KALATIA 1 - Mara Bible RV (BSI)

Anaohna

¹ Kei, lyuhchâpa Pawla, chyhsa tuapa châ leipa ta, chyhsa zawhzi ta châ hra leipa ta, Zisu Krista nata thina tawhta Zisu a pathyutuhpa Paw Khazohpa zawhzi ta lyuhchâpa rai a hriapa nata

² ei hnohta unawh a ypa zydua ta Kalatia râh liata Awnanopazy eima châ naoh.

³ Eima Paw Khazohpa nata Abeipa Zisu Krista tawhta ngiachhiena nata thlalôhna nama hnohta y mawh sy.

⁴ Ano cha eima Khazohpa nata eima Paw khozie hawhta, tahmâhlâ khizaw moleina tawhta miah pachha awpa ta, eima moleinazy vyuhpa ta anosasyh â hlâpa a châ.

⁵ Khazohpa hnohta chhâzaw nata tlyzaw ta rônahna y mawh sy! Amen.

Thâtihpha hropa y vei

⁶ Krista ngiachhiena zawhzi ta nâmo châ awtuhpa siesaipa ta, thâtihpha hropa lâta thlai nama tlei thlâhpa he, noâh ei tah ngaita!

⁷ Thâtihpha hropa y vei. Krista thâtihpha panano ta, cha patypamâ a chhuahpazy ama châ.

⁸ Keimo ta tlyma, vârâh tawhta vâlyuhchâpa tlyma ta eima cha chhopa nata a chakhiapa thâtihpha ama cha vaw chho khiahta cha, cha hawhpa chyhsa cha chhiesapa ta y mawh sy.

⁹ Eima rei hapa hawhna khata, tahmâ ei reih chanei heih aw: Nama vaw dao hapa thâtihpha chakhiapa ta, thâtihpha hropa châ vaw chhopa maih cha chhiesapa ta y mawh sy.

¹⁰ Tahmâ he chyhsa apykheina ma ei tlua, Khazohpa apykheina maw? Chyhsa palysa a chhuahpa ma ei châ? Chyhsa palysa ei chhuah khiahta la, Krista chakaotuhpa châ aw va na.

Khazohpa ta Pawla a aw

¹¹ Unawh saih u, thâtihpha ei chhopa kha, chyhsapa thâtihpha châ vei tahpa nama pahno awpa ei khoh.

¹² Chyhsa tawhta ei daopa thâtihpha châ leipa ta, eina pachupa ei thâtihpha châ hra vei, Zisu Krista aluahna ta ei daopa thâtihpha a châ.

¹³ Zuzy zyhna liata ei y nota ei hrozie nama pahno. Thachahra ta Khazohpa Awnanopa taola na ta, parao ei chhuah.

¹⁴ Zuzy zyhna kyh liata, ei chiheihzy hry liata ei richâhkha hluhpizy hlâta hmasie viapa châ na ta, nâ pathlatuhpazy taozietyhpa châta phahnai a ngiah ngaitapa ei châ.

¹⁵ Châhrasala Khazohpa ta ei nô chhi liata ei y no tawhta na vaw panano ha ta, a ngiachhiena vâta eina aw haw.

¹⁶ Zenitaizy hry liata a thâtihpha ei chho thei nawpa ta, Khazohpa ta a Sawchapawpa cha palôhtlâh ngaitapa ta kei liata a vaw paluahsa. Kha nona kha ahy hmah a saohiah veih ei na.

¹⁷ Kei hlâta lyuhchâpa a châ tuapazy a hmô awpa ta Zerusale lâ khy hra va na. Arabia râh lâ tlao sie na ta, Dâmaskâ khih lâ ei vaw lie heih.

¹⁸ Kô thôh khai tawhta, Kephâ a hmô awpa ta Zerusale lâ khy na ta, a hnohta noh hrawh hleipangawh châh na ta.

¹⁹ Abeipa unawhpa Zâmie dei leipa cha, lyuhchâpa hropa ahy hmah hmô va na.

²⁰ Châ ei cha vaw paphaopa ei he haipa bie châ vei tahpa Khazohpa hmiakô liata bie ei taih.

²¹ Cha hnôhlâ ta Suria nata Silisia râhzy lâ sie na ta.

²² Krista liata a ypa Zudia râh Awnanopazy ta cha ei hmia chhao na pahno mâh veih ei.

²³ “Miah a taola tyhpa khata, tahmâ cha parao â chhuah tyhpa ngiapâna bie tlao a chho haw,” tahpa ta chyhsazy reipa rakha dei ama thei.

²⁴ Chatanachata keima vâta Khazohpa ama palyupalih thei haw.