LUKA 11 - Mara Bible RV (BSI)

Abeipa Thlahchhâna

¹ Noh kha cha su miakha liata Zisu cha thlahchhâ ta, a chhâ khai nahta, a pachupa pakha ta a hnohta, “Abeipa, Zawhâna ta a pachupazy thlachhâzie a pachupa hawhna khata, nâ chhao thlahchhâzie miah pachu hra teh,” tah ta.

² Zisu ta ama hnohta, “Thlah nama chhâ tita, hetana heta nama chhâ aw: “‘Eima Paw vârâh liatapa, Na moh zachhih mawh sy. Na khinarâh vaw tlô mawh sy.

³ Noh chareih nie awpa miah pie mah y.

⁴ Eima chô liata hmo a paraopazy eimâ ngiahthaipa hawhta, Eima paraonazy miah a ngiahthai mah y. Reipasaona lâta miah a chhi khah y,’” tah ta.

⁵ Chatawhcha a pachupazy hnohta, “Nama hry liata viasa a hneipa pakha ta, zâcho ta a viasapa o lâ vawh ta, a hnohta, ‘Viasa, viahchhâ tlâ thôh na patha tua.

⁶ Ei viasa khitlyhpa ta na vaw tlô ta, ei pie awpa khâpa hmah hnei va na,’ kei tah sala;

⁷ a viasa chata ochhôh lâ tawhta, ‘Na patypamâ khah y. Ochhi khaw hapa châ ta, ei sawzy chhao ei hnohta rakhô liata amâ zia haw. Chavâta thyupa ta cha pie thei va na,’ a kaw tah aw ma?

⁸ Ei cha chho ei, a viasa a châpa vâta thyupa ta a pie leipa chhao ta, bâh leipa ta a hia ngâ thlâh hapa vâta, thyu aw ta â ngiahpa hawhta a pie aw.

⁹ Ei cha chho ei, hiah teh u, piepa nama châ aw. Tlua teh u, nama hmô aw. Chakhyh teh u, pahypa nama châ aw.

¹⁰ A hiahpa maihta piepa châ ei ta, a tluapa ta hmô ta, a chakhyhpa cha pahypa a châ.

¹¹ Nama hry liata ahy paw ma, a sawchapawpa ta viahchhâ hiah sala, alô a pie aw? A sawchapawpa ta ngasa hiah sala, ngasa vyuhpa ta parih a pie aw ma?

¹² Awhtih hiah sala, râh cha-ia a pie aw ma?

¹³ Nâmo, moleipazy chi hmahta, nama sawzy hmo phapa piena châh nama pahno khiahta cha, nama Paw vârâh liata a ypa chhochhi ta cha, khatlu ta khokhei viapa ta ma a hiahtuhpazy hnohta Thlahpa Pathaihpa a pie aw tly!” tah ta.

Zisu nata Belzebu

¹⁴ Zisu ta ahripa reih pathlie thei leipa papua ta. Ahripa a pua nahta, reih pathlie thei leipa cha a reih pathlie thei ha ta. Zawpi ama noâh kaw ta.

¹⁵ Châhrasala thokha ta, “Ahripa bei Belzebu moh ta ahripazy a papuapa a châ hih,” tah ei ta.

¹⁶ Ahropazy ta ano pasia nawpa ta, vârâh tawhta ngiana a hnaw ei ta.

¹⁷ Ama pachânazy cha Zisu ta pahno ta, ama hnohta, “Kheihawhpa khinarâh rai âmosasyh ta a dyuhpa maih leidia tyh ei ta, âmosasyh ta a dyuhpa chhôhkha chhao ama pao tyh.

¹⁸ Belzebu moh ta ahripazy ei papuapa hawhta reih ei chi ta, Sâtâ chhao anosasyh ta â dyuh khiahta cha, kheihta ma a khinarâh â duah thei aw?

¹⁹ Kei ta Belzebu moh ta ahripazy ei papua khiahta cha, nama sawchapawzy kha ahy moh ta ma ahripazy ama papua tyh? Chavâta âmo cha châ pachiatuhpazy ama châ aw.

²⁰ Khazohpa kudy hmâpa ta ahripazy a papuapa ei châ khiahta deikua cha, Khazohpa khinarâh cha nama chô liata a vaw tlô hapa a châ.

²¹ Chyhsa thatlôpa ta chaihrai â kipa ta chabapa ta, a o a vaih chhôh ta cha, a hmozy â bohpa ta a y.

²² Châhrasala ano hlâta thatlô viapa ta a vaw dyuh ta, a pahnie tita cha, â ngâchhâpa chaihraizy cha chhu ta, a sôh la ta, a rai tyh.

²³ Ei chhâh a châ leipa cha, nâ dyuhtuhpa châ ta, nâ pahmaohkhei leipa cha, a papaituhpa a châ.

Thlahpa puapa vaw kuana

²⁴ “Thlahpa puapa cha chyhsa tawhta a pua nahta, apahâna su tluapa ta ti y leina suzy chahryh ta, châhrasala hmô leipa ta, ‘Ei vaw puana o lâ ei kua heih aw,’ tah ta.

²⁵ A tlô nahta, o cha phi chiehpa nata paryh khaipa ta hmô ta.

²⁶ Sie ta, ano hlâta a chhie viapa ahripa hropa pasari a vaw chhi ta, cha liata a ngia ei ta, ama pahrâ haw. Cha chyhsa châta cha, a daihti hmiatuapa lâta a duahmo hlâ khata a daihti hnôhlâ ta a duahmo cha a chhie via syulyu haw,” tah ta.

Nohlaona dopa

²⁷ Cha biezy cha a rei hai nota, zawpi hry tawhta chanô pakha ta vaw awh ta, a hnohta, “Nâma châ phaohtuhpa chhi cha a nohlao kaw dia! A sâhpi na pazypa chhao a nohlao kaw dia,” tah ta.

²⁸ Châhrasala Zisu ta, “Khazohpa bie thei ta a zyhpazy cha chyhsa nohlao hmeiseihpazy tlao ama châ,” tah ta.

Chhâ moleipa ta ngiana a tlua

²⁹ Zawpizy a vypakhy via lymâ ei ta, Zisu ta, “He chhâ he chhâ moleipa a châ. Ngiana tlua ei ta, châhrasala Zawna ngiana dei leipa cha, ama hnohta ngiana rai piepa châ aw vei.

³⁰ Zawna cha Ninivâ mo châta ngiana a châpa hawhna khata, Chyhsa Sawchapawpa cha he chhâ châta ngiana a châ aw.

³¹ Chho beinô chhao, pachiana noh liata, he chhâ chyhsazy nata vaw thyu khoh aw ta, he chhâ he thailei a pachâsa aw. Sawlawmaw sona nathlie awpa ta hmahta khizaw chhâna tawhta a vy ta, moh teh u, Sawlawmaw hlâta rônah viapa he liata a y.

³² Pachiana noh liata, Ninivâ mo kha he chhâ nata vaw thyu khoh aw ei ta, he chhâ he thailei ama pachâsa aw. Âmo cha Zawna biechhopa vâta ro ei ta, moh teh u, Zawna hlâta rônah viapa he liata a y.

Pôhpa khaihna

³³ “Ahy hmahta meiôh rao sala su nyupa liata soh beih leipa aw ta, beih ta khu beih hra aw vei. O chhôh lâ a ngiapazy ta khaihna ama hmô thei nawpa ta, meiôh sona liata a soh tyh.

³⁴ Na mo cha na pôhpa meiôh a châ. Na mo a sia khiahta cha, na pôhpa duata a khaih tyh. Na mo a rao khiahta deikua cha, na pôhpa duata a zoh tyh.

³⁵ Chavâta a chado teh, chataleipatala na chhôh liata khaihna a ypa kha zohna a châ pathlei aw.

³⁶ Na pôhpa kheihawhpa lia hmahta zoh leipa sala, khaihna ta a bie khiahta cha, meiôh khaihna ta khaihna a cha piepa hawhta, na pôhpa zydua a pakhaihsa aw,” tah ta.

Phârisaihzy nata ryhpa pachutuhpazy hupona

³⁷ Bie a rei hai nota, Phârisaih pakha ta pati nie hrua ta. A o liata a ngia ta, pati cha dôh ta.

³⁸ Pati nie hlâta a ku â si leipa Phârisaih chata a hmô nahta, noâh tah kaw ta.

³⁹ Abeipa ta a hnohta, “Nâmo, Phârisaihzy ta cha nyu nata beikoh zy a chô lâ pasi tyh ei chi ta, nama chhôh lâ deikua cha karâyna nata moleina ta a bie.

⁴⁰ Ahrupa saih u! A chô lâ a taotuhpa ta a chhôh lâ chhao tao vei ma?

⁴¹ A chhôh liata hmo a ypa cha dyhchhiepazy pie awpa ta hmâh teh u, chatanachata nama châta ato a pathaih aw.

⁴² “Nâmo, Phârisaihzy saih u, nama hu a po na! Pudinâ nata sysadi nata âhnalasi to tawhta su hrawh su kha pie tyh ei chi ta, adona nata Khazohpa kyhpachâna hmâchhâh uasa leipa ta nama y. Chazy cha nama tao awpa tlai châ ta, ahropazy chhao uasa leipa ta nama y awpa châ vei.

⁴³ Nâmo, Phârisaihzy saih u, nama hu a po na! Pakhyna ozy liata dyuchhai pha chaipa nata sôhdaoh suzy liata anaohnazy a tlaichhai kawpa nama châ.

⁴⁴ Nama hu a po na! Ngiana tao leipa thlâ châ ei chi ta, chyhsazy ta pahno leipa ta ama sie thlu tyhpa thlâ hawhta nama châ,” tah ta.

⁴⁵ Dâhthaipa pakha ta a chhy ta, “Pachutuhpa, cha biezy na reipa chata keimo chhao miah na reipachhie pâ hra,” tah ta.

⁴⁶ Zisu ta, “Ryhpa pachutuhpa saih u, nâmo chhao nama hu a po na! Zawpizy phaohri ngaitapa paphaosa ei chi ta, nâmo deikua ta cha, nama kuparo miakha chhao ta phaohri cha hria khoh veih ei chi.

⁴⁷ Nama hu a po na! Châ pathlatuhpazy ta ama thiepa hrohsopazy thlâ o nama sa tyh.

⁴⁸ Cha chata châ pathlatuhpazy hmotaopa pahnokheipa ta, ama hmotaopa namâ pyhkheizie a palâsa. Âmo ta thie ei ta, nâmo ta ama thlâ ozy nama sa.

⁴⁹ Chavâta Khazohpa sona chhao ta, ‘Ama hnohta hrohsopazy nata lyuhchâpazy tuah aw na ta, thokha thie aw ei ta, thokha ama taola aw,’ a tahpa kha a châ.

⁵⁰ Chavâta leilô y tua no tawhta hrohsopazy thisaih maoh cha, he chhâ heta ama phaoh aw.

⁵¹ Maisâh nata supathaihpa likawh ta a thipa Abela thisaih tawhta Zekaria thisaih taihta, hrohsopazy thisaih maoh zydua ama phaoh aw. Hmeiseihta ta ei cha chho ei, he chhâ heta hrohsopazy thisaih maoh cha ama phaoh tlai aw.

⁵² Nâmo, dâhthaipazy saih u, nama hu a po na! Pahnona châhbi la ei chi ta, châhrasala nâmo a ngia tlôh leipa ei chi ta, mohropa a ngia awpazy nama pakhâ khai haw,” tah ta.

⁵³ Cha su tawhta a pua nahta, ryhpa pachutuhpazy nata Phârisaihzy ta Zisu cha bie hluhpi pareisa raruah a chhuah ei ta.

⁵⁴ A rei chheipa tawhta patu a chhuahpa ta a byh thlâh ha ei ta.