KALATIA 3 - Mara Bible RV (BSI)

Ryhpa nata ngiapâna

¹ Hy Kalatia mo ahrupa saih u! Ahy ma châ dyu ei? Nama mohmô lia tlai ta, Zisu Krista cha khaipâpa ta a ypa a siapa ta palâsapa a châ.

² He deita he nâmo tawhta pahno awpa ei khoh: Ryhpa hmotaopazy vâta ma Thlahpa nama to, nama theipa namâ ngiapâpa vâta maw?

³ Khazia he tlu po ta nama hru tly? Thlahpa ta pathao ei chi ta, sapa ta ma nama pachhâ aw?

⁴ Hraoleipa hmo châ tlai sala, hraoleipa liata ma pasa hluhpi nama vaw tao?

⁵ Nama hnohta Thlahpa châ pietuhpa nata nama hry liata hmonoâhpa taotuhpa ta, ryhpa hmotaopazy vâta ma chazy cha a tao? Thei ei chi ta namâ ngiapâ vâta maw?

⁶ Abarahâ thâtih kha pachâ tua u, “Khazohpa a ngiapâ ta, cha ngiapâna cha a siana ta raopa a châ.”

⁷ Chavâta pahno teh u, ngiapâna liata a ypazy, chazy tlai cha Abarahâ sawzy ama châ.

⁸ Zenitaizy cha ngiapâna vâta Khazohpa ta thai a pachâsa aw ei tahpa Biehrai ta pahno chhielie ta, “Nâma liata phopi to byhnâ topa ta ama y aw,” tahpa ta Abarahâ hnohta thâtihpha a vaw chho chhielie hapa a châ.

⁹ Chavâta ngiapâna liata a ypazy cha, ngiapâpa chyhsa Abarahâ hnohta byhnâ patosapa ama châ.

Mosiapazy ngiapâna ta ama hroh aw

¹⁰ Ryhpa hmotaopazy liata a pahniehpa zydua cha, chhiesana ry liata ama y, “Ryhpa châbu liata bie ropa zydua a tao leipa nata a zyh leipa maih cha chhiesapa ta y mawh sy,” tahpa ropa châ tlôh ta.

¹¹ Khazohpa mohmô ta ahy hmah ryhpa vâta thaichâpa y veih ei, tahpa a siapa ta â lâ, “Mosiapa cha ngiapâna ta a hroh aw,” tahpa châ tlôh ta.

¹² Ryhpa cha ngiapâna tawhta a puapa châ vei, “Ryhpa a zyhpa cha, ryhpa vâna chata a hroh aw,” tahpa tlao a châ.

¹³ “Tho liata bangiehpa maih cha chhiesapa ama châ,” tahpa ropa hawhta, Krista cha keimo châta chhiesapa ta y ta, ryhpa chhiesana tawhta miah a pachha haw.

¹⁴ Chatanachata Abarahâ châta byhnâ awna cha, Krista Zisu vâta Zenitaizy hnohta vaw tlô aw ta, Thlahpa taihpa cha ngiapâna ta eima hmô thei aw.

Ryhpa nata bietai

¹⁵ Unawh saih u, pamosa nawpa ta, chyhsapa taozie ei reih tua aw: Chyhsa taopa biehrai hmahta pa-i hapa cha, phie beih leipa ei ta, baichha beih hra veih ei.

¹⁶ Bietaizy cha Abarahâ nata a chipathla hnohta taopa a châ. “Chipathlazy hnohta,” tahpa ta chyhsa hluhpi hnohta bie hraipa châ leipa ta, “Na chipathla hnohta,” tahpa ta mopakha a nuapa ta biehraipa châ ta, cha cha Krista a châ.

¹⁷ Rei ei chhuahpa cha he he a châ: Biehrai taopa a châ tawhta kô 430 khô lâta a vaw ypa ryhpa heta, Khazohpa ta a vaw pa-i hapa biehrai kha parao leipa ta, bietai chhao aruapa pachâsa vei.

¹⁸ Ryuto râh cha ryhpa vâta topa a châ khiahta cha, bietai vâta topa châ aw vei. Châhrasala Khazohpa ta bie a taih ta, ryuto râh cha Abarahâ hnohta piepa a châ.

¹⁹ Cha khiahta la, khazia ryhpa he a y? Paraonazy vâta ryhpa he bietaizy liata baichhapa châ ta, bietai chipathla â vy hlâta hmâ awpa a châ. Cha cha vâlyuhchâpazy hmâpa ta lyuhchâpa ku ta pa-ipa a châ.

²⁰ Lyuhchâpa a y khiahta cha, py kha vyuhpa dei ta lyuhchâna rai hria beih vei. Khazohpa deikua cha pakha a châ.

Ryhpa chhuahna

²¹ Cha khiahta la, ryhpa ta Khazohpa bietaizy a chakhia ma? Chakhia bao va! Hrona a pie theipa ryhpa piepa a châ khiahta cha, siana chhao cha ryhpa vâta a y thei aw.

²² Châhrasala Khazohpa bietai cha, Zisu Krista ngiapâna vâta, ngiapâtuhpazy hnohta piepa a châ thei nawpa ta, khizaw zydua he moleina liata a tâhpa a châzie Biehrai ta a phuah.

²³ Ngiapâna a vaw tlô hlâta cha, ryhpa ry liata patâhpa châ pi ta, ngiapâna a vaw tlô haipa phualuahpa a châ hlâlei patâh chypa eima châ.

²⁴ Chatanachata ngiapâna vâta thai eima châ thei nawpa ta, ryhpa cha Krista lâta miah chhithatuhpa a châ.

²⁵ Tahmâ deikua, ngiapâna a vaw tlô hapa vâta, ryhpa chhihthana ry liata y khao ma pi.

²⁶ Ngiapâna vâta, nama zydua ta Krista Zisu liata Khazohpa sawzy nama châ.

²⁷ Krista liata bâti a châpazy cha, Krista ta a tobipazy nama châ.

²⁸ Krista liata cha, Zu tlyma, Krikâh tlyma y leipa ta; sei tlyma, khotalaipa tlyma y hra leipa ta; chapaw tlyma, chanô tlyma y hra vei. Krista Zisu liata cha, nama zydua ta miakha nama châ.

²⁹ Krista eih nama châ khiahta cha, Abarahâ pathla châ ei chi ta, bietai hawhta ryutotuhpazy nama châ.