KAOLAOSÂ 2 - Mara Bible RV (BSI)

Krista liata hrona

¹ Nâmo nata Laodisi khih liata a ypazy nata ei hmia nâ hmô leipazy châta kha tlu ta ma ei tei lylia tahpa nama pahno awpa ei khoh.

² Chatanachata ama palôhzy thapatlôpa ta y aw ta, kyhpachâna liata a chahry pabaoh aw ei ta, pahnopasiana liata hneirôna zydua topa ta, Khazohpa bienyupa, Krista cha ama pahno thei aw.

³ Sona nata pahnona hneirôna zydua Krista liata nyupa a châ.

⁴ Ahy hmahta reikah thaipa ta ama cha dôvei lei nawpa ta, cha bie cha ei reih.

⁵ Nama hnohta ei pôhpa ta y vei hraw sah la, thlahpa ta nama hnohta y tyh na ta, namâ mohôhna siazie nata Krista ngiapâna liata namâ izie zy ei hmôpa ta eina palysa ngaita.

⁶ Chavâta Krista Zisu Abeipa namâ pyh ha tawhta cha, ano liata y u la,

⁷ ano liata thari thlapa ta a duah u la, pachuna nama daopa hawhna khata ngiapâna liata â i ngaitapa ta ypa ta, alyna bie reih tyh muh vy.

⁸ Ahy hmahta Krista bie hawhta châ leipa ta, chyhsapa taozietyhpa nata khizaw siezie hawhta ama châ chhi lei nawpa nata, ama thaisona nata dôveina ruapa hmâpa ta ama cha parao lei nawpa ta, a hrohrua teh u.

⁹ Khazohpa châna zydua cha, â kipa nata a pôhpa tlai ta Krista liata a pahrâ.

¹⁰ Ryureina nata biehneina zydua luhpa Krista liana chata nâmo chhao pakipa ta nama y.

¹¹ Ano liata chopawtaipa châ ei chi ta, cha cha ku ta chopawtaipa châ leipa ta, sapa ryhpa pahluh khaipa ta, Krista liata chopawtaipa nama châ.

¹² Bâtina liata a hnohta pabupa châ ei chi ta, athihpa hry tawhta ano a pathyutuhpa Khazohpa raihria hmotaotheina namâ ngiapâpa vâta, nâmo chhao a hnohta pathyupa nama châ.

¹³ Nâmo, nama paraonazy nata nama sapa liata chopawtaileina vâta athipazy ei chi kha, Khazohpa ta Krista hnohta a cha pahro ei. Krista cha eima moleina zydua miah a ngiahthaituhpa a châ.

¹⁴ Ku ta ropa ryhpazy cha miah dyuhtuhpa nata miah chakhiatuhpa châ ei ta, châhrasala zyh awpa ta eimâ bâh tlôhpazy ama châ. Krista deikua cha eimâ bâhpa zydua phie ta, kraws liata khaipâpa ta pahlei ta, eima moleina zydua miah ngiahthaituhpa a châ.

¹⁵ Krista ta ryureituhpazy nata biehneituhpazy cha ama châna pahluh ta, kraws liata âmo cha pahniepa ta, â lâhâhpa ta maophyuhpa ta a tao ha ei.

Chô lâ hmozy tluana

¹⁶ Chavâta nie kyh ta tlyma, do kyh ta tlyma, chaypi kyh ta tlyma, thla thieh kyh ta tlyma, Pahânoh kyh ta tlyma, ahy hmahta cha sei khah ei sy.

¹⁷ Chazy cha hmo vaw tlô awpazy nohpahlipa châ ta, a hmeiseihpa deikua cha Krista a châ.

¹⁸ Ahy hmahta areisina pakheipa nata vâlyuhchâpazy achhyna a duakheipa ta, nama lymâ hmô thei lei awpa ta cha tao khah ei sy. Cha hawpa chyhsa cha aluahna a hmôpazy kyh â kichopa ta reih tyh ta, a chhâpa y leipa ta sapa palôh ta thata â palai tyh.

¹⁹ Cha hawhpa chyhsa chata Luh cha khâchâ patu vei. Luh ta pôhpa pachiahpa a pazaopakhypazy chyh ta, Khazohpa khozie hawhta ama laiseih lymâ.

²⁰ Khizaw hroziezy cha Krista liata nama thisai ha khiahta cha, khazia khizaw hrozie ta a hroh chypa hawhta, ryhpazy liata namâ ngiarih thlâh ha chy?

²¹ “Tao khah y, padi khah y, hria khah y” tahpa hawhpa ryhpazy liata a ngiarih thlâh chy ei chi ta,

²² cha hawhpa hmo zydua cha, chyhsapa ryhpa nata pachunazy liata a pahniehpa a châpa vâta, hmâ khai tawhta a leidia thlâh ha awpazy a châ.

²³ Âmo khozie hawhta zyhna â taopa, areisina pakheipa nata sapa riepatheisapa hawhpazy he, sona hawhta a lâ hra sala, sapa aohraohna pakhâ nawpa châta phahnai hlei vei.