LUKA 1 - Mara Bible RV (BSI)

Theôphilâ hnohta hlâpa châbu

¹ Eima hry liata hmo vaw tlôpa thâtihzy kha chyhsa hluhpi ta roh ha ei ta,

² a hmôtuhpazy nata bie chakaotuhpazy ta âthaona tawhta miah hlâ pachhuah hra ei ta.

³ Hy zachhih chaipa Theôphilâ y, kei chhao ta, daihti khachâ rakha ma a sie hapa tawhna khata, cha thâtih zydua cha a siapa ta a laichadai na ta, â pazipa ta cha ropa awpa a phapa ta ei pahno.

⁴ Chatanachata bie ama cha pachupazy kha âdopazy tlai a châ tahpa na pahno aw.

Bâtituhpa Zawhâna pina chhochhieliena

⁵ Zudia bei Herawda daihti liata, Abizah py liata theihthaipa pakha, a moh Zekaria ama tahpa y ta. Cha chyhsa chata Arawna pathla hry liatapa Elizabe cha lapinô ta hnei ta.

⁶ Ama pano ta Khazohpa hmiakô liata chyhsa siapa châ ei ta, Abeipa biepiepa nata bieraopa zydua liata seina hnei leipa ta a zyh lymâpa ama châ.

⁷ Châhrasala Elizabe cha a choh hapa vâta saw hnei leipa ei ta, ama pano ta machâ kaw bâ ei ta.

⁸ Chatawhcha hetana heta vaw châ ta. Noh kha cha ano py chakao daihti liata, Zekaria chhao Khazohpa hmiakô liata theihthaipa chakaona rai hria hra ta.

⁹ Theihthaipazy taozietyhpa hawhta, Abeipa Achhyna o liata a ngia ta, ropahâhpa rao awpa ta nuby a daopa châ ta, cha cha Zekaria chô liata tlu ta.

¹⁰ Ropahâhpa raona daihti liata, zawpi zydua cha khôtho liata thlahchhâ ei ta.

¹¹ Abeipa vâlyuhchâpa pakha a hnohta a vaw luah ta, ropahâhpa raona maisâh chachâh lâta a vaw duah ta.

¹² Vâlyuhchâpa cha a hmô nahta, Zekaria cha a nôpopa ta, chi ngaita ta.

¹³ Châhrasala vâlyuhchâpa ta a hnohta, “Zekaria, chi khah y, na thlahchhâna kha theipa a châ haw. Na lapinô Elizabe ta sawchapawpa sa aw ta, a moh Zawhâna na bi aw.

¹⁴ Thaphana nata alyna hnei aw chi ta, ano vaw pipa cha chyhsa hluhpi ta amâ ly aw.

¹⁵ Abeipa hmiakô liata chyhsa rônahpa a châ aw. Kresawhti nata sahma a do awpa châ leipa ta, a nô chhi chhôh tawh tlai ta, Thlahpa Pathaihpa ta a bie aw.

¹⁶ Izarei saw hluhpi Abeipa ama Khazohpa lâta a paheisa heih aw.

¹⁷ Elaizâh thlahpa nata hmotaotheina ta Khazohpa hmiakô liata sie aw ta, pawzy palôh cha sawzy lâta paheisapa ta, reingiah leipazy cha mosiapazy sona lâta paheisa aw ta, phopi pachhuahpanohpa cha Abeipa châta a mâ chiehpa ta a tao aw,” tah ta.

¹⁸ Zekaria ta vâlyuhchâpa hnohta, “Cha cha kheihta ei pahno thei aw? Pawpipa châ na ta, ei lapinô chhao machâ ha ta,” tah ta.

¹⁹ Vâlyuhchâpa ta a chhy ta, “Kei he Kabriel ei châ. Khazohpa hmiakô liata a duah tyhpa châ na ta, bie cha chho ta, he thâtih lychhihpa he cha vaw tlôkhei awpa ta tuapa ei châ.

²⁰ Pachâ teh, a daihti raopa liata a vaw tlô awpa ei bie reipazy na zo leipa vâta, cha hmozy a vaw tlô hlâlei cha, bie reih thei khao aw va chi, nâ thlih thlâh ha aw,” tah ta.

²¹ Zawpi ta Zekaria cha hâ thlâh ha ei ta, Achhyna o liata a y parei kawpa vâta ama noâh kaw ta.

²² A vaw pua nahta, âmo cha bie a chho thei khao leipa ta, Achhyna o liata aluahna a hmô tahpa pahno ei ta. Bie a reih thei khao leipa vâta, ama hnohta a ku ta thliethlâ ta.

²³ A chakaona daihti a chhâ nahta, Zekaria cha o lâ a di ha ta.

²⁴ Cha hnôhlâ ta a lapinô Elizabe cha saw phaoh ta, thla pangawh chhôh a nyu ta,

²⁵ “Chyhsazy hry liata ei noza hmiachhiena papai nawpa ta, Abeipa ta na ngiachhie ta, he hmo he eina taopa,” tah ta.

Zisu pina chhochhieliena

²⁶ A thla charuna liata, Khazohpa ta vâlyuhchâpa Kabriel cha Kâlili râh liata khihpi miakha, Nâzari ama tahpa liata a ypa,

²⁷ laihsa kôpa lâ tuah ta. Laihsa kôpa cha Dâvi pathla Zawsi ta hnei awpa ta â pahawhpa châ ta, a moh cha Mâri a châ.

²⁸ Vâlyuhchâpa cha ano lâ a vy ta, a hnohta, “Ei châ naoh na, nohlaopa y, Abeipa na hnohta a y! Chanôzy hry liata nohlao chaipa na châ,” tah ta.

²⁹ Vâlyuhchâpa bie reipa ta Mâri cha a nô papo kaw ta, kheihawhpa anaohna ma a châ tahpa pachâ ta.

³⁰ Vâlyuhchâpa ta a hnohta, “Mâri, chi khah y, Khazohpa khokheina na to hih.

³¹ Pachâ teh, na chhi liata nawh a choh aw ta, sawchapaw sa aw chi ta, a moh ta Zisu na bi aw.

³² Ano cha chyhsa rônahpa châ aw ta, Chônôchaipa Sawchapawpa bipa a châ aw. A pathlatuhpa Dâvi beidyuchhai cha Abeipa Khazohpa ta a hnohta pie aw ta,

³³ Zakaw pathlazy chô liata chhâzaw ta a bei aw ta, a khinarâh chhao chhâna hnei aw vei,” tah ta.

³⁴ Mâri ta vâlyuhchâpa hnohta, “Cha cha kheihta a châ thei aw, laihsa kôpa châ tlôh na ta?” tah ta.

³⁵ Vâlyuhchâpa ta a hnohta, “Thlahpa Pathaihpa na chô liata vaw tlô aw ta, Chônôchaipa hmotaotheina ta a cha khu aw. Chavâta hawti pathaihpa a vaw pih awpa cha, Khazohpa Sawchapawpa bipa a châ aw.

³⁶ Pachâ teh, na chiheih chanô a choh hapa Elizabe chhao khata, a nôpi tawhta saw phaoh ta, tahmâ he a thla charuna a châ haw.

³⁷ Khazohpa châta tao thei leipa hmo y vei,” tah ta.

³⁸ Mâri ta, “Moh teh, Abeipa seichanô ei châ. Na bie hawhta ei chô liata tlô mawh sy,” tah ta. Chatawhcha vâlyuhchâpa ta Mâri cha siesai ha ta.

Mâri ta Elizabe â kei hmô

³⁹ Cha khaipa nahta, Mâri cha thlai thyu ta, tlâh râh liata a ypa Zudia khihpi miakha lâ sie ta.

⁴⁰ Zekaria o liata a ngia ta, Elizabe cha a naoh ta.

⁴¹ Elizabe ta Mâri anaohna a thei nahta, a chhi liata hawsaih cha a tlieh ta. Elizabe cha Thlahpa Pathaihpa ta vaw bie ta,

⁴² ao paro ngaitapa ta awh ta, “Chanô zydua hry liata nohlao chaipa châ chi ta, na chhi thei chhao a nohlao na!

⁴³ He nohlaona he kheihtazieta a topa ma ei châ tly, ei Beipa nô ta eina vaw tly thlâh hapa chi he?

⁴⁴ Pachâ teh, nâ naohna ao kha ei nakhaoh liata â ngiapa nahta, ei chhi liata hawsaih cha a lypa ta â chotlai ngâ kaw.

⁴⁵ Abeipa ta a hnohta bie a reipa a vaw tlô aw tahpa a zopa chanô cha a nohlao na,” tah ta.

Mâri reithaina hla

⁴⁶ Chatawhcha Mâri ta, “Ei hro ta Abeipa reithai ta,

⁴⁷ Khazohpa nâ Pachhatuhpa liata ei thlahpa â ly,

⁴⁸ A seichanô nawhpa he a ngiachhiepa vâta. Tahmâ tawhta cha, Chhâ zydua ta nohlaonô eina tah aw ei.

⁴⁹ Atotaotheipa ta hmo rônahpa na taopa ta, A moh cha pathaihpa a châ.

⁵⁰ A zawngiahna cha ano a chipazy châta châ ta, Chhâzaw nata tlyzaw ta a y aw.

⁵¹ A bâh ta a thatlôzie pamosa ta, Palôh laipazy a papaipatla tyh.

⁵² Thatlôpazy ama beidyuchhai tawhta a daophi ta, Areisipazy a cheihchalo tyh.

⁵³ Nodipa cha hmo phapazy ta pabie ta, Hneirôhpazy aruapa ta a pasiesa.

⁵⁴ A zawngiahna atheithlâhna châta, A chakaotuhpa Izarei cha bao ta,

⁵⁵ Miah pathlatuhpazy hnohta reih ta, Abarahâ nata a pathlazy hnohta a reipa hawhta, A chakaotuhpa Izarei cha a bao haw,” tah ta.

⁵⁶ Mâri cha Elizabe hnohta thla thôh rachhôh y ta, cha khai tawhta a o lâ a lie ha ta.

Bâtituhpa Zawhâna pina

⁵⁷ Elizabe cha a nawh hnei daihti a vaw daih ta, sawchapaw sa ta.

⁵⁸ Abeipa ta Elizabe chô liata zawngiahna rônah ngaitapa a palâsa haw tahpa a opazy nata a chiheihzy ta ama thei nahta, a lykhei ngaita ei ta.

⁵⁹ A noh chariena noh ta hawsaih chopawtai awpa ta a vy ei ta, a paw moh zipa ta a moh Zekaria bi a chhuah ei ta.

⁶⁰ Châhrasala a nô ta, “Châ vei, Zawhâna bi awpa a châ,” tah ta.

⁶¹ Âmo ta a hnohta, “Na chiheihzy hry liata, cha moh a phaohpa ahy hmah y veih ei,” tah ei ta.

⁶² A paw cha thliethlâpa ei ta, a moh bi awpa a khopa hiahri ei ta.

⁶³ Zekaria ta chârona lôchâ hiah ta, “A moh Zawhâna a châ,” tahpa ta roh ta. Ama zydua ta ama noâh kaw ta.

⁶⁴ Sôkha ta a pakah vaw âpa ta, a paleih a vaw thlâ ta, reih pathliepa ta Khazohpa reithai ta.

⁶⁵ Ama opa zydua ta chi ngaita ei ta. Cha hmo kyh zydua cha Zudia tlâh râh zydua liata pathâh ta.

⁶⁶ A theipa maihta ama palôh liata khô ei ta, “Cha hawti cha kheihawhpa chyhsa ma a vaw châ aw?” tahpa pachâ ei ta. Abeipa ku cha hawti hnohta y ta.

Zekaria chhochhieliena

⁶⁷ A paw Zekaria cha Thlahpa Pathaihpa ta bie ta, hrohsona bie phuah ta,

⁶⁸ “Abeipa Izarei Khazohpa cha, Reithaipa ta y mawh sy! A chyhsazy za tly ta, A pachha haw.

⁶⁹ A chakaotuhpa Dâvi pathla hry tawhta, Pachhana ki miah a chaluahpa haw.

⁷⁰ Leilô pi tua no tawhta A hrohso pathaihpazy pakah ta a rei hapa hawhta,

⁷¹ Eima chariahzy tawhta pachhapa ta y aw pi ta, Miah a haopazy ku tawhta pachhapa ta eima y aw.

⁷² Miah pathlatuhpazy hnohta Zawngiahna bietai palâsa ta, A biehrai pathaihpa â thei thlâh haw.

⁷³ Miah pathlatuhpa Abarahâ hnohta Miah bao awpa ta bie â taihpa hawhta,

⁷⁴ Eima chariahpazy ku tawhta miah a pachha haw.

⁷⁵ Chavâta chi leipa ta ano chakao aw pi ta, Eima hro chhôh zydua ta, Pathaihpa nata siapa ta a hmiakô liata eima y thei aw.

⁷⁶ Chavâta nâ, hawtipa y, Chônôchai hrohsopa tahpa na châ aw. Abeipa lâpizy a chhuahdy awpa ta, A hmia lâta sie aw chi ta,

⁷⁷ A chyhsazy moleina a ngiahthaipa ta, Pachhana pahnona pie awpa ta,

⁷⁸ Eima Khazohpa zawngiahna vâta, Chô lâ tawhta noh chhipa ta miah a za tly aw;

⁷⁹ Zohna liata a tyuhpazy khaihna piepa ta, Thina nohpahli liata a tyuhpazy pakhaihsa awpa ta, Thlalôhna lâpi liata eima pheizy chakâsa awpa ta,” tah ta.

⁸⁰ Hawsaih cha laiseih lymâ ta, thlahpa liata a tha vaw tlô via lymâ ta, Izarei hnohta â luah hlâlei cha râhchawhpa liata y thlâh ha ta.