KALATIA 6 - Mara Bible RV (BSI)

Phaohri a phaokhei raihriena

¹ Unawh saih u, chyhsa ta moleina a tao hai nota pachhaipa a châ khiahta cha, nâmo, thlahpa chyhsazy ta nônai kawpa ta paduapathi heih teh u. A vaih teh u, chataleipatala nâmo chhao reipasaopa ta nama y pathlei aw.

² Nama phaohrizy a phaokhei raihriepa ta, Krista ryhpa paki teh u.

³ Khâpa hmah châ tlôh leipa ta, chyhsa peimawhpa hawhta â pachâpa cha, anosasyh a dôveipa a châ.

⁴ Chyhsa to ama hmotaopa chyu mohpasia mawh ei sy. Chatanachata mohropa nata a pakho leipa ta, anosasyh a palaikhei nawpa chhâpa a hnei aw.

⁵ Chyhsa to ta âmo phao chyu phaoh tlôh aw ei ta.

⁶ Bie pachuna a daopa cha, hmo pha to a hmôpa tawhta a pachutuhpa pie hra mawh sy.

⁷ Dôpa ta y khah u. Khazohpa cha pasipasawh awpa rimâ châ vei. Chyhsa ta chi a tupa maih, cha tlai cha a hria aw.

⁸ Ano sapa châta chi a tupa cha, sapa thina thei hria aw ta; Thlahpa châta chi a tupa cha, chhâzaw hrona Thlahpa thei a hria aw.

⁹ Hmo pha tao ai khah ei suh u. Eima diathlâ leipa khiahta la, a daihtita liata a thei eima hria aw.

¹⁰ Chavâta rypaohna eima hneipa hawhta, chyhsa zydua chô liata hmopha tao sih la, ngiapâtuhpa chhôhkhazy chô liata tao pachai suh u.

Zikyurâna chhâna nata byhnâ awna

¹¹ Moh tua u, châhnawh laipa hmâpa ta, keima ku tlai ta nama hnohta ei vaw roh hih.

¹² Sapa hmia pha châ khohpazy ta chopaw pataisa raruah ama châ chhuah tyh. Khâpa vâta hmah châ vei, Krista kraws vâta taola ama tao lei nawpa ta a taopa deita ama châ.

¹³ Chopawtaipazy chhao tlai ta ryhpa bie zyh tlôh leipa ei ta, nama pôhpa liata a palaikhei awpa ama hnei thei nawpa ta, chopaw cha pataisa awpa ama khohpa a châ.

¹⁴ Kei deikua la, eima Beipa Zisu Krista kraws dei leipa ta cha, a palaikhei awpa hropa hnei va na. Cha kraws liata khizaw he kei châta khaipâpa ta y ta, kei chhao khizaw châta khaipâpa ta ei y.

¹⁵ Chopawtaipa ta phahnaina hnei leipa ta, chopawtaileipa chhao phahnaina hnei hra vei. Taopathina deikua cha phahnaina a hnei.

¹⁶ Cha ryhpa a zyhpa zydua nata Khazohpa Izarei chô liata thlalôhna nata ngiachhiena y mawh sy.

¹⁷ Tahmâ tawhta la ahy hmahta na patypamâ khao khah sy, ei pôhpa liata Zisu eih ei châna ngianazy phaoh tlôh na ta.

¹⁸ Unawh saih u, Abeipa Zisu Krista ngiachhiena cha nama thlahpa hnohta y mawh sy. Amen.