KALATIA 2 - Mara Bible RV (BSI)

Lyuhchâpazy ta Pawla amâ pyh

¹ Kô hrawh hleipalih a khô tawhta, Titu a chhipa ta, Bânabâ chhaota Zerusale lâ khy heih na ta.

² Aluahna kyh vâta a khypa châ na ta, hraoleipa liata a vaw râpasuapa tlyma, a râpasua haipa tlyma ei châ lei nawpa ta, Zenitaizy hry liata thâtihpha tlâh ei awkhei tyhpa cha, nôpaw viapazy hnohta ano eih ta ei chho ei.

³ Ei hnohta a ypa Titu cha, Krikâh chyhsa châ hra sala, chopaw pataisa raruahpa châ vei.

⁴ Krista Zisu liata khotalaina eima hneipa mohparu awpa ta, unawh pakheipazy arulâta eima hry liata a vaw ngia ei ta, seichâna lâ miah a chhi awpa amâ chhuahpa vâta, chopawtaina kyh he a vaw ypa a châ.

⁵ Châhrasala thâtihpha biehmeiseihpa cha nama hnohta a y thlâh thei nawpa ta, buakha chhao âmo cha a ngiarih ma pi.

⁶ Chyhsa peimawhpa hawhta a lâpazy he, ama châna vâta kei liata ananona y hlei vei. Khazohpa cha khôtho lâ alânazie ta pachia vei. Chyhsa peimawhpa hawhta a lâpazy heta na phahnaikhei hlei veih ei.

⁷ Âlielâta tlao a châ. Chopawtaipazy hnohta thâtihpha chhona rai Pity hnohta pavaosapa a châpa hawhta, chopawtaileipazy hnohta thâtihpha chhona rai ei hnohta pavaosapa a châzie lyuhchâpazy ta ama pahno.

⁸ Chopawtaipazy lyuhchâpa Pity chakaona liata rai a hriapa Khazohpa ta, kei, Zenitaizy lyuhchâpa chakaona liata chhao a hria hra.

⁹ Ei hnohta piepa ngiachhiena cha, Awnanopa tôhtlâh ta pachâpa Zâmie nata Kephâ nata Zawhâna zy ta ama pahno nahta, âmo cha chopawtaipazy lâ sie aw ei ta, Bânabâ nata kei cha Zenitaizy lâ sie awpa ta akaona ku chachâh lâ miah ama hlâ.

¹⁰ Dyhchhiepazy a thei awpa deikua miah amâ haw. Cha hmo cha tao ei chhuah tyhpa tlai a châ.

Antiôkâ liata Pawla ta Pity a ra

¹¹ Kephâ cha Antiôkâ khih lâ â vy nota, â doleipa ta a ypa vâta hmiadaisâ tlai ta ei chakhia.

¹² Zâmie tawhta chyhsazy ama vaw tlô hlâta cha, Zenitaizy hnohta pati nie tyh ta, châhrasala ama vaw tlô nahta, chopawtaipa py a chipa vâta, ama hnohta a hlao khoh khao leipa ta â panano haw.

¹³ Zu chyhsa hropazy chhao ta ano hâ a lapa ta, phapakheipa ta y hra ei ta, Bânabâ chhao tlai cha ama phapakheina ta a paviasa haw.

¹⁴ Châhrasala ama hro cha thâtihpha biehmeiseihpa nata â hmie leipa ei hmô nahta, ama zydua hmiakô liata Kephâ hnohta, “Nâ, Zu chyhsa ta, Zuzy hrozie hawhta hro leipa ta, Zenitai hrozie hawhta na hro thlâh ha khiahta cha, kheihtazieta Zenitaizy cha Zuzy hawhta paysa raruah nâ chhuah?” tahpa ta ei chho.

Ngiapâna vâta thaichâna

¹⁵ Keimo cha Zu chyhsa ta a pihpa châ pi ta, Zenitai moleipazy châ ma pi.

¹⁶ Chatahrasala ryhpa hmotaopazy vâta chyhsa cha thaichâpa ta y leipa ta, Zisu Krista ngiapâna vâ deita ta thaichâpa ta a y, tahpa eima pahno. Chavâta keimo chhao, ryhpa hmotaopazy vâta châ leipa ta, Krista Zisu ngiapâna vâta thaichâpa ta eima y thei nawpa ta, Krista cha eimâ ngiapâ. Ryhpa hmotaopazy vâta ahy hmah thaichâpa ta y thei veih ei.

¹⁷ Châhrasala Krista liata thaichâpa ta y awpa eima chhuah nota, keimo chhao cha moleipazy vaw châ ha sih la, Krista cha moleina chakaotuhpa a châ tahna a châ aw ma? Châ bao va.

¹⁸ Ei phie hapa a sa pathituhpa ei châ khiahta cha, paraotuhpa ei châpa keimasasyh ta a palâsapa ei châ.

¹⁹ Khazohpa lâta ei hroh thei nawpa ta, kei la ryhpa vâta ryhpa liata ei thi haw.

²⁰ Krista hnohta khaipâpa ta ei y. Châhrasala ei hroh. A hrohpa deikua cha kei châ khao va na, Krista cha kei liata tlao a hroh. Tahmâ pôhpa ta ei hropa he, kyh na pachâ ta, ei châta anosasyh â hlâtuhpa Khazohpa Sawchapawpa ngiapâna liata a hrohpa ei châ.

²¹ Khazohpa ngiachhiena cha hraolei pachâsa va na. Ryhpa liata thaichâna a y khiahta cha, Krista cha hraoleipa ta a thipa a châ aw.