a châ aw. A hluhpi piepa cha, a hluhpi a hnawpa châ aw ta; a hluhpi pavaosapa chhao, a hluhpi hnabeiseihpa a châ aw.

Zisu vâta achhaihna

⁴⁹ “Alei chô liata mei pathla awpa ta a vypa ei châ. Tahmâ chhao he kâ ha sala ei tah kaw dia!

⁵⁰ Châhrasala bâti châ awpa ei hnei. Cha cha ei pangoh hlâlei cha ei hu a po kaw dia!

⁵¹ Khizaw liata adyhna chareisa awpa ta a vypa khiah ma eina tah ei chi ma? Châ bao va, ei cha chho ei, pachhaih awpa ta a vypa tlao ei châ.

⁵² Tahmâ tawhta cha, chhôhkha liata chyhsa papangawhzy amâ pachhaih aw. Pathôh ta pano a dyuh aw ei ta, pano ta pathôh amâ dyuh aw.

⁵³ Amâ chhaih aw. A paw ta a sawchapawpa a dyuh aw ta, a sawchapawpa ta a paw â dyuh aw. A nô ta a sawchanô a dyuh aw ta, a sawchanô ta a nô â dyuh aw. A nohnô ta a myuhnô a dyuh aw ta, a myuhnô ta a nohnô â dyuh aw,” tah ta.

Daihti pahnona

⁵⁴ Zisu ta zawpizy hnoh chhao ta reih ta, “Notla lâta meihdo vaw thyupa nama hmô nahta, ‘Avâ a suah aw,’ thlai tah ei chi ta, a suah tlai tyh.

⁵⁵ Chho thlih pathlipa nama hmô tita, ‘Noh a palo aw,’ tah ei chi ta, a palo tlai tyh.

⁵⁶ Nâmo, phapakheipazy saih u, alei nata avâ yzie pahno thai ei chi ta, khazia tahmâhlâ hmo yzie he nama pahno thai vei?

Lyuhtuatuhpa nata aparyhna

⁵⁷ “Khazia hmo dopa cha nâmo ta nama pasia thlâh ha vei?

⁵⁸ Lyuh châ tuatuhpa nata ryureituhpa hmiakô lâ na sie nota, lâpi liata aryhna tlua lylia mah y. Chataleipatala ryureituhpa hmiakô liata châ chhi aw ta, ryureituhpa ta chyhsa patutuhpa cha patusa aw ta, chyhsa patutuhpa ta patâhna o liata a cha khô pathlei aw na.

⁵⁹ Ei cha chho, na chei awpa phusâ dipa taihta na pie khai hlâlei cha, cha su tawhta pua aw va chi,” tah ta.