ISAI 8 - Mara Bible RV (BSI)

Asuria ta Izarei a siehnao

¹ Abeipa ta ei hnohta, “Châ rona phiapa la la, mo to rei thai awpa ta, ‘Mahe-salâ-has-bâza châta,’ tahpa ta roh teh.

² Pahnokheituh ngâchhihpazy tlua aw ei na ta, theihthaipa Uria nata Zeberekiah sawchapawpa Zekaria ta eina pahnokhei aw ei,” tah ta.

³ Chatawhcha hrohsonô lâ a ngia na ta, saw phaoh ta, sawchapawpa sa ta. Abeipa ta ei hnohta, “A moh Mahe-salâ-has-bâza bi teh.

⁴ Hawti ta, ‘Ei pâ,’ ‘Ei nâ,’ a tah thai hlâta, Dâmaskâ hneirôna nata Samâri hraona hmozy cha Asuria bei hmiakô liata siekheipa a châ aw,” tah ta.

⁵ Abeipa ta ei hnohta reih via heih ta,

⁶ “He phopi heta nai zualua ta a lohpa Silôah tizy dytha ei ta, Rezi nata Remâliah sawchapawpa chô liata amâ lypa vâta,

⁷ pachâ teh u, Abeipa ta Ufrâti Chavah hawhta a laipa nata thatlôpa Asuria bei nata a rônahna zydua ama chô liata a palo thlu aw. A kao zydua bie aw ta, a ngiahkâ zydua taihta a bie khai aw.

⁸ Zudâh chhao tisaih ta tlô thlu aw ta, a rao taih tlai ta a vao aw,” a tah. Châhrasala Khazohpa eima hnohta y ta, Na râh doh nata hâ zydua A mathlaw ta a khu khai aw.

⁹ Phopizy saih u, paraopa ta y u la, Pakeichheihpa ta y teh u. Râh hlapa zydua saih u, Nama nah pachôh teh u; Chariah chhaichhi a tao u la, Pakeichheih khaipa ta y teh u; Chariah chhaichhi a tao u la, Pakeichheih khaipa ta y teh u.

¹⁰ Pachânazy cha reih pahmaoh teh u, Châhrasala khâpa hmah châ aw vei; Bie cha reih teh u, Châhrasala a duah aw vei, Khazohpa eima hnohta a ypa vâta.

Khazohpa china

¹¹ Abeipa ta a ku thatlôpa ta ei hnohta bie reih ta, he phopi lâpi a chhih lei awpa ta hetana heta zikyu einâ râ:

¹² “He phopi ta teiparuna a tahpa cha, Teiparuna ta rao hra leipa u la; Ama chipa chhao chi hra leipa u la, Ama chihuhpa chihuh hra khuh vy.

¹³ Pheisaihzy Abeipa deita cha, Pathaihpa ta rao aw ei chi ta; Ano deita cha nama chipa châ sala, Ano cha nama chihuhpa châ mawh sy.

¹⁴ Ano cha supathaihpa châ aw ta, Izarei phopi mianopazy châta deikua cha, Moleina lô châ aw ta, Achapiana lôpanô a châ aw. Zerusale khihsawzy châta chhao, Aphyh nata khoheih a châ aw.

¹⁵ Chyhsa hluhpi a chapiapa ta, Pao aw ei ta ama keichheih aw; Khoheih chôkhâhpa châ aw ei ta, Patupa ama châ aw.

¹⁶ Bietapa he chaty la, Pachuna bie he, Ei pachupazy hry liata chahnao pa-i mah y.”

¹⁷ Chavâta Zakaw pathlazy tawhta a hmia a nyu hapa Abeipa cha hâ aw na ta, ei mokhâh aw.

¹⁸ Moh teh u, kei nata Abeipa ta eina piepa sawzy he, Izarei liata ngiana nata pamosanazy châta Zaio Tlâh liata a pahrâpa Pheisaihzy Abeipa ta a hmâpazy eima châ hih.

¹⁹ Chyhsazy ta, “Pavaw tieta hawhta sâh ei ta, chaeichamypa ta bie a reihpa peihthaipa nata dyuthaipa zy a saohiah teh u,” ama cha tah tita, hetana heta a chhy teh u. Phopi miakha châ hra tlôhpa khiahta cha, ama Khazohpa amâ saohiah awpa châ hri vei ma? Ahrohpazy châta ma athipa tlao amâ saohiah aw?

²⁰ Ryhpa nata bieraopa hawhta bie a reih leipazy cha, âmo châta khih a deih mâh leipazy ama châ.

²¹ Nôpopa nata nodipa ta râh ama chahryh aw. Ama no a di tita, ama bei nata ama Khazohpa reipachhie aw ei ta, ruchhôpa ta avâ lâ ama ua aw.

²² Alei lâ moh aw ei ta, nôpona nata zohna nata pachârôhna zohmyhna ta a biepa hmô aw ei ta, zohna chha kaluhpa liata thypa ama châ aw.