KAOLAOSÂ 1 - Mara Bible RV (BSI)

Anaohna

¹ Khazohpa khozie hawhta Krista Zisu lyuhchâpa Pawla nata eima unawhpa Timawthy ta

² Kaolaosâ khih liata Krista liata mopathaihpazy nata unawh ngâchhihpazy eima châ naoh. Khazohpa eima Paw tawhta ngiachhiena nata thlalôhna nama hnohta y mawh sy.

Alyna biereina nata thlahchhâna

³ Nama châta thlah eima chhâna maihta, Khazohpa, eima Beipa Zisu Krista Paw hnohta alyna bie eima reih tyh.

⁴ Krista Zisu namâ ngiapâzie nata mopathaihpa zydua chôta kyhpachâna nama hneizie eima vaw theipa vâta nata,

⁵ vârâh liata nama châta hnabeiseihna sopa a châpa vâta, nâmo vâta Khazohpa lâta alyna bie khâ eima reih tyh. Cha hnabeiseihna cha thâtihpha biehmeiseihpa tawhta nama theipa kha a châ.

⁶ Thâtihpha nâmo lâ a vaw tlô tawhta, Khazohpa ngiachhiena thâtihpha cha thei ei chi ta, a hmeiseihpa ta nama pahno noh tawhta nama hry liata thei patheipa ta a pôh lymâpa hawhta, thâtihpha cha khizaw zydua liata thei pathei ta a pôh lymâ.

⁷ Eima chakaolâhpa kho ngaitapa Epâpharâ tawhta thâtihpha thei ei chi ta, ano cha keimo vyuhpa ta Krista chakaotuhpa ngâchhihpa a châ.

⁸ Thlahpa liata nama kyhpachâna miah a chho.

⁹ Cha vâna chata, nama thâtih eima thei noh tawhta, nâmo châta thlahchhâ bâh beih ma pi. Thlahpa lâ sona nata novâhna zydua hneipa ta, ano khopa pahnona ta pabiepa nama châ thei nawpa ta, eima cha hiapa tyh.

¹⁰ Chatanachata Abeipa hmâ tlâhpa chyhsa châ aw ei chi ta, kyh to liata ano palôh patlâhpa ta, raihria to liata pathei aw ei chi ta, Khazohpa pahnona liata nama laiseih rili aw.

¹¹ Tiamana nata pasataona liata a ly kawpa ta nama tao thei nawpa ta, a thatlôna rônahpa liata hmotaotheina zydua hmâpa ta tha a cha patlô aw ei.

¹² Chatanachata khaihna khinarâh liata mopathaihpazy ryutolâhpa châ awpa ta châ patlohsatuhpa Paw hnohta alyna bie nama reih thei aw.

¹³ Khazohpa ta zohna biehneina tawhta miah pachha ta, a Sawchapawpa kyhpachâ ngaitapa khinarâh lâ miah â chhi haw.

¹⁴ Ano liana chata chatlaina, moleinazy ngiahthaina eima hnei.

Ato y hlâta a ypa Krista

¹⁵ Krista cha hmô thei leipa Khazohpa a lyupa, hmotaopa zydua hry liata a pih tua chaipa a châ.

¹⁶ Ano ta ato tao ta, avâ liata a ypazy, alei liata a ypazy, hmô theipazy, hmô thei leipazy, beidyuchhaizy, biehneinazy, ryureituhpazy nata biehneituhpazy a tao. Ato ano vâta taopa châ ta, ano châta taopa a châ.

¹⁷ Ano cha ato y hlâta a ypa châ ta, ano liata ato â syhpahmaoh khai.

¹⁸ Awnanopa cha a pôhpa châ ta, ano cha Awnanopa luh a châ. Ano cha âthaona châ ta, athihpazy hry tawhta a thyu tuachaipa sawchapaw uhtheipa châ ta, ato liata a y tua chaipa a châ.

¹⁹ Khazohpa ta ano cha a pakina to yna châta khoh ta,

²⁰ a kraws thisaih ta aryhna taopa ta, ato, alei chô liata a ypa nata avâ liata a ypa zydua ano nata a ryhpa ta a tao.

²¹ Nâmo chhao eikhano cha, moleinazy taopa ta, Khazohpa nata a maniah ei chi ta, nama palôh ta ano khakhaipazy nama châ.

²² Tahmâ deikua cha, a hmiakô liata pathaihpa nata seina hnei leipa nata reipasipasua nawpa y leipa ta a cha paduasa thei nawpa ei ta, a sapa pôhpa liata thina ta ano nata a cha paryhsa ei.

²³ Ngiapâna liata y thlâh ha u la, â ipa ta a duah teh u. Thâtihpha hnabeiseihna nama pahnopa tawhna khata nama tleisai leipa khiahta cha, cha hawhta nama châ thei aw. Cha thâtihpha cha avâ ry liata hmotaopa zydua hnohta phuahpa châ ta, kei, Pawla he, cha thâtihpha chakaotuhpa cha ei châ.

Awnanopa châta Pawla chakaona

²⁴ Tahmâ cha nama châta pasa ei taonazy liata a ly na ta, a pôhpa, Awnanopa châta Krista pasa tao laibâhpa cha, ei sapa liata ei pazao lymâ.

²⁵ Khazohpa bie â kipa ta ei cha chho thei nawpa ei ta, nâmo mohôhna raihria Khazohpa ta eina piepa lymâ hawhta, Awnanopa chakaotuhpa ta taopa ei châ.

²⁶ Cha Khazohpa bie cha, kô hluhpi nata chhâ hluhpi nyu hapa bienyupa châ ta, tahmâ deikua cha a mopathaihpazy hnohta phualuahpa ta a y.

²⁷ Cha bienyupa rônahpa hneirônazie cha Zenitaizy hry liata pahnosa awpa ta, Khazohpa ta mopathaihpazy a tlyh ta, cha bienyupa cha nâmo liata a ypa Krista cha châ ta, rônahna hnabeiseihpa cha a châ.

²⁸ Chyhsa to Krista liata phapakipa ta eima paduasa thei nawpa ta, chyhsa to chhoreipa ta, sona to pachupa ta, Krista thâtih eima chho tyh.

²⁹ Cha châna chata hriapasa na ta, kei liata thatlô ngaitapa ta a hriatuhpa thatlôna zydua hmâpa ta ei tei lymâ.