KAOLAOSÂ 4 - Mara Bible RV (BSI)

Pachunazy

¹ Zibeipa saih u, nâmo chhao avâ liata Zibeipa nama hnei tahpa pahnopa ta, nama seizy chô liata â do kawpa nata â raohâh kawpa ta tao muh vy.

² Thlahchhâ lylia u la, nama thlahchhâna liana chata alyna bie reih u la, a hrohrua teh u.

³ Bâlia ei kyna chhâpa Krista bienyupa chho awpa ta, Khazohpa ta a bie châta ochhi miah a pahypa thei nawpa ta, thlah miah chhâpa u la,

⁴ ei rei awpa hawhta ei reih thei nawpa ta thlah na chhâpa teh u.

⁵ Rypaohna patu thai lymâpa ta, khôtho chyhsazy liata so ngaitapa ta y teh u.

⁶ Chyhsa to hnohta namâ chhyzie awpa nama pahno thei nawpa ta, nama reikah a puapa cha, khatino rai ta ngiachhiena ta bie sala, alôh hawhta iahpa châ lymâ mawh sy.

Anaohna nata byhnâ awna

⁷ Abeipa liata unawh kho ngaitapa, chakaotuhpa ngâchhihpa nata chakaolâhpa Tykiku ta ei thâtih zydua a cha chho aw ei.

⁸ Eima duahmo vaw pahnopa ta, thlah a cha palôh thei nawpa ei ta, Tykiku cha nâmo lâ ei vaw tuah.

⁹ Ano hnohta nama chyhsa Ônesimâ, eima unawh ngâchhihpa nata kho ngaitapa ei vaw tuah hra. Âmo ta eima yna liata hmo yzie zydua ama cha chho khai aw.

¹⁰ Ei tâlâhpa Aristaku ta a châ naoh ei. Bânabâ tupapa Mâka chhao ta a châ naoh ei. Ano kyh liata pahnosana vaw dao ha ei chi ta, nâmo lâ â vy khiahta cha, a vaw ly muh vy.

¹¹ Zisu, Zustâ ama tahpa chhao ta a châ naoh ei. Âmo deita he chopawtaipazy hry liata Khazohpa khinarâh châta ei hrialâhpazy châ ei ta, thlah nâ palôhtuhpazy ama châ.

¹² Nama chyhsa Epâpharâ, Krista Zisu chakaotuhpa ta a châ naoh ei. Khazohpa khozie zydua liata pitlohpa nata tlokhuh a lôhpa ta, namâ duah thei nawpa ta, phahnai ngiah ngaitapa ta thlah a cha chhâpa tyh ei.

¹³ Nâmo châta nata Laodisi khih liata a ypazy châta nata Hirâpôli khih liata a ypazy châta hriapasa ngaitapa a châzie ei pahnokhei.

¹⁴ Dawhty kho ngaitapa Luka ta châ naoh ei ta, Demâ chhao ta a châ naoh ei.

¹⁵ Laodisi khih liata unawhzy kha nâ naohpa u la, Nypha nata a o liata a pakhypa Awnanopa chhao kha nâ naohpa muh vy.

¹⁶ He châpaphaopa he nama hry liata rei khaipa a châ tawhta, Laodisi Awnanopa chhao pareisa hra u la, nâmo chhao Laodisi mo hnohta ei châpaphaopa kha vaw reih hra muh vy.

¹⁷ Akhipâ kha, “Abeipa liata chakaona na hmôpa kha patlô a chhuah mah y,” tahpa ta vaw chho muh vy.

¹⁸ Kei, Pawla ta, he anaohna he keima ku tlai ta ei ropa a châ. Ei bâlia a kypa he a thei thlâh ha teh u. Ngiachhiena nama hnohta y mawh sy.