KALATIA 5 - Mara Bible RV (BSI)

Krista liata khotalaina

¹ Khotalaipa ta y awpa ta Krista ta miah papua ha ta, chavâta â ipa ta a duah u la, sei raopaky a ky heih awpa ta a pasaih khao khuh vy.

² Pachâ teh u, kei, Pawla heta ei cha chho ei. Chopawtaipa namâ pyh khiahta cha, Krista cha nama châta phahnaina hnei aw vei.

³ Ahy rai chopawtaipa a pyhpa maih cha, ryhpa bie zydua a zyh paki awpa a châ tahpa ei duakhei heih.

⁴ Nâmo, ryhpa ta thaichâ a chhuahpazy saih u, Krista nata a chhaih ha ei chi ta, ngiachhiena nama paosai haw.

⁵ Keimo deikua la, Thlahpa zawhzi ta, ngiapâna vâta siana to awpa hnabeiseihpa ta, a ngiatiah leipa ta eima hâ.

⁶ Krista Zisu liata la, chopawtaipa tlyma, chopawtaileipa tlyma, phahnaina hnei veih ei. Kyhpachâna ta rai a hriapa ngiapâna dei he a phahnai.

⁷ Arâpasuana liata namâ râ pha tyh thlâ bao na ta, biehmeiseihpa zyh lei awpa ta, ahyzy ma châ pakhâ ha ei tly?

⁸ Cha pasyuna cha nâmo châ awtuhpa tawhta châ vei.

⁹ Thinô chyhta ta viahdie zydua a pathyu tyh.

¹⁰ Saizie nanopa a pyh aw veih ei chi tahpa Abeipa liata ei lôh. Châ patypamâtuhpa cha, ahy rai châ sala, hriena â tyh aw.

¹¹ Unawh saih u, kei he chopawtaipa aduakheina bie a chhopa cha vaw châ ha sah la, khazia taolapa ta ei y pyly? Cha hawhta châ sala, kraws vâta tymâna he a y lei awpa tlai.

¹² Châ patypamâtuhpazy cha âmosasyh ta a chhawh pathlah lâlao ei sala ei khoh.

¹³ Unawh saih u, khotalaina hnei awpa ta awpa nama châ. Châhrasala nama khotalaina cha sapa ryhpaohna châta hmâh leipa u la, kyhpachâna ta tlao a chakao raihrie teh u.

¹⁴ “Nâma kyh nâ pachâpa hawhta, na vaih kyh na pachâ awpa a châ,” tahpa bie miakha liana heta ryhpa zydua â ki.

¹⁵ Nâmo nata nâmo a siepa ta, namâ nie khiahta deikua cha, a vaih teh u. Chataleipatala nâmo nata nâmo ta namâ pahleipadia pathlei aw.

Thlahpa hro

¹⁶ Chavâta he bie he rei awpa ei khoh, Thlahpa liata y teh u. Chatanachata sapa aohraohna cha pipatlohsa aw veih ei chi.

¹⁷ Sapa khona ta Thlahpa a dyuh ta, Thlahpa khona ta sapa â dyuh. Nama tao khohpa hmozy nama tao thei lei nawpa ta, sapa nata Thlahpa cha amâ dyuh tyh.

¹⁸ Thlahpa chhihthapa ta nama y khiah deikua cha, ryhpa ry liata y veih ei chi.

¹⁹ Sapa hmotaopazy cha a lâ thlâh ha ta, hezy he a châ: Apatlana, palôh pathaih leina, parâna,

²⁰ nothlahpa achhyna, dyuthaina, ahaona, ahryuna, hiatliana, pathichhiena, ateina, apananona, achhaihna,

²¹ uahvana, sahma parina, niedona nata cha hawhpa lâchhâh hmozy cha, sapa hmotaopazy a châ. Zikyu ei châ râ hapa hawhna ei khata, zikyu ei châ râ heih ei. Cha hawhpa hmo a taotuhpazy cha Khazohpa khinarâh to aw veih ei.

²² Thlahpa theilâpa deikua cha, kyhpachâna, thaphana, thlalôhna, daotheina, nôphana, phana, ngâchhihna,

²³ areisina nata asohsina zy a châ. Thlahpa theilâpazy chakhianazie ta ryhpa biepiepa rai y vei.

²⁴ Krista Zisu liata a ypazy ta sapa cha a aohraohna nata a khonazy chhaota ama khaipâ haw.

²⁵ Thlahpa ta a hrohpa eima châ khiahta cha, Thlahpa liata y ei suh u.

²⁶ Keimo nata keimo a pahao leipa ta, keimo nata keimo a uahva hra leipa ta, a pasâhsapa ta y khah suh u.