KALATIA 4 - Mara Bible RV (BSI)

Ryutotuhpazy

¹ Rei ei chhuahpa cha he he a châ: Ryutotuh awpa cha ato ano eih châ hra sala, hawti a châ chhôh cha sei nata a nano hlei vei.

² A paw ta ryu a pie nawpa daihti a raopa a tlô hlâlei cha, vaituhpazy nata mohôhtuhpazy ry liata a y chypa a châ.

³ Cha hawhna chata keimo chhao, hawti eima châ nota cha, khizaw ryhpa ry liata sei ta eima y.

⁴ Châhrasala a daihti â vaw ki nahta, Khazohpa ta chanô sapa a Sawchapawpa, ryhpa ry liata a pihpa cha za tuah ta.

⁵ Sawchapawpa châna eima to thei nawpa ta, ryhpa ry liata a ypazy chatlai awpa ta a za tuah.

⁶ Sawchapaw nama châpa vâta Khazohpa ta a Sawchapawpa Thlahpa cha eima palôh chhôh liata za tuah ta, “Abba! Ei Paw!” tahpa ta a aw tyh.

⁷ Chavâta sei châ khao leipa chi ta, sawchapaw tlao na châ haw. Sawchapaw na châ khiahta cha, Krista zawhzi ta Khazohpa ryutotuhpa na châ.

Kalatia mo khokheina

⁸ Khazohpa nama pahno vei nona kha, ama pizie rai chhao ta khazoh a châ leipazy sei ta y ei chi ta.

⁹ Tahmâ cha Khazohpa nama pahno haw. Khazohpa ta a pahnopa nama châ haw tah awpa tlao a châ. Cha hawhta nama châ tawh hmâchhâh ta, kheihtazieta khizaw ryhpa chiehleipa nata phahnai leipa lâ nama kua thlâh heih tly? Ama sei ta y heih awpa ma nama tlaichhai?

¹⁰ Nohzy, thlazy, daihtizy nata kôzy nama chay tyh!

¹¹ Nama châta thazâh ei pahryuh thlâhthli aw tahpa ei chi kaw.

¹² Unawh saih u, nâmo hawhta ei ypa hawhna heta, nâmo chhao kei hawhta y awpa ta ei châ haw ei. Ei chô liata khâpa pei hmah hria veih ei chi.

¹³ Nama hnohta thâtihpha ei cha vaw chho tua no ei kha, sapa chiehleina vâta a châpa nama pahno.

¹⁴ Ei duahmo kha nâmo châta tymâna châ hra sala, na mohnao leipa ei chi ta, na pasi hra veih ei chi. Khazohpa vâlyuhchâpa hawhta tlao nâ ly ei chi ta, Krista Zisu hawh tlai ta einâ ly ei chi.

¹⁵ Namâ lyna zydua kha kheihta a châ khai haw? Tao theipa châ sala, nama mozy chhao taih thaopa ta eina pie khoh aw ei chi tahpa ei pahno.

¹⁶ Biedopa ei cha chhopa vâ ei ta, nama khakhaipa ei vaw châ ha ma?

¹⁷ Ama cha pahnie thei nawpa ta phahnai a ngiah ngaita ei ta, châhrasala achhuahna phapa châta châ vei. Âmo châta phahnai namâ ngiah thei nawpa ta, miah pachhaih awpa amâ chhuah chaipa a châ.

¹⁸ Achhuahna phapa châta la, nama hnohta ei y nota dei châ leipa ta, khatino rai ta phahnai a ngiahpa a pha.

¹⁹ Ei saw saih u, Krista lyuna nâmo liata a y hlâlei cha, saw zeih ta ei châ zeih ei hih!

²⁰ Nâmo kyh liata ei nôpo ngaita ta, tahmâ chhao he nama hnohta y ta, ao ki pasâh awpa ei byuh kaw!

Hâkarâ nata Sârâ pakhona bie

²¹ Ryhpa ry liata a y khohpa saih u, na chho teh u, ryhpa bie cha nathlie tyh vei ei chi ma?

²² Hetana heta ropa a châpa kha. Abarahâ ta sawchapaw pano hnei ta, pakha cha seichanô chô liata pih ta, pakha cha khotalaipa chanô chô liata a pihpa a châ.

²³ Seichanô chô liata sawchapaw cha, sapa ryhpa hawhta pih ta, khotalaipa chanô chô liata sawchapaw deikua cha, bietai vâta a pihpa a châ.

²⁴ Chazy cha pakhona a châ: Cha chanôzy cha biehrai miano châ ei ta, miakha cha Sinai tlâh tawhtapa châ ta, sei châ awpa ta saw satuhpa Hâkarâ a châ.

²⁵ Hâkarâ cha Arabia râh liata Sinai Tlâh châ ta, a sawzy chhaota sei ta a ypa ama châpa vâta, tahmâno ta Zerusale vyuhpa ta a duahpa a châ.

²⁶ Chô lâ Zerusale deikua cha, khotalaipa châ ta, ano cha keimo nô a châ,

²⁷ “Nâ, saw leipa, Saw a sa beih leipa y, Thaphapa ta y mah y; Nâ, saw a zeih beih leipa, Awh la, rahao mah y! Vahpa a hneipa sawzy hlâta, Yrupa chanô sawzy ama hluh via aw,” tahpa ta ropa hawhta.

²⁸ Chavâta unawh saih u, keimo cha Aisika hawhta, bietai sawzy eima châ.

²⁹ Kha nota sapa ryhpa ta a pihpa ta Thlahpa ryhpa ta a pihpa a taolapa hawhna khata, tahmâ chhao he, cha hawhta a châ lymâ.

³⁰ Biehrai ta kheihta a tah? “Seichanô nata a sawchapawpa kha papua teh, seichanô sawchapaw ta khotalaipa chanô sawchapaw ryu a tolâh awpa châ vei,” a tah.

³¹ Chavâta unawh saih u, keimo la seichanô chô liata sawzy châ leipa pi ta, khotalaipa chanô chô liata sawzy eima châ.