KAOLAOSÂ 3 - Mara Bible RV (BSI)

Hro thiehpa ta atobina

¹ Krista hnohta pathyupa nama châ ha tawhta cha, Khazohpa chachâh lâta a tyuhpa Krista yna liata chô lâ hmozy tlua teh u.

² Chô lâ hmozy liata nama palôh pachhô u la, alei hmozy liata pachhô khuh vy.

³ Thi ha ei chi ta, nama hrona cha Khazohpa liata Krista hnohta nyupa ta a y haw.

⁴ Krista eima hrona cha â vaw luah tita, nâmo chhao ano hnohta rônahpa ta namâ luah hra aw.

⁵ Chavâta khizaw hro nâmo liata a ypa, apatlana, puana, parâna, molei khona nata uahvana zy cha thie teh u. Uahvana cha nothlahpa achhyna a châ.

⁶ Cha hmozy vâna chata Khazohpa hiehâhna cha ngiapâleipazy chô liata a tlô hai.

⁷ Kha hlâta cha nâmo chhao, cha hmozy liana chata hroh ei chi ta, cha hmozy cha nama tao tyh.

⁸ Tahmâ deikua cha, hiehâhna, pathichhiena, ahaona, reipachhiena nata bie puapa zy nama pakah tawhta nama pahlei awpa a châ.

⁹ Nama chyhsa parohpa cha a hmotaopazy chhaota nama pahluh hapa vâta, haipa bie a chho raihrie khao khuh vy.

¹⁰ Chyhsa thiehpa ta a tobi ha ei chi ta, cha chyhsa thiehpa cha pahnona hnei awpa ta, ano taotuhpa lyupa ta tao pathipa ta a y lymâ.

¹¹ Cha chyhsa thiehpa hro liana cha, Krikâh chyhsa nata Zu chyhsa tahpa tlyma, chopawtaipa nata chopawtaileipa tahpa tlyma, chi hnohkhawpa tahpa tlyma, Skythia mo tahpa hawhpa tlyma, sei tahpa tlyma, khotalaipa tahpa tlyma, y khao vei. Krista cha ato châ ta, ato liata a ypa a châ.

¹² Chavâta Khazohpa chyhsa atlyhpa, mopathaihpa nata kho ngaitapazy nama châpa hawhta, thapasana palôh, nôphana, areisina, nônaina nata daotheina zy ta a tobi teh u.

¹³ A chhyh thai raihrie u la, nama likah liata biepeipa a y khiahta cha, a ngiahthai raihrie teh u. Abeipa ta a châ ngiahthai hapa hawh ei ta, nâmo chhao namâ ngiahthai hra awpa a châ.

¹⁴ Cha zydua hlâta a peimawh chaipa cha, kyhpachâna ta a tobi teh u. Kyhpachâna cha ato zydua a ryh ngaitapa ta a chahry pabaohtuhpa a châ.

¹⁵ Krista thlalôhna ta nama palôh liata ryureih mawh sy. Cha hawhta châ awpa ta pôhpa miakha liata awpa nama châ. Chavâta a ly teh u.

¹⁶ Krista bie cha nâmo liata biepakhôpa ta y mawh sy. Sona to ta a pachupa ta a chhorei raihrie u la, palôh alyna chôta, reithaina hlazy nata thlahpa hlazy Khazohpa lâ sa teh u.

¹⁷ Nama taopa maih, biereipa rai châ sala, hmotaopa rai châ sala, Abeipa Zisu moh ta ato tao u la, ano zawhzi ta Paw Khazohpa hnohta alyna bie reih tyh muh vy.

Krizyhpa chhôhkha hrozie

¹⁸ Lapinô saih u, Abeipa liata namâ ngiarihpa hawhta, nama vahpazy liata a ngiarih teh u.

¹⁹ Vahpa saih u, nama lapinôzy kyhpachâ u la, ama chô liata a hrâhraoh khuh vy.

²⁰ Saw saih u, ato liata nama nôpawzy bie zyh teh u, cha cha Abeipa alynazie a châ.

²¹ Paw saih u, nama sawzy ru pachhô khuh vy, ama hnabei a dy pathlei aw na.

²² Sei saih u, ato liata, khizaw liata nama zibeipazy bie zyh teh u. Chyhsa palysa a chhuahpazy hawhta, ama mohmô lia dei ta chakao leipa u la, Abeipa china chôta, palôh hmeiseihpa ta chakao muh vy.

²³ Nama taopa maih, chyhsapa châta taopa hawhta pachâ leipa ta, Abeipa châta taopa hawhta tlao pachâpa ta, palôh pha ngaitapa ta hria lymâ teh u.

²⁴ Nama lymâ châta Abeipa tawhta ryuto a hmô awpa nama châpa pahnopa ta, Abeipa Krista a chakaopa nama châ.

²⁵ Hmo doleipa a taopa cha, hmo doleipa a taopa mâ a hmô aw. Khokhei viapa y veih ei.